ТАЧЕ шуко еҥ тыге шона: «Кеч-кӧланат кумалам гынат, кумалтыш мутем колмо лиеш». Тыгай еҥ-влакын шонымаште, чыла религий-влак, икте-весе деч ойыртемалтыт гынат, сай улыт. Тиде шонымаш чын мо?

Библий дене келшышын, шуко еҥ кумалеш, но чын Юмылан огыл. Библийым возымо жапыште еҥ-влак сӱрет-влакым кучылтын кумалыныт, но Юмо нуным тыгай кумалме деч шуко гана чарен. Теве мом шоя юмо-влак нерген Псаломышто 113:12—14 возымо: «Пылышышт уло гынат, огыт кол». Тугеже молан кумалаш юмылан, кудыжо тендам нигунамат огеш кол?

Библийыште возымо ик каласкалымаш тидым сайрак умылаш полша. Илья, чын Юмын пророкшо, Ваалын пророкшо-влаклан шке юмыштлан кумалаш темлен, да вара тудо шке Юмыжлан кумалын. Ильян мутшо почеш шоя юмо огыл, а чын Юмо вашмутым пуа. Тылеч вара Ваалын пророкшо-влак шуко жап чотак кумалыныт, эсогыл кычкырен тидым ыштеныт, но чыла арам лийын. Библий дене келшышын, юмышт нимогай вашмутым пуэн огыл (1 Царей 18:29). А Ильян кумалмыж деч вара мо лийын?

Юмо вигак кава гыч тулым колтымыж дене вашмутым пуэн. Тиде тул Ильян кондымо надыржым нелын колтен. Молан Ильян кумалтыш мутшо колмо лийын, а Ваалын пророкшо-влакын — уке? 1 Царей 18:36, 37 дене келшышын, Ильян кумалтыш мутшо пешак кӱчык лийын гынат (акрет еврей йылме дене 30 наре мут гыч веле шоген), Илья Юмым кум гана Иегова лӱмжӧ дене манын.

Ваал «оза» але «тӧра» манмым ончыкта. Тудо хананей-влакын юмышт лийын, да кажне кундемыште шке Ваалже лийын. Но Иегова — тиде ойыртемалтше лӱм. Тиде лӱм дене уло Сандалыкыште ик личность веле маналтеш. Тудо шке калыкшылан каласен: «Мый Иегова улам. Тиде мыйын лӱмем. Мый шке чапемым нигӧланат весылан ом пу» (Исайя 42:8).

Вааллан кумалмаш храмысе яжарланымаш дене да эсогыл айдемым надырыш кондымаш дене кылдалтме лийын. Чыла тиде еҥ-влакым моральный шотышто пужен. А Иегова шке Израиль калыкшым арун кумалаш туныктен, да нунын кумалмашышт шакше йӱла-влак деч посна лийын. Шоналтыза, те лишыл йолташдалан серышым возеда. Йолташда пеш сай айдеме улеш да нравственный нормо почеш ила. Серышыште те возеда мо вес лӱман айдемын адресшым, кудыжо тендан йолташда дене таҥастарымаште чот уда да яжар илышым вӱда? Конешне, уке.

Иеговалан кумалыда гын, те айдеме тукымын Ачажлан, Чылажымат Ыштышылан, кумалыда. * «Тый, Иегова, мемнан Ачана», — Исайя пророк кумалын (Исайя 63:16). Лач тиде Ача нерген Иисус Христос шке тунемшыж-влак дене мутланымыж годым ойлен: «Мый шке Ачам да тендан Ачада деке, шке Юмем да тендан Юмыда деке кӱзем» (Иоаннын 20:17). Иисусын Ачаже — Иегова. Лач тудлан Иисус кумалын да шке тунемшыж-влакым тудланак кумалаш туныктен (Матфейын 6:9).

Библий Иисуслан, Мариялан, святой-влаклан але суксо-влаклан кумалаш туныкта мо? Уке. Иеговалан веле кумалаш кӱлеш. Кок амалым ончен налына. Икымше, кумалтыш мутым кумалмаште кучылтыт, а Библийыште возымо дене келшышын, ме Иеговалан веле кумалшаш улына (Исход 20:5). Кокымшо, Иегова кумалмым Колыштшо улеш манын, Библий палдара (Псалом 65:2, УТ). Юмо шке властьшым весе-влаклан пуа гынат, кумалтыш мутым колышташ правам нигунамат да нигӧланат пуэн огыл. Тудо мемнан кумалтыш мутна-влакым шкак колышташ сӧра.

Юмо мемнан кумалтыш мутнам колжо манын, мыланна Библийын мутшым шарнаш кӱлеш: «Полышым йодын, Господьын лӱмжым ӱжшӧ кеч-кӧат утарыме лиеш» (Апост. пашашт 2:21). Но Иегова чыла кумалтыш мутым колеш мо? Тудо мемнан кумалтыш мутнам колжо манын, можыч мыланна эше иктаж-мом ышташ кӱлеш?