Prea—Udat Wi Fɔ Pre To?
NA ƆL prea dɛn Gɔd de lisin to, ilɛk uskayn nem ɔ gɔd pipul dɛn pre to? Insay di wɔl we wi de tide, na so bɔku pipul dɛn de tink. Bɔku pan di pipul dɛn we de tink dis we na pipul dɛn we de wɔship na difrɛn rilijɔn dɛn, ɛn we want mek pipul dɛn gri wit ɔl rilijɔn pan ɔl we di tin dɛn we dɛn de tich ɛn biliv difrɛn. Yu tink se dis aydia kɔrɛkt?
Di Baybul tich se bɔku pipul dɛn nɔ de pre to di rayt pɔsin. Insay di tɛm we dɛn bin de rayt di Baybul, i bin kɔmɔn fɔ lɛ pipul dɛn pre to imej dɛn we dɛn mek. Bɔt Gɔd bin de wɔn dɛn ɔltɛm fɔ lɛf fɔ du dat. Fɔ ɛgzampul, Sam 115:4-6 tɔk bɔt di aydɔl dɛn se: “Dɛn gi dɛn yes, bɔt dɛn nɔ de yɛri.” Di pɔynt i klia. Yu tink se i mek sɛns fɔ pre to gɔd we nɔ de yɛri yu?
Wan fayn Baybul akawnt tɔk mɔ bɔt dis pɔynt. Di tru prɔfɛt we na Ilayja bin chalenj Beal in prɔfɛt dɛn. I bin tɛl dɛn fɔ pre to dɛn gɔd, ɛn afta dat i go pre to in yon Gɔd. Ilayja bin se di tru Gɔd go ansa ɛn di lay lay Gɔd nɔ go ansa. Beal in prɔfɛt dɛn bin gri, dɛn bin pre fɔ lɔng tɛm, dɛn bin ivin de kray lawd lawd wan bɔt dɛn nɔ bin gɛt ansa. Di akawnt tɔk se: “Nɔbɔdi nɔ ansa; nɔbɔdi nɔ bin de pe atɛnshɔn.” (1 Kiŋ 18:29, NWT) Bɔt wetin bin apin we Ilayja pre?
Afta we Ilayja bin pre, in Gɔd bin ansa am wantɛm wantɛm, i bin sɛn faya frɔm ɛvin ɛn bɔn Ilayja in sakrifays. Aw dɛn prea bin difrɛn? Di akawnt na Fɔs Kiŋ 18:36, 37, tɔk bɔt wan impɔtant tin bɔt Ilayja in prea. In prea bin rili shɔt, na jɔs 30 wɔd dɛn insay di orijinal Ibru. Bɔt insay da shɔt prea de, Ilayja bin kɔl Gɔd in pasɔnal nem, Jiova, tri tɛm.
Beal we min “masta” na bin di Kenanayt dɛn gɔd ɛn dɛn bin gɛt bɔku difrɛn kayn imej dɛn we bin tinap fɔ dis gɔd. Bɔt Jiova in nem spɛshal, na in wangren gɛt da nem de na di wan ol wɔl. Dis Gɔd bin tɛl in pipul dɛn se: “Mi na Jiova. Na dat na mi nem; a nɔ de gi mi glori to ɛnibɔdi.”—Ayzaya 42:8, NWT.
Yu tink se Ilayja in prea ɛn Beal in prɔfɛt dɛn prea go na di sem ples? Di wan dɛn we bin de wɔship Beal bin de mek dɛn sɛrimɔni to difrɛn gɔd dɛn ɛn dɛn bin de ivin sakrifays mɔtalman. Bɔt Jiova bin tɛl in pipul dɛn we na di Izrɛlayt dɛn fɔ wɔship am di kayn we we de sho se dɛn ɔnɔ am. So tink bɔt am: If yu de rayt lɛta to wan yu patikyula padi we yu rili rɛspɛkt, yu go ɛkspɛkt fɔ lɛ dɛn go gi di lɛta to pɔsin we nɔ gɛt yu padi in nem, ɛn we di bad tin dɛn we pipul dɛn no bɔt am rili difrɛn frɔm wetin yu padi tink se impɔtant? Nɔ, yu nɔ go du dat!
Di chalenj we Ilayja bin chalenj Beal in prɔfɛt dɛn sho se ɔl prea nɔ de go na di sem ples
If yu pre to Jiova, yu de pre to di Wan we mek wi, di Papa fɔ ɔl mɔtalman. * Di prɔfɛt Ayzaya bin tɔk na in prea se: “Yu, O Jiova, na wi Papa.” (Ayzaya 63:16, NWT.) Na in na di Wan we Jizɔs Krays bin tɔk bɔt we I bin tɛl in disaypul dɛn se: “A de go ɔp to mi Papa ɛn una Papa ɛn to mi Gɔd ɛn una Gɔd.” (Jɔn 20:17) Jiova na Jizɔs in Papa. Na in na di Gɔd we Jizɔs bin de pre to, ɛn na in na di Gɔd we Jizɔs bin tich in disaypul dɛn fɔ pre to.—Matyu 6:9.
Yu tink se di Baybul tɛl wi fɔ pre to Jizɔs, to Meri, to sent dɛn, ɔ to enjɛl dɛn? Nɔ, na to Jiova nɔmɔ. Lɛ wi tɔk bɔt tu rizin dɛn we mek na to Jiova nɔmɔ wi fɔ pre to. Fɔs, prea na wan we fɔ wɔship, ɛn di Baybul se na Jiova in wangren wi fɔ wɔship. (Ɛksodɔs 20:5) Sɛkɔn, di Baybul sho se na in nɔmɔ gɛt di taytul, “di Wan we de yɛri prea.” (Sam 65:2, NWT) Pan ɔl we Jiova de gi wok to ɔda pipul dɛn, dis na wok we i nɔ ɛva gi to ɔda pɔsin. In na di Gɔd we dɔn prɔmis fɔ yɛri wi prea dɛn.
So if yu want fɔ mek Gɔd yɛri yu prea, mɛmba dis skripchɔ in advays we se: “Ɛnibɔdi we de kɔl Jiova in nem go sev.” (Akt 2:21) Bɔt yu tink se Jiova de yɛri ɔlkayn prea ilɛk aw pɔsin pre to am? Ɔ yu tink se ɛni ɔda tin de we wi nid fɔ no if wi want mek Jiova yɛri wi prea?
^ par. 9 Sɔm rilijɔn dɛn biliv se i rɔŋ fɔ kɔl Gɔd in nem ivin we wi de pre. Bɔt da nem de, de lɛk 7,000 tɛm insay di Baybul in orijinal langwej, ɛn bɔku tɛm na insay Jiova in fetful savant dɛn prea dɛn ɛn di sam dɛn we dɛn rayt.