Milombelo

2 Kudi Ani?

LELO milombelo yonso yendanga kumo, nansha ulomba’yo kudi ani? Mu ntanda ya dyalelo, bavule balañanga uno muswelo. Uno mwanda usangajanga bavule basenswe kulombela pamo na ba bipwilo bikwabo ne basaka kwitabijibwa kwa bipwilo byonso, nansha byo bidi bishile. Ino, lelo uno mulangwe ubwanya kwikala wa bubela?

Bible ufundija’mba milombelo mivule, keyendangapo kwine koifwaninwe. Tamba kitatyi kyāsonekelwe Bible, kwādi kisela kya bantu kulombela bankishi basongwe. Ino, Leza wādyumwine kitatyi ne kitatyi kino kilongwa. Kimfwa, Mitōto 115:4-6 wisambila pa bankishi batōtwa’mba: “Badi ne matwi, ino kwivwana nao mpika.” Mwanda udi’tu patōka. Lelo i kika kine kyolombela kudi leza kakakwivwanapo nansha dimo?

Nsekununi imo ya mu Bible inena bivule pa uno mwanda. Mupolofeto wa bine Ediya wānene bapolofeto ba Bala balombele kudi leza wabo, kupwa Ediya nandi kalombela kudi wandi Leza. Ediya wānene amba Leza wa bine ukalondolola ino wa bubela kakalondololapo. Abo pa kwitabija uno mwanda, bapolofeto ba Bala bekwata’ko na kulombela kitatyi kilampe, badila ne kuyoyokota—ino bya bitupu! Tutanga ino nsekununi amba: “Kekwadipo diwi nansha kulondololwa, nansha umo wa kubangapo mwine.” (1 Balopwe 18:29) Ino, le pālombele Ediya napo le?

Ediya pa kupwa kulombela, Leza wandi wāmulondolola ponka na ponka, wātuma mudilo utamba mūlu wāsōka kitapwa kya Ediya. Le i kwishila’ka kwādi’po? Kudi kintu kikatampe mu lulombelo lwa Ediya, lulembelwe mu 1 Balopwe 18:36, 37. I lulombelo lwīpi—ludi na bishima kintu kya 30 kete mu Kihebelu kibajinjibajinji. Ino, mu ino milongo mityetye, Ediya wātelele’mo Leza pa dyandi dijina, Yehova misunsa isatu mituntulu.

Bala, ko kunena’mba “mwine” nansha “mfumwandi,” wādi leza wa Bene Kenani, kadi kwādi miswelo mingi ya kino kilezaleza. Ino Yehova, i dijina dya pa bula, dimutelelwa enka Aye kete mūlu ne pano panshi. Uno Leza wānene bantu bandi amba: “Ami ne Yehova, dyo dyami dijina; ino ntumbo yami nkikapana’yopo kudi mukwabo, ehe.”—Isaya 42:8.

Lelo milombelo ya Ediya ne ya bapolofeto ba Bala yāendele kumo? Butōtyi bwa Bala bwādi buzobeja bantu na bisela bya busekese ne kulambula bantu. Ino butōtyi bwa Yehova bwādi bupa bantu bandi Bene Isalela bulēme, bwibanyongolola ku bibidiji bityani. Penepa langa’po: Shi ubatume mukanda kudi mulunda nobe mulēmekibwe, le uketabija bape’o muntu ungi ne wa ngikadilo mityani ipatanya na yoya isenswe mulunda nobe? Nansha dimo!

 Shi ulombela kudi Yehova, nankyo ulombelanga kudi Umpangi, Shandya bantu bonso. * Mupolofeto Isaya wālombele amba: “Abewa a Yehova wi tata wetu.” (Isaya 63:16) Nanshi uno ye wānene Yesu kitatyi kyaālombwele balondi bandi amba: “Kakakanda kudi Shandi, kadi i wenu Shenu, kudi Leza wandi ne Leza wenu.” (Yoano 20:17) Yehova i Shandya Yesu. Yesu wādi ulombela kudi uno Leza ne kufundija balondi bandi bamulombe.—Mateo 6:9.

Le Bible witufundija tulombele kudi Yesu, kudi Madia, kudi basanto nansha kudi bamwikeulu? Mhm—poso enka kudi Yehova. Tala buno bubinga bubidi. Dibajinji, milombelo i kipindi kya mu butōtyi, kadi Bible unena’mba tufwaninwe kutōta enka Yehova kasuku kandi. (Divilu 20:5) Kya bubidi, Bible witusokwela’mba kitenta kyandi i Yewa “wivwananga kulombela.” (Mitōto 65:2) Nansha Yehova byapananga mingilo na mutyima tō, kino kiselwa kapele’kyo’po muntu nansha umo. Aye i Leza ulaile kwivwana milombelo yetu.

Nanshi shi usaka Leza evwane milombelo yobe, vuluka uno musoñanya wa mu Bisonekwa: “Bonso bakwita dijina dya Yehova abo bakapanda.” (Bilongwa 2:21) Ino le Yehova wivwananga milombelo yonso pampikwa kuleta kijila? Ne kadi, le kudi kintu kifwaninwe kuyuka pa kusaka’mba Yehova evwane milombelo yotumulomba?

[Kunshi kwa dyani]

[Kifwatulo pa paje 5]

Byānene Ediya kudi bapolofeto ba Bala bilombola’mba milombelo yonso keyendangapo kuntu kumo