MBWINO emisabe yosi yikaya haghuma, abandu nomubangabya ibakasaba ndi? Omwa kihugho munabwire, mughulhu mungyi ekyo kya bandu bakalengekanaya. Amalengekania ayo anzibirwe n’abandu abanzire eritswangania eby’emiramirye n’abanzire amadini wosi inialiwa nomwabine indi syali lighirana. Aliwe mbwino amalengekania syangabya iniawire?

E Biblia yikakangiriraya ngoku emasabe y’abangyi siyirighendera oyutholere. Kera e Biblia yikahandikwa, kyabya kya buli kiro abandu erisaba esyosanamu. Nomwabine, Nyamuhanga iniakabya inianemukunga abandu busana n’omutse oyo. Ng’eky’erileberyako, Esyonyimbo 115:4-6 hakakanaya okwa syosanamu hathi: “Siwithe amathwe, nikwa sisyethoka eriowa.” Enzumwa yilhangirikire. Busana naki iwasaba enyamuhanga eyithe yanga kwowa?

Owundi mwatsi we Biblia akakanaya buuli okwa nzumwa eyi. Omuminyereri w’okwenene ya Eliya mwabwira abaminyereri ba Baali athi basabe enyamuhanga wabu, enyuma waho nayu angasabire owiwe. Eliya mwabugha athi Nyamuhanga w’okwenene angasubirye n’ow’amabehi iniaghana erisubirya. Abaminyereri ba Baali mubaligha erikolha ekyo, mubasaba habw’obuthuku buuli kandi kutsibu, nibya n’erilira omwa mirenge miri​—aliwe mubahathabyaki! Omwatsi oyo akabugha athi: “Sihabya omulenge kutse oyukasubiraya, kutse oyukatsomana.” (1 Abami 18:29) Aliwe mubyabya bithi Eliya akasaba?

Eliya abere abirisaba, Nyamuhanga wiwe mwasubirya aho n’aho, mwathuma omuliro erilhua elhubulha erihisirirya obuhere bwa Eliya. Embaghane yabya yahi? Hali kindu kighumae kikulhu omwa musabe wa Eliya iwuwene-wene owali omwa 1 Abami 18:36, 37. Ni musabe mukuhi​—ow’ebinywe nga 30 bisa omwa Kihebrania kya kera. Nomwabine, omwa binywe bike ebyo, mirundi isathu Eliya mwakolesya erina lya Nyamuhanga, Yehova.

Baali, kikamanyisaya “omwinye” kutse “mukama,” abya nyamuhanga w’Abanya Kanana, kandi babya ibanawithe n’ehindi hinyamuhanga hingyi hy’esanamu eyo. Aliwe, Yehova ni rina ly’embaghane, erihambire oku Nyamuhanga mughuma musa omwa buhangwa bwosi. Nyamuhanga oyu mwabwira abandu biwe athi: “N’ingye Yehova. Eryo ly’erina lyaghe; sihali wundi oyo ngaha olhukengerwa lhwaghe.”​—Isaya 42:8, NWT.

Mbwino omusabe wa Eliya n’ey’abaminyereri ba Baali muyanaghenda haghuma? Eriramya lya Baali irikaghunza omwa bandu mw’ekitsumbi omw’ikolha eby’obusingiri n’erihonga abandu. Mbaghane n’ekyo, Yehova mwabwira abandu biwe, Abaisraeli athi, ibamuramya omwa nzira eyikaha ekitsumbi, eyikabayira bwiranda okwa mibere mibi eyo. Neryo thakilengekaniako: Wamabya iwukathumira munywani wawu mulebe oyusikibwe kutsibu y’ebaruha, iwunemwendianza yighendere omundu oyuwithe erina eriri mbaghane kandi oyuwithe emibere eyithasosene n’eya munywani wawu? Eyihi na hake!

Wamasaba Yehova, iwamasaba Omuhangiki, Thatha w’abandu bosi. * Omwa musabe wiwe, omuminyereri Isaya mwabugha athi: “Wuli Thatha wethu.” (Isaya 63:16) Kwesi, oyu yan’oyo oyo Yesu Kristo akanayako akabwira abigha biwe athi: “Ngahethukira oku Thatha waghe, na Thatha wenyu.” (Yoane 20:17) Yehova ni Thatha wa Yesu. Ya Nyamuhanga oyo Yesu asaba kandi oyo abwira abigha biwe athi ibasaba.​—Matayo 6:9.

Mbwino e Biblia yikanathukangiriraya yithi ithwasaba Yesu, Maria, ababuyirire, kutse abamalaika? Eyihi​—thutholere ithwasaba Yehova musa. Thalengekania okwa syonzumwa ibiri esikaleka. Ey’erimbere, omusabe ni mulingo w’eriramya, kandi e Biblia yikathubwira yithi thutholere ithwaramya Yehova musa. (Eriluayo 20:5) Eyakabiri, e Biblia yikathubwira yithi yuwithe ehamuli ‘y’erisubirya erisaba.’ (Esyonyimbo 65:2) Nomwakine indi Yehova akanaha abandi b’esyongwamirwa nyingyi, syali athaha olhukwamirwa olhu lhw’owundi mundu wosi-wosi. Ni Nyamuhanga oyukayilhagha erihulikirira emisabe yethu iyuwene-wene.

Neryo wamabya wanzire Nyamuhanga iniahulikirira emisabe yawu, ambi iw’ibuka erihabulha ly’Amasako lino: “Obuli mundu oyukalhakira oko lina ly’Omwami Mukulhu asyalhamibwa.” (Emibiri 2:21) Aliwe, mbwino Yehova akahulikirira emisabe yosi ahathe eby’erighenderako? Kutse hane ekyosi-kyosi ekya thukayithagha eriminya thwamabya thwanzire Yehova owe emisabe yethu?