¿Pitataj mañana canchij?
¿DIOSCA tucui mañashcacunatachu uyan? Achca gentecunami Diosca tucui mañashcacunatami uyan nincuna. Shinallataj Diospajca tucui religioncunami alli can, o maijan diosta mañajpipish uyangallami nincunami. ¿Chaica ciertochu can?
Bibliapi ricuchishca shinaca gentecunaca achcata mañashpapish mana Dios verdaderota mañancunachu. Ñaupa punllacunapi, Bibliata escribicui punllacunapica gentecunaca santocunatami mañajcuna carca. Chaimi Diosca ama chaita rurachun nishpa cutin cutin huillarca. Salmo 115:4-6-pi nishca shinaca chai santocunaca “rinrinta charishpapish, mana uyancunachu”. Chashna cajpica santocunata mañanaca yangallami can ¿nachu?
Profeta Eliashuan, Baal diospaj profetacunahuan ima pasashcata Bibliapi yachashun. Eliasca Baalpaj profetacunataca paicunapaj diosta mañachun nircami. Paicuna mañashcata cutichijmi Dios verdadero cashcata ricuchina carca. Baal diospaj profetacunaca achca tiempotami mañashpa catircacuna. Hasta caparishpami mañarcacuna. Pero Bibliapi nishca shinaca, ‘pi mana uyarcachu. Pi mana imata cutichircachu’ (1 Reyes 18:29). Eliaspish Yaya Diostami mañana carca. Pero ¿Yaya Diosca pai mañashcata uyarcachu?
Elías mañashca qꞌuipaca Diosca cielomanta ninata cachashpami Elías cushca ofrendata rupachirca. ¿Imamantataj Elías mañashcataca Diosca uyarca? Chaita yachangapajca 1 Reyes 18:36, 37-pimi ricui tucunchij. Chaipica Elías Diosta mañashca shimicunami ricurin. Eliasca ashalla shimicunapimi Diosta mañarca. Pero pai mañashpaca Jehová shutita quimsa cutin nombrashpami mañarca.
Canaanmanta cajcunaca Baal diostami adorajcuna carca. Paicunaca chꞌican chꞌican lugarcunapi causashpami, chꞌican chꞌican shuticunahuan chai diosllatataj adorajcuna carca. Pero Jehová shutimi Dios verdaderopaj shujlla shuti can. Paillatajmi: “Ñucaca, Jehovami cani. Chaimi ñuca shutica. Ñuca shina jatun canataca pi shujtajman mana cushachu” nirca (Isaías 42:8).
Eliaspaj mañashcataca Jehová Diosca contestarcami. Pero ¿imamantataj Baal diospaj profetacuna mañashcataca pi mana contestarca? Baal diosta adorajcunaca huainayashpa, gentecunata sacrificashpami chai diosta adorajcuna carca. Pero Jehová Diosta sirvijcunaca paitaca diferentemi adorajcuna carca. Jehová Diosca paita sirvijcuna mapa ruraicunahuan adorachunca mana munarcachu. Sino alli adorachun, tucuipi limpios cachunmi munarca. Caipi yuyai. Canchari shuj amigoman cartata cachanata munangui. Pero chai cartapi shujtajpaj shutita churajpica ¿chai cartaca cambaj amigopajmanca chayangachu?
Profeta Eliasca Jehová Diosca mana tucui mañashcacunata uyaj cashcatami ricuchirca
Jehová Diosta mañashpaca tucuita huiñachij Diostami mañacunchij. Paimi tucui gentecunapaj Yaya can. * Profeta Isaiasca shuj mañaipica: ‘Jehová Dios canmi ñucanchij Yaya cangui’ nircami (Isaías 63:16). Jesuspish Jehová Diosmanta parlashpami paita catijcunataca: “Ñuca Yayapajman, cancunapaj Yayapajman, ñuca Taita Diospajman, cancunapaj Taita Diospajman huichiyagrinimi” nirca (Juan 20:17). Jehová Diosca Jesuspaj Yayami can. Jesusca paipaj Yaya Jehová Diostami mañarca. Shinallataj paita catijcunatapish Jehová Diosta ima shina mañanatami yachachirca (Mateo 6:9).
Pero ¿Bibliapica Jesusta, Mariata, santocunata, angelcunata mañachunchu yachachin? Mana. Jehová Diosllatami mañana canchij. ¿Imamanta? Ishqui yuyaicunami tiyan. Puntapica, ñucanchij mañaicunahuanmi Yaya Diosta adoranchij. Chaimi Bibliapica Jehová Diosllata adorachun nin (Éxodo 20:5). Shinallataj Diosca tucui mañashcacunatami uyan ninmi (Salmo 65:2). Jehová Diosca huaquin responsabilidadcunata shujtajcunaman mingashpapish ñucanchij mañashcacunataca paillami uyan.
Chaimantami Jehová Dios ñucanchij mañashcacunata uyachunca paillata mañana canchij. Bibliapica: “Jehová Diospaj shutita nishpa mañajcunaca tucuicunami quishpiringacuna” ninmi (Hechos 2:21). Pero ¿Jehová Diosllata mañajpipish paica tucui mañashcacunatachu uyanga? ¿O pai uyachunca imatataj ashtahuan rurana canchij?
^ párr. 9 Huaquin religioncunapica Diospaj shutitaca mana ninachu canchij. Mañacushpapish mana nombranachu canchij nishpami yachachincuna. Pero callaripi Dios quillcachishcacunapica Diospaj shutica casi 7.000 cutincunami ricurin. Por ejemplo, salmocunapi, Diosta sirvijcuna rurashca huaquin mañaicunapimi Diospaj shuti ricurin.