YO PADYA na punkjꞹ ntee manji ke zø naño kjo ra øtꞹji ma ri kjaji oración, ngeje e Diosi k’ꞹ ⱥrⱥ texe. Manji akjanu yo ntee ke kjijñiji ke texe yo religión na joji. Pe ¿kjo na kjuanayo?

O Jñaa e Yose mama ke na punkjꞹ ntee ma kjaji oración, dya nge nu Mizhokjimi kʼꞹ na kjuana kʼꞹ øtꞹji. Nrreze mi jingua ma o dyopjꞹji ne Biblia mi bʼꞹbʼꞹ trʼee ke mi øtꞹji kʼo tsʼita ke dya ga kjuana. Pe e Palesito ajensʼe ma yepe ma xipji o jñiñi ke dya ro tsjaji akjanu. Kja ne Salmo 115:4-6 mama ke yo tsʼita “pɇsʼiji o tso̱’o̱, pe dya søø ra dyⱥrⱥji”. Me na kjuana yo jñayo: ¿pjenga ra øtꞹji yo tsʼita ke dya søø ra dyⱥtkʼøji?

Ra pa̱ra̱ji na joo ma ra xørꞹji kʼo junsʼꞹ kja ne Biblia ke o kjogꞹ mi jingua. Ra nuji pje go kjogꞹ e profeta Elías ma go xipji kʼo mbøkjimi ke mi matrʼꞹji e Baal ro tsjaji na prueba ngekʼua ro ñetse kjo mi ngeje nu Mizhokjimi kʼꞹ na kjuana. E Elías ro dyøtꞹ o Mizhokjimi ñe angezeji ro dyøtꞹji e Baal, nu kʼꞹ ro nrrꞹrꞹ ro ñetse ke mi ngeje na Diosi ke na kjuana. Kʼo profeta e Baal o manji ke ja̱a̱ ro tsjaji akjanu ñe o mbꞹrꞹji o dyøtꞹji o tsʼita. Me mi matrʼꞹji na jensʼe, “pe dya kjo go ñaa ñe dya kjo go nrrꞹrꞹ; dya mi bʼꞹbʼꞹ kjo ro dyⱥrⱥ“ (1 Reyes 18:29). ¿Kjo xo bo kjogꞹ akjanu e Elías?

Iyo, na ngeje ma kja mi kjuarꞹ ma øtꞹ, e Diosi o pejñe sibi ajensʼe ñe o nrrɇɇ nu ofrenda ke o mbⱥspⱥ. ¿Ja ma naño kʼo bo kjogꞹ e Elias ñe kʼo mi matrʼꞹji e Baal? Nukʼo nge kʼo mama kja nu oración ke bo tsjaa e Elías ke junsʼꞹ kja 1 Reyes 18:36, 37. Zø dya o mezhe na punkjꞹ nu oración —ngextjo treinta jñaa ke bo mama kja o jñaa ke mi ngeje hebreo— e Elías o nⱥmbⱥ jñii vez o tju̱u̱ e Yose, ke ngeje: Jehová.

¿Ja ma ngeje ke dya mi chjenjui? Ra pɇsʼiji nguenrra ke Baal (nee ra mama ke ngeje na “jmuʼu”) mi ngeje nu tju̱u̱ o tsʼita kʼo mi menzumꞹ a Canaán, ñe nu trju̱u̱ nde naño ma xipjiji. Pe o trju̱u̱ e Jehová, natrjokʼꞹ ajensʼe ñe kja ne xoñijomꞹ. Angeze bo mama: “Ngezgø e Jehová. Je ni chju̱zgø akjanu; dya ri negø kjo kʼo ri matrʼꞹji“ (Isaías 42:8).

Ngekʼua ¿søø ra manji ke nu oración ke go tsjaa e Elías, ñe kʼo o tsjaji kʼo mi øtꞹji e Baal ro dyⱥrⱥ dʼatrjo Mizhokjimi? Iyo, kʼo mi matrʼꞹji e Baal mi pøtrʼꞹji ntee kjanu mi pⱥspⱥji, xo mi tsjajaji nrrinxu ñe bʼɇzo, me mi kjaji na sʼoo kʼo ntee. Pe kʼo mi matrʼꞹji e Jehová, dya mi kjaji kʼo na sʼoo ñe dya kjo mi xipjiji ro tsjaji kʼo na sʼoo. Ngekʼua ma mi øtꞹji e Jehová, dya mi ngeje e Baal kʼꞹ ro dyⱥrⱥ. Dyotrjobi ma ri penpe na carta na in jobi ke me na jonte, pe, ¿gi nee ke ne carta ra zⱥtrʼⱥ ko na bʼɇzo ke me na sʼonte? ¡Iyo!

Kʼo øtꞹji e Jehová, na matrʼꞹji kʼꞹ o dyⱥtrʼⱥ nrrexe, angeze ngeje nu Tata nrrexe yo ntee kja ne xoñijomꞹ. a “Nutsʼkʼe, oh, Jehová, ngetsʼkʼe in Jyogøjme”, o mama akjanu e profeta Isaías ma o tsjaa na oración (Isaías 63:16). Mi ngeje e Jehová ma e Jesús bo xipji o discípulo: “Nuzgø ya ra magø kja mi Tatagø ajens’e. Nukʼꞹ, xo ngeje ni Tatageji” (Juan 20:17). E Jehová ngeje nu Jyotrʼe e Jesús, nge nu kʼꞹ mi øtꞹ ma mi kjaa na oración, xo nge kʼꞹ ro dyøtꞹji yo discípulo ma ro tsjaji oración (Mateo 6:9).

Pe ¿pje mama ne Biblia?, ¿søø ra øtꞹji e Jesús o e María ñe yo tsʼita ke bʼꞹnji kja nitsjimi ma ra kjaji oración? Iyo, ngextrjo e Jehová ke ra øtꞹji ma ra kjaji oración. Ra nuji pjenga. Nange ma ri kjaji oración ñetse ke ri matrʼꞹjikjimi ñe kja ne Jñakjimi mama ke ngextrjo e Jehová ra matrʼꞹji (Éxodo 20:5). Xo ñeje e Jehová ngeje kʼꞹ “ⱥrⱥ yo oración” (Salmo 65:2). Zø e Mizhokjimi xipji e Jesús ñe yo anxe pje nrre ra tsjaji, yo oración ngextrjo angeze ba dyⱥrⱥ.

Nuʼma, ma ra kjaji oración, ra øtꞹji e Jehová ngek’ua ra dyⱥrⱥ k’o ra xipjiji. Kja ne Biblia mama: “Nu kʼo ra dyøtꞹ Mizhokjimi ko texe o mꞹbʼꞹ, ra perdonaojima kʼo na sʼoo” (Hechos 2:21). ¿Nee ra mama ke e Diosi ⱥrⱥ texe yo oración ma øtꞹji angeze? ¿O pje ni jyodʼꞹ ra kjaji?