Jar

2 Wõn Eo Jej Aikwij Jar ñan E?

ANIJ ej ke eoroñ aolep jar ko? Ilo lal in rainin, ekkã an armij ro lemnak bwe uak eo ej aet. Elõñ armij ro im rekõnan kakobaik kabuñ ko rekajjo jen dron rej errã ilo lemnak in im rej ba bwe emmõn aolep kabuñ ko meñe eoktak tõmak ko air jen dron. Bõtab, ejimwe ke lemnak in?

Baibel eo ej katakin bwe elõñ alen armij ro rejjab jar ñan Anij eo emol. Ilo ien ko kar je Baibel eo, ekkã an kar armij ro jar ñan ekjab ko. Bõtab, elõñ alen Anij ear kakkil ir kin men in. Ñan wanjoñok, Sam 115:4-6 ej ba bwe ekjab ko “eor lojiliñir, a re jab roñ.” Inem ealikar bwe ejelok tokjen ñe jej jar ñan juõn anij me ejjab maroñ eoroñ kij.

Juõn bwebwenato ilo Baibel eo ej kalaplok ad melele kin men in. Dri kanan eo Ilaija ear jumae dri kanan ro an Beal im kajitõk bwe ren jar ñan anij eo air, inem elikin enaj jar ñan Anij eo an. Ilaija ear ba bwe Anij eo im enaj uake jar ko ej Anij eo emol. Dri kanan ro an Beal rar errã ibben im kanuij kate ir in jar im lamij ñan anij eo air, bõtab rar jab lo tõbrõk! Bwebwenato eo ej ba: “A ejelok ainiken, ak jabrewõt eo ej uak, ak eoroñ ir.” (1 Kiñ Ro 18:29) Ak, ta eo ear walok ke Ilaija ear jar?

Elikin an kar Ilaija jar, Anij eo an ear uake ilo mõkõj ke juõn kijeek jen lañ ear buñ ion menin katok eo an Ilaija. Kar ta oktak eo? Ewor juõn men eaurõk ear walok ilo jar eo an Ilaija im ej bed ilo 1 Kiñ Ro 18:36, 37. Jar eo an ear lukkun kadu kinke ear kitibuj enañin 30 nan ko ilo kajin Hibru. Bõtab, ilo jar in an ekadu, Ilaija ear kajerbal etan Anij, Jeova, jilu alen.

Beal, melelen “iroij,” kar anij eo an dri Kenean ro. Bõtab, ear oktak jekjekin, etan, im wãwen an armij ro kabuñ ñan anij in ilo kajjojo bukwon ko ilo Kenean. Ak, etan Jeova ejejuan im ej jitõñlok wõt ñan E. Anij in ear jiroñ armij ro an: “Jeova, eñin eta; im Aõ wuj I jamin lelok ñan bar juõn.”—Aiseia 42:8.

Ear ke emmõn jar eo an Ilaija im jar ko an dri kanan ro an Beal meñe ear oktak anij eo rar jar ñan e? Man im kõrã ro ilo Kenean rar kõmmani manit ko retton im katok kin armij ro ilo air kabuñ ñan Beal. Ilo okõtõn men in, Jeova ear jiroñ dri Israel ro ñan air kabuñ ñan E ilo wãwen eo erreo im ej kwalok kautiej, im men in ear kejbãrok ir jen manit ko retton. Inem lemnak kin men in: Elañe kwar jejelok ñan juõn mõttam im elap am kautiej e, kwonaj ke kar kõtõmene bwe renaj lelok letter eo am ñan juõn eo eoktak etan im men ko ej kõmmani relukkun nana im rej nae aolep men ko eo mõttam ej kaurõki? Alikar bwe kwoban!

 Elañe kwoj jar ñan Jeova, melelen men in ej bwe kwoj jar ñan dri Kõmmanman eo, eo ej Jemen armij otemjej. * Dri kanan Aiseia ear ba ilo jar eo an: “Kwe, O Jeova, Jemem.” (Aiseia 63:16) Inem, eñin ej Eo im Jisõs Kraist ear konono kake ke ear ba ñan dri kalor ro an: “Ij wõnliñlok ñan Jema, im Jememi, im ñan Aõ Anij, im ami Anij.” (Jon 20:17) Jeova ej Jemen Jisõs. Ej Anij eo Jisõs ear jar ñan E im katakin dri kalor ro an ñan air bareinwõt kõmmane men in.—Matu 6:9.

Baibel eo ej ke jiroñ kij ñan ad jar ñan Jisõs, Meri, ak ñan enjel ro? Jaab, ej ba bwe jen jar ñan Jeova wõt. Jen etale ruo un ko unin ad aikwij kõmmane men in. Kein kajuõn, jar ej mõttan ad kabuñ, im Baibel eo ej ba bwe jej aikwij kabuñ wõt ñan Jeova. (Exodus 20:5) Kein karuo, Baibel eo ej kwalok bwe Jeova ej “roñjake jar” ko. (Sam 65:2) Meñe Jeova ej lelok elõñ eddo ko ñan ro jet, ak ear jab lelok eddo in ñan jabrewõt. Ej kalimur bwe enaj eoroñ jar ko ad.

Inem elañe kwokõnan bwe Anij en eoroñ jar ko am, kememej nan in jiroñ in ilo Baibel eo: “Jabrewõt eo e naj jar ilo etan [Jeova] e naj mour.” (Jerbal 2:21) Bõtab, Jeova ej ke roñjake aolep jar ko? Ak ewor ke jabrewõt men jej aikwij jelã elañe jekõnan bwe Jeova en eoroñ jar ko ad?

[Kamelele eo itulal]

[[Pija ilo peij 5]

Aituerõk eo Ilaija ear bõkmantak ñan dri kanan ro an Beal ear kamol bwe ejjab aolep jar ko Anij ej buñburuen kaki