2

 Ki ku Mañi ko lu Swanela ku Lapela?

KANA Mulimu wa utwa litapelo kaufela? Mwa lifasi la kacenu, batu hañata ba nga kuli Mulimu wa utwa litapelo kaufela. Taba yeo i ngiwa ku ba ya niti kwa batu ba bañata ba ba yemela tumelo ya mazwake ili ba ba bata kuli bulapeli kaufela bu amuhelwe ki Mulimu, ku si na taba ni kuli bwa shutana. Kono kana kwa konahala ku bulela kuli muhupulo wo haki wa niti?

Bibele i luta kuli hañata batu ha ba lapelangi ku Mulimu wa niti. Mwa miteñi ye ne i ñolwa Bibele, batu hañata ne ba lapelanga maswaniso a betilwe. Niteñi, Mulimu na kuta-kutezi ku ba lemusa ka za kezo yeo. Ka mutala, Samu 115:4-6 i bulela cwana ka za milimu ya maswaniso: “A na ni lizebe, bo haa utwi.” Taba ye ki ya niti luli. Ki butoto luli ku lapela ku mulimu ya sa koni ku mi utwa!

Likande la Bibele le li utwahala hande li bulela ze ñata ka za taba ye. Mupolofita wa niti Elia na shemaetile bapolofita ba Baale kuli ba lapele ku mulimu wa bona, mi hamulaho Elia ni yena na ka lapela ku Mulimu wa hae. Elia na bulezi kuli Mulimu wa niti na ka alaba mi mulimu wa buhata na si ke a alaba. Bapolofita ba Baale ne ba lumezi ku eza cwalo, mi ba lapela ka taata ili ka nako ye telele, mane ba bokolola, kono ne ba si ka alabiwa! Likande leo li li: “Kono ha ku si ka utwahala linzwi, ne ku si na ya alaba; ne ku si na ya ba teeleza.” (1 Malena 18:29) Kono ne ku ezaheziñi Elia ha na lapezi?

Elia ha sa lapezi, Mulimu wa hae a alaba tapelo ya hae honafo feela, a luma mulilo ku zwa kwa lihalimu ni ku to cisa sitabelo sa na lukisize Elia. Tapelo ya Elia ne i shutana cwañi ni litapelo za bapolofita ba Baale? Ku na ni nto i liñwi ya butokwa mwa tapelo ya Elia ye kwa 1 Malena 18:36, 37. Tapelo ya hae ki ye kuswani hahulu—i na ni feela manzwi a batoo ba 30 mwa puo ya Siheberu sa kwa makalelo. Kono mwa manzwi a makuswani ao, Elia na bizize Mulimu ka libizo la hae, lona la Jehova.

Baale, ili linzwi le li talusa “muñi” kamba “mulena,” ne li mulimu wa Makanana, mi ne ku na ni milimu ye miñwi ye miñata ya Baale. Nihakulicwalo, libizo la Jehova ki la hae feela a nosi, ki yena feela a nosi ya na ni libizo leo mwa pupo kaufela. Mulimu yo na bulelezi batu ba hae kuli: “Ki Na [Jehova, NW], ki lona Libizo la ka: Ha ni na ku fa yo muñwi kanya ya ka.”—Isaya 42:8.

Kana tapelo ya Elia ni litapelo za bapolofita ba Baale ne li alabilwe ku si na taba ni kuli ne li libisizwe kwa milimu ye shutana? Ku lapela Baale ne ku tahiseza batu ku eza buhule mane ni ku eza batu matabelo a ku cisa. Kono Jehova na laezi batu ba hae, Maisilaele, kuli ba mu lapele ka nzila ye kutekeha hahulu, ili ku ba lukulula kwa likezo ze swabisa zeo. Mu nahane taba ye: Haiba mu ñolezi mulikanaa mina ya kutekeha hahulu liñolo, kana ne mu ka libelela kuli liñolo leo li iswe ku mutu u sili ya zibahala ka mikwa ye maswe ye shutana ni ya mulikanaa mina? Batili!

 Ha mu lapela ku Jehova, mu lapela ku Mubupi, ili Ndate wa batu kaufela. * Mupolofita Isaya na lapezi kuli: “Wena, [Jehova], ki Wena ndataa luna.” (Isaya 63:16) Kacwalo, yo luli ki yena yo Jesu Kreste na bulezi ka za hae ha na bulelezi balateleli ba hae kuli: “Ni sa kambamela ku ndate, Yena Ndataa mina; ku Mulimu wa ka, Yena Mulimu wa mina.” (Joani 20:17) Jehova ki ndatahe Jesu. Jesu na lapezi ku yena Mulimu yo mi na lutile balateleli ba hae ku lapela ku Mulimu ya swana.—Mateu 6:9.

Kana Bibele i lu laela ku lapela ku Jesu, ku Maria, kwa bahalalehi, kamba kwa mangeloi? Batili—i lu laela ku lapela feela ku Jehova. Mu nyakisise mabaka a mabeli ha lu swanela ku lapela feela ku Jehova. Libaka la pili ki la kuli tapelo ki nzila ye ñwi ya ku lapela, mi Bibele i bulela kuli lu swanela ku lapela feela Jehova. (Exoda 20:5) Libaka la bubeli ki la kuli Bibele i patulula kuli u bizwa kuli ki yena “ya utwa milapelo.” (Samu 65:2) Nihaike kuli Jehova u fanga buikalabelo bo buñata ku ba bañwi, buikalabelo bwa ku utwa milapelo ha si ka bu fa ku ufi kamba ufi. Ki Mulimu ya lu sepisa kuli yena muñi u ka utwa litapelo za luna.

Kacwalo haiba mu bata kuli Mulimu a utwe litapelo za mina, mu hupule kelezo ye ya mwa Mañolo: “Mutu ni mutu ya ka lapela Libizo la [Jehova] u ka piliswa.” (Joele 2:32) Kono kana Jehova u alabanga litapelo kaufela a sa libeleli ku ezezwa nto ye ñwi? Kamba kana ku na ni lika ze ñwi ze lu tokwa ku ziba haiba lu bata kuli Jehova a utwe litapelo za luna?

[Litaluso za kwatasi]

[Siswaniso se si fa likepe 5]

Shemaeto ya Elia kwa bapolofita ba Baale ne i bonisize kuli haki litapelo kaufela ze alabiwanga