Li tijok: Chiru ani tootijoq?
SAʼEBʼ li qakutan naabʼalebʼ nekeʼxkʼoxla naq maakʼaʼ naxye chiru ani tootijoq. Xbʼaan naq li Yos narabʼi chixjunil li tij. Naabʼalebʼ ajwiʼ nekeʼxye naq li Yos naxkʼulubʼa chixjunil li paabʼal, abʼan ma yaal aʼin?
Li Santil Hu naxye naq moko chixjunilebʼ ta nekeʼtijok chiru li Yos. Naq kitzʼiibʼamank li Santil Hu naabʼalebʼ nekeʼtijok chiru ebʼ li pechʼbʼil yos. Naabʼal sut kixye li Yos re li xtenamit naq inkʼaʼ teʼxbʼaanu aʼin. Saʼ Salmo 115:4-6, Li Santil Hu, Sociedad Bíblica de Guatemala, SBG, naxye naq ebʼ pechʼbʼil yos «wankebʼ xxik, ut inkʼaʼ nekeʼabʼink» yaal li naxye maakʼaʼ aj e naq tootijoq chiru junaq li yos li inkʼaʼ nokoorabʼi.
Qilaq kʼaru naru naqatzol rikʼin li eetalil aʼin: li propeet Elías kixyal rixebʼ li xpropeet laj Baal kixye rehebʼ naq teʼtijoq chiru li xyos ut naq laj Elías ttijoq chiru li Xyos ut li tsumenq chaq rehebʼ tixkʼutbʼesi naq aʼan li tzʼaqal Yos. Li xpropeet laj Baal keʼxkʼulubʼa aʼin ut keʼok chi tijok. Li Santil Hu naxye naq «maajun xyaabʼ kuxej kiʼabʼiik, maaʼani kisumenk chaq» (1 Reyes 18:29, SBG). Abʼan kʼaru kikʼulmank naq kitijok laj Elías?
Tojeʼaq kiraqeʼk chi tijok laj Elías naq li Yos kixtaqla chaq xxaml saʼ choxa re xkʼatbʼal li xmayej li propeet. Kʼaʼut naq li Yos kixsume li xtij laj Elías? Naqataw aʼin saʼ li tij li kixbʼaanu laj Elías saʼ 1 Reyes 18:36, 37. Kachʼin roq li xtij, kiroksi tana 30 li aatin saʼ hebreo ut oxibʼ sut kiroksi li xkʼabʼaʼ li Yos, Jehobʼa.
Ebʼ laj Canaán nekeʼxloqʼoni ru laj Baal li naraj xyeebʼal laj echal re ut jalan jalanq nekeʼxkʼabʼaʼi aʼ yaal bʼar wankebʼ. Abʼan Jehobʼa aʼan xkʼabʼaʼ li tzʼaqal Yos. Aʼan kixye: «Laaʼin li Jehobʼa. Aʼin linkʼabʼaʼ; ut re maaʼani chik ninkʼe linloqʼal chi moko linwankil» (Isaías 42:8, TNM).
Kʼaʼut kixsume li xtij laj Elías ut inkʼaʼ li xtij ebʼ li xpropeet laj Baal? Xbʼaan naq saʼ xloqʼoninkil ru laj Baal naʼokenk xmayejankil ebʼ li kristiʼaan ut xkʼayinkil ribʼebʼ chiru li xyos. Abʼan xloqʼoninkil ru li Jehobʼa nabʼaanumank saʼ xyaalal ut maaʼani namineʼk ru chi xbʼaanunkil junaq li yibʼru aj naʼlebʼ. Joʼkan naq li tij li nabʼaanumank chiru li Jehobʼa inkʼaʼ nawulak rikʼin laj Baal. Kʼoxla rix aʼin, wi taataqla junaq li esilhu choʼq re junaq laawamiiw tento naq twoksi li xkʼabʼaʼ abʼan wi jalan raj li kʼabʼaʼej taawoksi maajunwa raj twulaq li esilhu rikʼin laawamiiw.
Joʼ kixkʼut laj Elías moko chixjunil ta li tij nawulak chiru li Jehobʼa
Joʼkan bʼiʼ, wi yookat chi tijok chiru li Jehobʼa yookat chi tijok chiru laj Yobʼtesinel. * Li propeet Isaías kixye saʼ li xtij: «Laaʼat [Jehobʼa] li qanaʼ qayuwaʼ!» (Isaías 63:16, SBG). Li Jesús yook chi aatinak chirix li Jehobʼa naq kixye: «Taqeʼk we rikʼin linYuwaʼ ut eeYuwaʼ ajwiʼ laaʼex, rikʼin linYos ut eeYos ajwiʼ laaʼex» (Juan 20:17, SBG). Xbʼaan naq li Jehobʼa aʼan Xyuwaʼ li Jesús junelik kitijok chiru ut kixye rehebʼ li xtzolom naq tento teʼtijoq chiru li Jehobʼa (Mateo 6:9).
Li Santil Hu inkʼaʼ naxye naq tootijoq chiru li Jesús, li xMaría, ebʼ li saant malaj ebʼ li ánjel kaʼajwiʼ bʼan chiru li Jehobʼa. Qilaq wiibʼ xyaalal: xbʼeen, li tijok aʼan xloqʼoninkil ru li Jehobʼa ut li Santil Hu naxye naq kaʼajwiʼ aʼan tqaloqʼoni ru (Éxodo 20:5). Xkabʼ, xbʼaan naq aʼan narabʼi «li qatij» (Salmo 65:3, SBG). Usta li Jehobʼa naxkʼe naabʼal li kʼanjel re jalan chik abʼan wank jun li inkʼaʼ naxkʼe: aʼan rabʼinkil li qatij.
Joʼkan naq kaʼajwiʼ chiru li Jehobʼa tento tootijoq. Li Santil Hu naxye: «Chixjunilebʼ li teʼyaabʼanq re xkʼabʼaʼ li Qaawaʼ teʼkoleʼq» (Hechos 2:21, SBG). Ma naraj xyeebʼal naq narabʼi chixjunil li tij malaj wank kʼaru chik naʼajmank?
^ párr. 9 Wankebʼ li paabʼal nekeʼxye naq moko us ta roksinkil li xkʼabʼaʼ li Yos chi moko naq yooqebʼ chi tijok. Naq kitzʼiibʼamank chaq li Santil Hu natawmank li xkʼabʼaʼ li Jehobʼa numenaq wuqubʼ mil sut. Jun eetalil, natawmank li xkʼabʼaʼ saʼebʼ li tij ut li Salmo rehebʼ laj kʼanjel chiru.