Mboya—Nũũ Ũla Twaĩle Kũvoya?
SYO mboya syonthe iendaa vandũ vamwe, o na ethĩwa nũũ ũla ũkũneenwa nake? Ũmũnthĩ, andũ aingĩ nĩmasũanĩaa ũu. Woni ũsu ũkothaa kwĩthĩwa na ala mendete ngwatanĩo sya ndĩni na maasya ndĩni syonthe nĩ sya w’o, o na kau imanyĩasya maũndũ me kĩvathũkany’o. Nĩ ũndũ ũtonyeka woni ũsu ũkethĩwa ũte wa w’o?
Mbivilia ĩmanyĩasya kana andũ aingĩ mavoyaa ũla mataĩle kũvoya. Yĩla Mbivilia yaandĩkawa, andũ aingĩ nĩmavoyaa mĩvw’anano. Ĩndĩ Ngai nĩwamavatie vyũ kwĩka ũu. Kwa ngelekany’o, Savuli 115:4-6 yaĩtye ũũ ĩũlũ wa mĩvw’anano: “Yĩ na matũ, ĩndĩ ndĩw’aa.” Ũndũ ũsu wĩ ũtheinĩ. Ve vata mwaũ wa kũvoya ngai ĩtakesa ũkwĩw’a?
Ve ngewa ĩmwe yĩ Mbivilianĩ yumĩlĩtye ũndũ ũsu nesa. Ĩvinda yĩmwe mwathani Eliya nĩwakũlilye athani ma Mbaali mavoye ngai yoo, na ĩndĩ ĩtina wa ũu, Eliya nake aivoya Ngai wake. Eliya aisye kana Ngai ũla wa w’o nũkũsũngĩa na ũla wa ũvũngũ ndesũngĩa. Athani ma Mbaali nĩmeetĩkĩlile, na mavoya mũno na mawasya manene, ĩndĩ mboya syoo iyaaĩw’ĩka! Mbivilia yaĩtye: “Vatyaĩ . . . wa kũsũngĩa o na wĩva, kana ũla waaona ta ũndũ.” (1 Asumbĩ 18:29) Ĩndĩ kwaendie ata yĩla Eliya wavoyie?
Ĩtina wa Eliya kũvoya, Ngai amũsũngĩie o ndatĩkanĩ ĩsu; atũmie mwaki kuma ĩtunĩ wavĩvya ĩla nthembo Eliya waumĩtye. Kĩvathũkany’o kyaĩ kyaũ katĩ wa mboya isu syelĩ? Ve ũndũ ũmwe wa vata tũkwĩmanyĩsya mboyanĩ ĩsu ya Eliya ĩandĩkĩtwe ĩvukunĩ ya 1 Asumbĩ 18:36, 37. Yaĩ mboya nguvĩ mũno ya ndeto o ta 30 kĩthyomonĩ kya Kĩevelania. Ĩndĩ nthĩnĩ wa ndeto isu mbũthũ, Eliya atũmĩie ĩsyĩtwa ya Ngai, Yeova, mavinda atatũ.
Mbaali yaĩ ngai ya Akanaani, na ũalyũlo wa ĩsyĩtwa yĩu nĩ “mwene” kana “vwana.” Akanaani nĩmaseũvĩtye mĩvw’anano mingĩ yĩ kĩvathũkany’o ya Mbaali. Ĩndĩ Yeova nĩ ĩsyĩtwa ya mwanya, nũndũ ĩsyĩtwa yĩu nĩ yake e weka ĩũlũ wa nthĩ yonthe. Ngai ũsu eeie andũ make atĩĩ: “Ninyie Yeova, nĩyo syĩtwa yakwa; na ũnene wakwa ndikanenga ũngĩ.”—Isaia 42:8.
Yo mboya ya Eliya na mboya sya athani ma Mbaali syaendie o vandũ vamwe? Ũthaithi wa Mbaali waĩ na syĩthĩo syĩ nthoni sya ũmalwaya, na athaithi nĩmendekaa maumye nthembo sya andũ. Kĩvathũkany’o na ũu, Yeova endaa andũ make, Isilaeli, mamũthaithe kwa nzĩa yĩ na ndaĩa, na ndamovete na syĩthĩo isu syĩ nthoni sya athaithi ma Mbaali. Yu kwavindĩĩsya ũndũ ũũ: Ũkaandĩkĩa valũa mũnyanya mũna ũnengete ndaĩa mũno, we no wende valũa ũsu ũtwaĩwe mũndũ ũngĩ wĩ na mwĩkalĩle mũthũku vyũ, o na ũtathengeanĩe o na vanini na myolooto ĩla mũnyanyau ũatĩĩaa? Kwa w’o, ndwenda ũu wĩkĩke!
Mũtiani ũla Eliya weekĩthisye athani ma Mbaali nĩwaĩkĩĩthisye kana mboya syonthe iiendaa vandũ vamwe
Yĩla ũũvoya Yeova, wĩthĩawa ũivoya kũla kwĩ Mũmbi na Ĩthe wa andũ onthe. * Mwathani Isaia aisye ũũ mboyanĩ: “We, ame Yeova, wĩ Asa waitũ.” (Isaia 63:16) Ngai ũsu nĩwe Yesũ wawetaa yĩla weeie aatĩĩi make atĩĩ: “Nyie nĩngwambata kwa Asa wakwa na Asa wenyu, na kwa Ngai wakwa, na Ngai wenyu.” (Yoana 20:17) Yeova nĩ Ĩthe wa Yesũ. Nĩwe Ngai ũla Yesũ wavoyaa, na ũla Yesũ wamanyĩisye aatĩĩi make mavoyae.—Mathayo 6:9.
Yo Mbivilia nĩtwĩĩte tũvoye kũla kwĩ Yesũ, Meli, atheu, kana alaĩka? Aiee, ĩtwĩĩte tũmũvoye Yeova e weka. Vindĩĩsya itumi ilĩ. Kĩtumi kya mbee, mboya nĩ nzĩa ĩmwe ya kũthaitha, na Mbivilia yaĩtye kana Yeova no we e weka waĩle kũthaithwa. (Kuma 20:5) Kĩtumi kya kelĩ, Mbivilia yaĩtye kana nĩwe “ũla wĩw’aa mboya.” (Savuli 65:2) O na vala Yeova nĩwendete kũolela angĩ mawĩa, ndaanenga ũngĩ mwanya wa kwĩthukĩĩsya mboya. Nĩwe Ngai ũla ũtwathĩte kwĩthukĩĩsya mboya sitũ.
Kwoou ethĩwa nũkwenda mboya syaku syĩw’ĩke nĩ Ngai, lilikana ũtao ũũ wĩ Maandĩkonĩ: “Kĩla mũndũ wĩkaĩlaa ĩsyĩtwa ya Yeova akatangĩĩwa.” (Meko ma Atũmwa 2:21) Ĩndĩ we Yeova ethukĩĩasya mboya syonthe o na ethĩwa twĩvoya ata? Nĩvethĩwa ve ũndũ ũngĩ twaĩle kũmanya ethĩwa nĩtũkwenda Yeova ethukĩĩsye mboya sitũ?
^ kal. 9 Syĩthĩo imwe sya ndĩni syaasya kana ti ũseo kũweta ĩsyĩtwa ya Ngai, o na mboyanĩ. Ĩndĩ ĩsyĩtwa yĩu yĩandĩkĩtwe Mbivilianĩ mavinda ta 7,000 kwosana na ithyomo ila Mbivilia yaandĩkiwe nasyo, na kaingĩ yĩ mboyanĩ na mbathinĩ sya athũkũmi aĩkĩĩku ma Yeova.