Umthandazo

2 Kufuze Sithandaze Kubani?

YOKE iimthandazo iya endaweni efanako na, kunganandaba bona inqotjhiswe kubani? Ephasini lanamhlanjesi, kujayelekile ukucabanga njalo. Umbono loyo ubonakala ukarisa kwabanengi abathanda iinhlangano ezivanga iinkolo nabafuna bona zoke iinkolo zamukeleke, kungakhathaliseki ukuhluka kwazo. Nokho, kuyakghoneka na bona umbono loyo ube mamala?

IBhayibhili ifundisa bona eqinisweni iimthandazo eemnengi iya emntwini namtjhana kuzimu ongasuye. Emva le nekutlolwa iBhayibhili, bekujayelekile ebantwini ukunqophisa iimthandazwabo eenthombeni ezibunjiweko. Nokho, uZimu uyikhalimela ngokubuyelelweko imikghwa enjalo. Isibonelo, AmaRhalani 115:4-6 athi ngeenthombe: “Zineendlebe, kodwana azizwa.” Iphuzu liyakhanya. Kubayini uthandaza kuzimu ongekhe akuzwe?

Umlando okhanyako weBhayibhili uyadepha ephuzwineli. Umporofidi kaZimu wamambala u-Elija wabekela abaporofidi bakaBhali isitjhijilo bona bathandaze kuzimabo, ngemva kwalokho yena uzakuthandaza kuZimakhe. U-Elija wathi uZimu wamambala uzokuphendula, kodwana wamala angekhe aphendule. Bamukela isitjhijilo abaporofidi bakaBhali bathandaza ngamandla isikhathi eside, bakhihla nesililo—kodwana akhenge baphumelele! Umlando uthi: “Bekungekho ophendulako, kungekho nolaleleko.” (1 AmaKhosi 18:29) Kwenzekani u-Elija nathandazako?

Ngemva kobana u-Elija athandazile, uZimakhe waphendula khonokho, wathumela umlilo ovela ezulwini bona udle isihlabelo esenziwe ngu-Elija. Bewuyini umehluko? Kunento eyodwa eqakathekileko emthandazweni ka-Elija ngokwawo engakwenza bona ufumane ipendulo, etlolwe ku-1 AmaKhosi 18:36, 37. Bekumthandazo omfitjhani khulu—unamagama angaba-30 kwaphela elimini lokuthoma lesiHebheru. Nokho, emagameni layo, iinkhathi eentathu u-Elija wabiza uZimu ngebizo lakhe ngenyama, uJehova.

UBhali okutjho “umnikazi” namtjhana “ikosi,” bekunguZimu wamaKanana, begodu bekuneembono eemnengi ngozimu loyo. Nokho, uJehova, libizo eliveleleko, eliberega emntwini oyedwa kwaphela ezulwini nephasini. UZimu lo watjela abantu bakhe: “NginguJehova. Ngilo ibizo lami; angizokunikela nanyana ngubani omunye iphazimulwami.”—Isaya 42:8.

Umthandazo ka-Elija nowabaporofidi bakaBhali waya endaweni efanako? Ukukhulekela uBhali kwehlisa isithunzi sabantu ngamasikwabo wobungwadla ngitjho nokwenza isihlabelo ngabantu. Ngokuhlukileko, uJehova walayela abantu bakhe, u-Israyeli, bona bamkhulekele ngendlela ehloniphekileko. Ngalokho-ke, akhe ucabange ngakho: Nengabe ngokukhethekileko  uthumela umnganakho ohlonipheke khulu incwadi, ungalindela bona isiwe komunye umuntu onobuntu nobudumo obuhlukileko kunomnganakho? Eqinisweni angeze!

Nengabe uthandaza kuJehova, uthandaza kuMbumbi, uYise lesintu. * “Wena Jehova, unguBabethu,” kwatjho umporofidi u-Isaya emthandazweni. (Isaya 63:16) Lo, ngokuphela Kwakhe uJesu Krestu akhuluma ngaye natjela abalandeli bakhe: “Ngibuyela kuBaba onguBaba wabo nabo, uZimu wami onguZimu wabo nabo.” (Jwanisi 20:17) UJehova nguBaba kaJesu. NguZimu uJesu athandaza kuye nafundisa abalandeli bakhe bona bathandaze kuye.—Matewu 6:9.

IBhayibhili isitjela bona sithandaze kuJesu na, kuMariya, kibosanta namtjhana eengilozini? Awa—kuJehova kwaphela. Cabangela amabanga amabili bonyana kubayini. Kokuthoma, umthandazo sisenzo sokukhulekela, begodu iBhayibhili ithi ukukhulekela kufuze kusiwe kuJehova kwaphela. (Eksodosi 20:5) Kwesibili, iBhayibhili imbula bona unesiqu esithi, “Muzwi weemthandazo.” (AmaRhalani 65:2) Nanyana uJehova abela abanye iimthwalo, akhenge awudlulisele kwabanye umthwalo lo. NguZimu ngokwakhe othembisa ukuzwa iimthandazwethu.

Ngalokho, nengabe ufuna iimthandazwakho izwiwe nguZimu, khumbula nasi isiyeleliso somtlolo: “Loyo obizako ibizo leKosi [uJehova], uzaphuluswa.” (IZenzo 2:21) Kodwana uJehova uzwa yoke iimthandazo ngokunganamibandela? Namtjhana ikhona enye into okufuze siyazi nengabe sifuna uJehova ezwe iimthandazwethu?

[Umtlolo waphasi]

[Isithombe ekhasini 5]

Isitjhijilo saka-Elija ebaporofidini bakaBhali satjengisa bona iimthandazo ayiyi endaweni efanako yoke