Ko tichadekana kupemphera kwa mbani?
WANTHU azinji ntsiku zino achakumbuka kuti mapemphero yose yachayenda ku malo yabodzi, viribe basa dzina yomwe ikutomolewa. Azinji wa wanthu mwawa ndiwo womwe achafuna kuti vipembedzo vose vimbachitire vinthu pabodzi. Iwo achawona kuti vipembedzo vose ni vobvumizika kwa Mulungu olo visiyane vochita. Koma ko vimwevi nishuwadi?
Baibolo ichanena kuti wanthu azinji achapemphera kwa mulungu wophonyeka. Kalekale pomwe Baibolo imbanembewa, wanthu azinji ambapemphera kwa mafano yosema. Koma nthawe zose Mulungu ambawatsumula na khalidwe mweyo. Mwakulinganiza, pa Salimo 115:4-6 Mulungu adanena va mafano kuti: ‘Matu anayo koma achakwanisalini kubva.’ Mpfundo yake pamwapa ni yakuti, palibe phindu kupemphera kwa mulungu yemwe achabvalini.
M’baibolo muna nkhani yabwino yonena va mpfundo mweyi. N’neneri Eliya adauza aneneri wa Baala kuti apemphere kwa mulungu wawo ndipo patsogolo pake iye apemherembo kwa Mulungu wake. Iye adawauza kuti Mulungu chaiye ndiye yemwe akwanise kudawira pemphero ya omutumikira wake, pomwe mulungu wabodza adawirelini. Aneneri wa Baala adabvuma kuti achite vimwevo, ndipo adapemphera kwa nthawe itali komasoti mokuwa maninge. Koma pali chomwe chidachitika. Nkhani mweyi ichati: ‘palibe womwe adawadawira panango kuwabvera.’ (1 Mafumu 18:29) Manje ko Eliya vidamufambira tani?
Eliya padapemphera, nthawe mweyo Mulungu adadawira pemphero yake ndipo adatumiza moto kuchokera kudzulu. Moto muyo, udashoka ntsembe yose yomwe Eliya wenze adaiyikha pa guwa ya ntsembe. Ko nchani chidachitisa kuti pakhale kusiyana kumuku? Pa pemphero ya Eliya yonembewa pa 1 Mafumu 18:36, 37 inkuwonesa chomwe chidachitisa. Pemphero mweyi ni ifupi ndipo mu chiheberi choyambirira inamawu pafupifupi 30 basi. Koma m’mawu yadikidiki mwaya, Eliya adatomola dzina ya Mulungu Yahova maulendo yatatu.
Baala wenze mulungu wa Akanani ndipo mawu yakuti Baala yatanthauza “munikachiro” panango kuti “ambuya.” Akanani mwawo ambatumikira pomwe milungu ya Baala ya makhaindi yosiyanasiyana. Koma dzina yakuti Yahova, ni ya Mulungu m’bodzi yekha basi mu chilengedwe chose. Mulungu muyu adawuza wanthu wake kuti: ‘Ine ndine Yahova. Dzina yangu ni mweyi, ndipo nidzaperekelini ulemu wangu kwa aliyese.’—Yesaya 42:8.
Ndawa chani pemphero ya Eliya idadawiriwa koma mapemphero ya aneneri wa Baala yalibe kudawiriwa? Wanthu womwe ambatumikira Baala ambalemekezalini moyo wa wanthu ndawa miyambo yanango ya chipembedzo chawo yambaphatanidzapo kuchita uhule komasoti kupereka wanthu ntsembe. Mosiyana na vimwevi, kutumikira Yahova kudachitisa wanthu wake, Aizirayeli, kukhala wolemekezeka ndawa kumbawateteza kuti aleke kumbachita vinthu vonyantsa ninge vomwe wanthu womwe ambatumikira Baala ambachita. Manje ganizirani tene: Muchikhala kuti mwanembera kalata munzanu wolemekezeka maninge na wakhalidwe yabwino, ko mungaitumize kwa munthu munango yemwe dzina yake ni yosiyana na munzanu, komasoti khalidwe yake ni yoyipa maninge? Tinkudziwa kuti mungachitelini vimwevo.
Vomwe Eliya adachita potsutsana na aneneri wa Baala, vinkuonesa kuti ni mapemphero lini yose yomwe yachayenda kwa Mulungu chaiye
Mukambapemphera kwa Yahova ndiye kuti munkupemphera kwa Mulengi yemwe ni Ababa wa wanthu wose. a M’neneri Yesaya pakupemphera adanena kuti: ‘Imwepo Yahova ndimwe Ababa wathu.’ (Yesaya 63:16) Ababa muyu ni yemwe Yesu ambanena padauza ateweri wake kuti: ‘Ine ninkukwera kwa Ababa wangu.’ (Yohane 20:17) Yahova ndiye Ababa wake wa Yesu. Yesu ambapemphera kwa Mulungu moyu, ndipo adapfunzisambo ateweri wake kuti ambapemphere kwa Yahova.—Mateyu 6:9.
Manje ko Baibolo ifotokoza kuti timbapemphere kwa Yesu, Mariya, wochena ntima, panango kwa Angelo? N’dawiro wake ni wakuti neye. Tichadekana kupemphera kwa Yahova yekha. Ndawa chani? Ganizirani vifukwa viwiri ivi: Chakuyamba, pemphero ni mbali yakutumikira ndipo Baibolo ichati tichadekana kutumikira Yahova yekha basi. (Ekisodo 20:5) Chachiwiri, Baibolo ichafotokoza kuti Mulungu ni ‘wakubva pemphero.’ (Salimo 65:2) Podiya kuti Yahova adapasa angelo maudindo yosiyanasiyana, koma kubvesera pemphero ni udindo wake, ndipo alibe kuupereka kwa aliyese. Mulungu achapolomisa kuti iye ndiye yemwe ambabvesere mapemphero yathu.
Ndipo mwapa peno munkufuna kuti Mulungu ambabvesere mapemphero yanu kumbukirani malangizo ya m’Baibolo aya: ‘Aliyese wochemera pa dzina ya Yahova adzapulumuke.’ (Machitidwe 2:21) Koma ko Yahova achadawira mapemphero ya munthu aliyese? Panango ko panachinthu chinango chomwe Yahova achada kuti timbachite kuti ambadawire mapemphero yathu?
a Mu vipembedzo vinango achanena kuti kutomola dzina ya Mulungu podiya pakupemphera nkuphonya. Koma dzina mweyi ichagumanika maulendo pafupifupi 7000 mil mu viseweredwe voyambirira va Baibolo. Kawirikawiri dzina mweyi ichagumanika m’mapemphero na munyimbo zotamanda Mulungu za atumiki wokhulupirika wa Yahova.