GINNAN kari na Dios i ngamin nga pakimallo? Mangurug i aru nga totolay tatun. Nonopadda nga makasta mabba i ngamin nga relihion anna ari ngana importante nu sinni nga dios i paddasallammu. Ngem kurug kari yatun?

Kakkagian na Biblia nga aru nga totolay i ari nga makimallo ta kurug nga Dios. Tagga ta metutura pagalaman i Biblia, gagangay ta totolay nga makimallo ta rebulto ira. Ngem mamippiga ira nga sinabarangngan na Dios mekontra tatun nga annangngua. Angngariganna, kunnaw i kagian na Salmo 115:4-6 meyannung ta sinan-dios ira: “Egga i talinga da, ngem ari ira nga makaginna.” Manawag gafu i punto. Ngatta makimallo ka ta dios nga ari naka mabba maginna?

Nipasigo na tadday nga istoria ta Biblia yatun nga punto. Kinagi na kurug nga profeta nga si Elias ta profeta ira ni Baal nga makimallo ira ta diosda tapus makimallo gapa si Elias ta diosna. Kinagi ni Elias nga matabbag na kurug nga Dios i pakimallo ngem ari nga matabbag yatun na falsu nga dios. Apipiddu i pakimallo na profeta ira ni Baal anna grabe i pakkukkulleda ngem ari nga natabbag i pakimalloda! Kunnaw i mabibbig ta Biblia: “Awan vuluvuga tu tuttubbag; awan vuluvuga tu maggigginna.” (1 Patul Ira 18:29) Ngem anni i nesimmu ta pakimallo ni Elias?

Insigida nga sinabbag na Dios i pakimallo ni Elias. Nangidog i Dios tu afi maggafu ta langi tapenu tuggian i tavvung ni Elias. Ngatta sinabbag na Dios i pakimallona? Mammuattam i rason nu bibbigattam i pakimallona ta 1 Patul Ira 18:36, 37. Ababba laman yatun nga pakimallo. Ma-30 laman nga uvovug ta orihinal nga Hebreo. Ngem mamillu nga niyusa ni Elias i personal nga ngagan na Dios nga Jehova.

“Makakkua” onu “yafu” i kebalinan na ngagan na dios na Canaanita ira nga si Baal. Nadduruma i ngaganna depende nu sitaw nga maddian i Canaanita ira. Ngem Jehova i ngagan na tattadday anna kurug nga Dios. Kunnaw i kinagina ta totolena: “Sakan si Jehova. Yatun i ngagakku; ariakku iyawa i glorià ta maski sinni.”​—Isaias 42:8.

Ngatta natabbag i pakimallo ni Elias ngem ari nga natabbag i pakimallo na profeta ira ni Baal? Parte na paddayaw kani Baal i prostitusion anna pangisakrifisio ta totolay. Dakal i nadduman natun ta paddayaw kani Jehova. Manakina nga kuan na totolena danatun nga kannama-nama nga annangngua. Kayàna lagu nga marenu i paddayoda nisa. Pannonopammu yaw: Nu nangipatulug ka tu tura para ta respetadu nga kofummu tapus nipem i ngaganna tatun, ekspektammu kari nga mepatulug i tura ta tolay nga tanakuan i ngaganna anna marake i reputasionna? Magga ari!

Nu makimallo ka kani Jehova, kikkibbidammu i Namaratu anna i Yama na ngamin nga totolay. * Kunnatun i nipakimallo ni profeta Isaias: “Sikaw, O Jehova, i Yama mi.” (Isaias 63:16) Si Jehova gafu i tukuyan ni Jesu-Cristo turi ta kinagina ta tagatuttulna ira: “Umay ngà ngana ta Yamà nga Yama da gapa, nga Dios ku anna Dios da gapa.” (Juan 20:17) Si Jehova i Yama ni Jesus. Yayya i Dios nga nakimallakkan ni Jesus anna i Dios nga kinagina nga pakimallakkan gapa na tagatuttulna ira.​—Mateo 6:9.

Ituttuddu kari na Biblia nga makimallo ittam kani Jesus, kani Maria, ta sasanto, onu ta anghel ira? Ari—kani Jehova laman. Yaw i dua nga rason nu ngatta kunnatun. Ollu, tadday nga klase na paddayaw i pakimallo anna ituttuddu na Biblia nga si Jehova laman nakuan i dayawattam. (Exodo 20:5) Mekadua, kagian na Biblia nga si Jehova i “Minagginna tu pakimallo.” (Salmo 65:2, NW) Maski nu aru nga annungan i nitalo ni Jehova ta tanakuan, yatun nga responsibilidad ay arianna nga nitalo ta tanakuan. Nipromesana nga yayya mismu i magginna ta pakimallo tam ira.

Nu kayà mu gafu nga ginnan na Dios i pakimallo mu ira, nonopammu yaw nga tabarang na Biblia: “Mapaliag ngamin i pinaratu nga magagal ta ngagan na Yafu” nga Jehova. (Kingngua 2:21) Ngem gigginnan kari ni Jehova i ngamin nga pakimallo? Egga paga kari i mawag nga kuattam tapenu tabbaganna i pakimallo tam ira?