OSOLOBRUGWẸ ọ kpahanrhọ ẹrhomo ephian sẹ a nẹriẹn vwe yi yanghene a nẹ ye vwe yi-i? Omaran ihworho buebun e roro inyenana. Ihworho buebun i vwo esegburhomẹmro taghene ẹga ephian i rhomurun, omarana orho toro osolobrugwẹ ra nẹrhomo vwe-e. Ọrẹn, iroro ọnana ọgbare?

Baibol na o yonorin taghene ihworho buebun a nẹrhomo vwe ohworho rọ sọre. Uvuẹn ọke ra ya i Baibol na, ihworho i nẹrhomo vwe ema ra jarare. Ọrẹn Osolobrugwẹ o tiri aye orhọ ọgbọ buebun kpahen irueruo ọrana. Jerẹ udje, Psalm 115:4-6 nọ ta kpahen ema: “Aye i vwo erhọ, ọrẹn aye i vwa sabu rhon ẹmro-o.” Ẹmro na o fiotọre. Me yo no mwuo nẹrhomo vwe ohworho ro vwo rhon?

Ikuegbe i Baibol owu ọ dabu dje ẹmro ọnana fiotọre. Ọmẹraro urhomẹmro na re se Elijah nọ ta rẹn emẹraro i Baal taghene aye i nẹrhomo vwe osolobrugwẹ aye, ọye nọ nọ ji nẹrhomo vwe Osolobrugwẹ ọnẹyen. Elijah nọ tare taghene Osolobrugwẹ urhomẹmro na ọnọ kpahenrhọ, ọrẹn osolobrugwẹ efian na, ọ kpahanrhọ-ọ. Emẹraro i Baal ni kwerhọ oborẹ Elijah ọ tare, aye ni nẹrhomo gbangbanhon ọke jijiri, aye i tobọ korunu phia dede, ọrẹn o vwo ọrọ kpahenrhọ rẹn aye-e! Iyẹnrẹn na nọ tare: “O vwo ohworho owuorowu rọ kpahenrhọ-ọ; o vwo ohworho owuorowu rọ kerhọ-ọ.” (1 Kings 18:29) Ọrẹn me nọ yọ phiare ọke Elijah ọ nẹrhomo ọnẹyen?

Ọke Elijah ọ nẹrhomo hin, Osolobrugwẹ ọnẹyen nọ kpahenrhọ riẹn ogege nyoma ro dje erhanren nẹ odjuwu rhe nọ torhẹ izobo Elijah. Ovẹnẹ ọgo yọ ha uvwre ẹrhomo enana? O vwo emru ọghoghanren owu ra djokarhọ uvuẹn ẹrhomo Elijah rọ ha uvuẹn 1 Kings 18:36, 37. Ẹrhomo na ọ kpẹtẹre, ẹmro i Hebrew ra ha ya ẹrhomo na ọ vrẹn ọgba-an. Ọrẹn uvuẹn ẹmro erana, Elijah ọ hunute odẹ Osolobrugwẹ ro rhiẹ Jehova ọgbesa.

Baal ro mevirhọ “ọrovwori” yanghene “onini” yẹ Osolobrugwẹ itu i Canaan, o ji vwo isolobrugwẹ buebun uvuẹn ekete erọrọ ra ha odẹ i Baal se. Ọrẹn odẹ i Jehova san, Ọye ọvo ya ha odẹ na se uvuẹn ọsoso otọrakpọ ọrhẹ odjuwu na. Osolobrugwẹ nọ ta rẹn ihworho yi: “Mẹmẹ yi Jehova. Ọrana yẹ odẹ mẹ; mi ha odidi mẹ rẹn ohworho owuorowu-u.”—Isaiah 42:8.

Ẹrhomo Elijah ọrhẹ ẹrhomo emẹraro i Baal, ekete owu yẹ aye i nyaren? Ẹga i Baal ọ lẹrhẹ ihworho vwobọrhọ irueruo ọfanrhiẹn ọrhẹ ituakpọ rẹ aye a ha ze izobo. Ọrẹ ovẹnẹ, ogame i Jehova o yono emọ Israel na nẹ abọ irueruo esọsọ erana. Gbe roro kpahen udje ọnana: Orhianẹ wa guọlọ ya ileta vwe ugbehian wa họghọ riẹn omamọ, wu ne kwe na ha odẹ ọwọrọ ro vwo rhiẹ ugbehian ọnọ ya ileta na, rẹ uruemru ọnẹyen ọ vẹnẹ ọrẹ ugbehian ọnọ uvuẹn kizede kizede? Ejo!

Wu rha nẹrhomo vwe i Jehova, nọyẹ wa nẹrhomo vwe Ọmemama na, ro rhiẹ Ọsẹ ituakpọ ephian. * Ọmẹraro Isaiah nọ tẹmro enana uvuẹn ẹrhomo ọnẹyen, “Wẹwẹ, O Jehova, yẹ Ọsẹ ame.” (Isaiah 63:16) Ọnana yi jẹ Ohworho ri Jesu ọ ta rẹn idibo yi kpahen ọke rọ ta: “Mie bru Ọsẹ mẹ nya ro rhiẹ Ọsẹ are ọrhẹ Osolobrugwẹ mẹ ro rhiẹ Osolobrugwẹ are.” (John 20:17) Jehova yẹ Ọsẹ i Jesu. Ọye yẹ Osolobrugwẹ ri Jesu ọ nẹrhomo vwe, ọrhẹ ohworho ri Jesu o yono idibo yi nẹ aye i nẹrhomo vwe.—Matthew 6:9.

Baibol na o yonirin ọwan na nẹrhomo vwe i Jesu, Mary, ihworho efuanfon, yanghene emakashe? Ẹjo, Jehova ọvo ya na nẹrhomo vwe. Jenẹ a ta kpahen iroro eva. Ọrukaro, ẹrhomo ọ ha usuẹn ogame ra haphia, Baibol na ọ tare taghene a ha ogame vwe i Jehova ọvo. (Exodus 20:5) Ọreva, Baibol na o djephia taghene Jehova ọvo yo vwo odovan na “Ohworho ro rhon ẹrhomo.” (Psalm 65:2) Dedevwo Jehova o tiobọnẹ uphẹn buebun rẹn ihworho, ọrẹn o tiobọnẹ uphẹn ọnana rẹn ọwọrọ-ọ. Ọye yẹ Osolobrugwẹ ro veri taghene ọye ọvo yo no rhon ẹrhomo ọwan.

Omarana, wu rha guọlọ nẹ Osolobrugwẹ ọ kpahenrhọ ẹrhomo ọnọ, gba karorhọ urhebro i Baibol ọnana: “Kohworho kohworho ro se odẹ i Jehova yo no simirhọ.” (Acts 2:21) Ọrẹn, Jehova ọ kpahanrhọ ẹrhomo ephian odedede? Gbinẹ o vwo emru ọrọrọ ro fori ne rhe, arha guọlọ ni Jehova ọ kpahenrhọ ẹrhomo ọwan?