2 Nani Beto Fwete?
Samba
2 Nani Beto Fwete?
KETI bisambu yonso kekwendaka kisika mosi, kukonda kutadila nani beto kesamba? Na nsi-ntoto ya bubu yai, bantu mingi ketubaka nde yo kele kyeleka. Dibanza yai kesepedisaka bantu mingi yina kezolaka kuvukisa lusambu mpi kezolaka nde Nzambi kundima mabundu yonso, kukonda kutadila mambu ya keswaswanisaka bo. Kansi, keti dibanza yai lenda vanda ya luvunu?
Biblia kelongaka nde mbala mingi bantu kesambaka ve muntu ya mefwana. Ntama, ntangu bo sonikaka Biblia, mbala mingi bantu vandaka kusamba biteki. Kansi, Nzambi kukebisaka bo mbala na mbala sambu na kikalulu yina. Mu mbandu, Nkunga 115:4-6 ketuba sambu na biteki nde: “Bo ke na makutu kansi bo ke waka ve.” Dibanza ya verse yai kele pwelele. Sambu na nki kusamba nzambi yina tawaka ve ata fyoti bisambu na nge?
Disolo mosi ya pwelele ya Biblia kemonisa mpenza dibanza yai. Profete ya kyeleka Elia kutudilaka baprofete ya Baale ntembe nde bo samba nzambi na bo, na nima Elia mpi zolaka kusamba Nzambi na yandi. Elia kutubaka nde Nzambi ya kyeleka zolaka kupesa mvutu kansi nzambi ya luvunu zolaka kupesa ve mvutu. Baprofete ya Baale kundimaka ntembe yina, ebuna bo sambaka mingi kibeni, mpi nkutu kubokaka ngolo. Kansi, kima kusalamaka ve! Disolo ketuba nde: “Bo zwaka kima ve, ata mvutu ve ata ndinga ve.” (1 Bantotila 18:29) Kansi, nki kusalamaka ntangu Elia kusambaka?
Ntangu Elia kusambaka, Nzambi na yandi kupesaka mvutu mbala mosi na kutindaka tiya sambu na kuyoka makabu yina Elia kutambikaka. Luswaswanu kuvandaka na wapi? Kima ya mfunu ya kesadisa na kuzwa mvutu kele na kisambu yina kele na 1 Bantotila 18:36, 37, yina Elia kusalaka. Yo vandaka kisambu mosi ya nkufi mpenza: kiteso ya bangogo 30 mpamba na Kiebreo ya kisina. Ata mpidina, na mwa bangogo yina fyoti, Elia kubingaka Nzambi mbala tatu na zina na yandi, Yehowa.
Baale, ya ketendula “munkwa” to “mfumu,” kuvandaka nzambi ya bantu ya Kanana, mpi bo vandaka kumonisa nzambi yai na mitindu mingi ya kuswaswana. Kansi, Yehowa kele zina na yandi mosi. Zina yango kele kaka ya Muntu mosi na luyalanganu ya mvimba. Nzambi yai kusongaka bantu na yandi nde: ‘Mono kele [Yehowa, NW], yo yina zina na mono! Lukumu na mono, mono ta pesa yo ve na nzambi ya nkaka!’—Yezaya 42:8.
Keti bisambu ya Elia mpi bisambu ya baprofete yina ya Baale kukwendaka kisika mosi? Lusambu ya Baale vandaka kubebisa lukumu ya bantu ti binkulu na yo ya kindumba mpi nkutu ya kupesa bimenga ya bantu. Kansi, lusambu ya Yehowa vandaka kupesa bantu ya Yehowa, Izraele, lukumu na kukatulaka bo na kimpika ya bikalulu ya mbi ya mutindu yina. Yo yina, yindula dyambu yai: Kana nge mesonika mukanda na nduku na nge mosi ya bantu kezitisaka mingi, keti nge tavingila nde bo pesa mukanda yina na muntu yina kele ve ti zina ya nduku na nge mpi yina lukumu na yandi ya mbi meswaswana ti mambu yonso yina nduku na nge kemonaka nde yo kele ya mbote? Ata fyoti ve!
Kana nge kesamba Yehowa, na kutuba ya kyeleka nge ke na kusamba Ngangi, Tata ya bantu yonso. * Profete Yezaya kutubaka na kisambu mosi nde: “Si tata na beto kele nge [Yehowa, NW]!” (Yezaya 63:16) Yandi kele Muntu yina Yezu Kristu kutubilaka ntangu yandi songaka balongoki na yandi nde: “Mono ke tombuka na Tata na mono, yina kele mpi Tata na beno; . . . na Nzambi na mono, yina kele mpi Nzambi na beno.” (Yoane 20:17) Yehowa kele Tata ya Yezu. Yandi kele Nzambi yina Yezu kusambaka mpi yina Yezu kulongaka balongoki na yandi na kusamba.—Matayo 6:9.
Keti Biblia kelongaka beto na kusamba Yezu, Maria, bansatu, to bawanzyo? Ve, beto fwete samba kaka Yehowa. Beto tadila bikuma zole. Ya ntete, kisambu kele mutindu mosi ya lusambu, mpi Biblia ketuba nde lusambu fwete kwenda kaka na Yehowa. (Kubasika 20:5) Ya zole, Biblia kemonisa nde yandi “ke ndimaka bisambu ya bantu.” (Nkunga 65:3) Ata Yehowa kepesaka bantu yankaka mikumba na zola yonso, yandi mepesaka ve ata fyoti mukumba yai na muntu yankaka. Yandi kele Nzambi yina mesilaka na kuwa bisambu ya konso muntu na kati na beto.
Yo yina, kana nge kezola nde Nzambi kuwa bisambu na nge, yibuka ndongisila yai ya Masonuku: “Konso muntu yina ta samba mono Mfumu Nzambi, yandi ta guluka.” (Bisalu 2:21) Kansi, keti Yehowa kewaka bisambu yonso kukonda kulomba nde beto sala ata kima? To keti kele ti kima yankaka ya beto fwete zaba kana beto kezola nde Yehowa kuwa bisambu na beto?
[Noti na Nsi ya Lutiti]
^ par. 9 Binkulu yankaka ya mabundu ketubaka nde yo kele mbi na kutanga zina ya Nzambi, ata nkutu na kisambu. Kansi, zina yai kemonana bambala kiteso ya 7 000 na bandinga ya kisina ya Biblia, mpi mbala mingi yo kemonanaka na bisambu mpi na bankunga ya bansadi ya kwikama ya Yehowa.
[Kifwanisu ya kele na lutiti 5]
Ntembe yina Elia kutudilaka baprofete ya Baale kumonisaka nde bisambu yonso kekwendaka ve kisika mosi