КІЗІЛЕР аймах-пасха нимелерге пазырчалар. Прай ол пазырыстарны кем-де исче бе? Амғы тустағы кізілер исче тіп сағынчалар. Прай аймах-пасха религиялар чахсы тіп санапчатхан кізілернің кӧңніне андағ сағыс улам кірче. Че андағ сағыс саба сағыс, арса?

Библия хоостыра, прайзы сын Худайға пазырбинча. Библия пазылған тустарда кізілер кирткен нимелерге пазырҷаңнар. Худай оларға андағ ниме итпеске нинҷе-нинҷе хати чоохтаан. Кӧріңер, Псалом 115:4—6-да идоллардаңар ниме чоохталча: «Оларның хулахтары пар, че олар испинчелер». Сірерні хаҷан даа испес худайға пазырарға кирек пе?

Библияда пу сурыға уғаа кӧп хайығ салылча. Кӧзідімге, сын Худайның ухаанҷызы Илья Ваалның ухаанҷыларын марыға хығырған. Оларға постарының худайына пазырарға чоохтаан, олар пазырған соонда Илья позымның Худайыма пазырам теен. Сын Худай нандырар, чой худай, тізең, нандырбас теен. Ваалның ухаанҷылары ӱр, тың аахтап пазырғаннар, че тик ле! Библияда чоохталча: «Че пірдеезі... нандырбаан, ӱндеспеен» (1 Царей 18:29). Илья пазырғанда чи, ниме пол парған?

Худай сах андох нандырған: тигірдең тӱскен от тайыға салған малны ӧртебіскен. Ноға Ильяның пазырызын Худай ис салған, Ваалның ухаанҷыларын, тізең, пірдеезі испеен. 1 Царей 18:36, 37-де пазыл парған Ильяның пазырызында пір аарлығ ниме пар. Аның пазырызы уғаа хысхаҷах полған — пурунғы еврей тілінде 30-ча ла сӧс. Андағ даа хысхаҷах пазырыста Илья ӱс хати Худайның адын, Иегованы, адаан.

Ваал «ээзі» алай «хан-пиг» тіп тілбестелче. Ол Ханаан чонының худайы полған. Полған на орында постарының Ваалына пазырҷаңнар. Че Тилекейде Иегова тіп аттығ пір ле личность. Иегова Худай позының чонына теен: «Мин Иеговазым. Пу минің адым. Мин позымның сабланызымны пірдеезіне пирбеспін» (Исаия 42:8).

Ваалға пазырғаны храмдағы проституциянаң паза кізілерні тайыға салғанынаң палғалыстығ полған. Анзы кізілерні ардатчаң. Иеговаа пазырғаны, тізең, Израиль чонын кӧдірген паза ол чиркестіг кибірлерге пастырарға пирбеен. Сағын кӧріңер: улуғлапчатхан нанҷыңарға пічік ызарға итсер, пасха аттығ, чиркестіг киректер итчеткен кізінің адрезін пазарҷыхсар ба? Чох.

Иеговаа пазырчатсар, сірер Чайаачызар, прай чонның Пабазынзар айланчазар *. Исаий ухаанҷы, пазырчатханда, чоохтаан: «Син, Иегова, пістің Пабабыссың» (Исаия 63:16). Сах ол Пабадаңар Иисус Христос позының ӱгренҷілеріне піди чоохтаан: «Мин Пабамзар паза Пабаңарзар, Худайымзар паза Худайыңарзар ӧӧрлеп парирбын» (Иоанн 20:17). Иисустың Пабазы — Иегова. Пазырыста Иисус андар айланған паза позының ӱгренҷілерін ағаа пазырарға ӱгреткен (Матфей 6:9).

Иисусха, Марияа, ах-арығларға алай ангеллерге пазырарға Библия чаратча ба? Чох, Иеговаа ла пазырарға кирек. Пу сурығны ікі саринаң кӧрібізеелер. Пастағызын, пазырыс — Худайға пазырғанының чардығы. Библия, тізең, Иеговаа ла пазырарға кирек тіпче (Исход 20:5). Ікінҷізін, Библия Худайны «пазырыстарны исчеткен Худай» тіп титулнаң адапча (Псалом 65:2). Худай позының ӱлгӱзінең пасхаларынаң ӱлесчетсе дее, пазырыстарны позы ла исче. Ол пістің пазырыстарыбысты истерге сӧс пирче.

Худай сірернің пазырыстарыңны иссін тіп хынчатсар, Библияда пазылған пу устағны ундутпасха кирек: «Хан Худайны адынаң адап хығырған кізінің полғаны ла арачылан халар» (Илҷілернің 2:21). Че Иегова прай пазырыстарны исче бе? Алай, Иегова пістің пазырыстарыбысты иссін тіп хынчатсабыс, паза пірее ниме пілерге кирек пе?