Ṭawngṭaina

2 Tu Hnênah Nge?

ṬAWNGṬAINA zawng zawng chu tu hnêna hlan pawh ni se, a thlenna a inang vek em? Tûn lai khawvêlah hian a thlenna inang veka ngaih a ni fo ṭhîn. Chu rin dân chu rinpawlhna thiltih thlâwp a, sakhua zawng zawng chu a inang lo chung pawha pawm vek duhtute chuan an duh hle. Mahse, chu ngaih dân chu a dik lo thei ang em?

Bible chuan ṭawngṭaina tam tak chu a thlenna tûr dik tak hnêna hlan a nih loh thu min hrilh a. Bible ziak a nih lai chuan milim hmaa ṭawngṭai hmuh tûr an tam hle a ni. Mahse, Pathian chuan chutiang thiltih lakah chuan min vaukhân nawn fo va. Entîr nân, Sâm 115:4-6 chuan milemte chungchângah: “Bengte an nei a, an hre thei si lo va,” tiin a sawi a ni. A sawi tum chu a chiang hle mai. Engvângin nge i ṭawngṭaina hre thei ngai lo tûr hnênah chuan i ṭawngṭai ang?

Bible-a chanchin ziak nung tak pakhat chuan he mi chungchâng hi a tifiah lehzual a ni. Zâwlnei dik Elija chuan Baala zâwlneite chu an pathian hnêna ṭawngṭai tûrin a cho va, a hnuah amah pawhin a Pathian hnêna ṭawngṭai ve tûr thu a hrilh a. Pathian dik chuan a chhâng ang a, a dik lo erawh chuan a chhâng lo vang, tiin a sawi a ni. Chu chona chu pawmin Baala zâwlneite chu nasa tak leh au chhuak hialin an ṭawngṭai a; mahse, awmzia a nei si lo! Thuziak chuan: “Chhângtu tûr rêng rêng emaw, a lo ngaihsaktu rêng rêng emaw an awm bawk hek lo,” tiin a sawi a ni. (1 Lalte 18:29) A nih leh, Elija a ṭawngṭai ve chuan eng thil nge thleng?

Elija a han ṭawngṭai ve chuan, a Pathian chuan a thil hlan kâng fai tûra vân ata mei rawn tîrin, a chhâng nghâl a ni. Eng nge a danglamna? Lalte pakhatna 18:36, 37-a chhinchhiah Elija ṭawngṭainaah ngei hian a danglamna a lang a ni. * Chu ṭawngṭaina chu a tawi hle a, atîra Hebrai ziakah chuan thu mal 30 vêl chauh a ni a. Mahse, chu thu tawi tê-ah pawh Elija chuan Pathian hming bil Jehova chu vawi thum lai a lam a ni.

Baala chu Kanaan mite pathian a ni a, a awmzia chu “neitu” emaw, “pu” emaw tihna a ni; tualchhûng azirin baal pathian chi hrang hrang a awm a. Jehova tih hming erawh hi chu a danglam bîk a, lei leh vânah hian Mi pakhat tân chauhva hman a ni. He Pathian hian a mite hnênah: “LALPA [“Jehova,” NW] chu ka ni, chu chu ka hming a ni: Ka ropuina hi mi dang hnênah ka pe lo vang,” tiin a hrilh a ni.—Isaia 42:8.

Elija ṭawngṭaina leh Baal zâwlneite ṭawngṭaina chu a thlenna a inang em? Baal biakna chuan nawhchizawrh leh mihring hmanga inthâwina hmangin mite a dah hniam a. Pathian Jehova biakna erawh chuan a mi Israelte chu chutiang thil chîn dân ṭha lo tak aṭangin a chhuah zalên thung a ni. Han ngaihtuah teh: I ṭhian ngaihsân tak tuemaw hnêna i lehkha thawn chu i ṭhian hming ang pu pawh ni lo mi dang daih tuemaw hnênah a thleng ang em? Thleng hauh lo vang!

Pathian Jehova hnêna i ṭawngṭai chuan Siamtu, mihringte Pa hnênah i ṭawngṭai tihna a ni. * Zâwlnei Isaia chuan a ṭawngṭainaah: “Aw LALPA [“Jehova,” NW] kan Pa i ni a,” tiin a sawi a ni. (Isaia 63:16) Chuti chu, Isua’n a hnungzuitute hnêna: “Ka Pa, in Pa,  ka Pathian, in Pathian hnênah ka lâwn chho dâwn,” tia a hrilh chu A chungchâng ngei hi a ni. (Johana 20:17) Pathian Jehova chu Isua Pa a ni a. Ani chu Isua ṭawngṭaina leh a zirtîrte pawh ṭawngṭaina tûra a zirtîra chu a ni.—Matthaia 6:9.

A nih leh Bible chuan Isua te, Mari te, mi thianghlim te, a nih loh leh vântirhkohte hnêna ṭawngṭai tûrin min zirtîr em? Zirtîr lo ve—Jehova hnên chauhva ṭawngṭai tûrin min zirtîr zâwk a ni. A chhan i lo en ang u. A hmasain, ṭawngṭai hi Pathian chibai bûkna pêng pakhat a ni a; tin, Bible chuan chibai bûkna rêng rêng chu Pathian Jehova hnênah chauh hlan tûr a ni tih a sawi a ni. (Exodus 20:5) A pahnihnaah chuan, Bible chuan Pathianin “ṭawngṭaina ngaithlatu” tih hming a pu tih a târ lang a ni. (Sâm 65:2) Jehova chuan thil tam tak chu mi dangte hnênah hlân chhâwng mah se, ṭawngṭaina ngaithla tûr erawh chuan tu hnênah mah mawhphurhna a pe lo. Kan ṭawngṭainate amah ngeia ngaihthlâksak min tiamtu Pathian a ni.

Chuvângin, i ṭawngṭaina Pathianin a ngaihthlâksak che i duh chuan he Bible fuihna thu: “Tupawh LALPA hming lam apiang chu chhanhim an ni ang,” tih hi hre reng ang che. (Joela 2:32) Mahse, Pathian Jehova chuan ṭawngṭaina zawng zawng chu a pâwngpaw ngaithlâk vek em? Nge kan ṭawngṭaina a ngaihthlâk kan duh chuan thil dang engemaw kan hriat ngai a la awm zâwk? (w10-E 10/01)

[Footnote-te]