KAY tiempopi askha runakunan ninku: “Pimantaña mañakunchis chaypas, mañakusqanchisqa Diosmanmi chayan”, nispa. Askha religionkunapi participaq runakunapas, llapa religionkunata defiendeq runakunapas chay jinatan piensanku. Ichaqa, ¿cheqaqchu chay nisqanku?

Biblian willan askha runakunaq mañakusqanku Diosmanqa mana chayasqanta. Bibliata qelqakusqan tiempopiqa askha runakunan idolokunamanta mañakuqku. Diosmi ichaqa askha kutipi llaqtanta nirqan ama chay ruwayman urmanankupaq. Salmos 115:4-6 textopin idolokunamanta nin: “Ninriyoqmi, manataq uyarinkuchu”, nispa. Chhaynaqa sut’in kashan. Mana uyariq diosmantaqa yanqan imatapas mañakusunman.

Chayta astawan entiendenapaq profeta Elías imachus ruwasqanmanta rimasun. Profeta Eliasqa Diosninmantan mañakunan karqan, Baalta adoraq sacerdotekunapas diosninkumantan mañakunanku karqan, ichaqa mañakusqankuman kutichimuqmi cheqaq Dios kasqanta rikuchinan karqan. Chayta ruwanankupaqmi Baalpa profetankunapas acuerdopi karqanku, jinan mañakuyta qallarirqanku. Askha horakunan diosninkumanta wajakurqanku. “Ichaqa manan ima rimaypas uyarikurqanchu. Manan pipas uyarimurqanchu, manallataq kutichimurqanpaschu” (1 Reyes 18:29). ¿Profeta Eliaswanri iman pasaran?

Mañakuyta tukuruqtin jinan Diosqa janaq pachamanta ninata kachaykamurqan profetanpa ofrenda jaywasqanta ruphapunanpaq. ¿Imapin Eliaspa mañakusqan jujniray karqan? Eliasqa kinsa kutitan Diospa sutinmanta wajakuspa mañakurqan. Chaytan willashan 1 Reyes 18:36, 37 textopi. Chay versiculokunapiqa yaqa 30 chunka palabrakuna jinan kashan, chaypin original hebreo simipiqa Diospa sutin kinsa kutita rikhurin.

Baal simiqa “dueño”, “patrón” ninantan nin. Chay diostan Canaán llaqta runakuna adoraqku, juj sutikunawan imataqmi reqsiqkupas. Jehová Diospa sutinmi ichaqa ch’ullalla, kay pachapipas janaq pachapipas. Dios kikinmi nirqan: “Noqan Jehová Dios kani. Chaymi sutiy, jatunchasqa kanaytaqa manan pimanpas qosaqchu”, nispa (Isaías 42:8, La Biblia. Traducción del Nuevo Mundo [TNM]).

¿Imaraykun Eliaspa mañakusqan uyarisqa karqan Baalpa profetankunaq mañakusqantaq mana? Baalta adoraqkunaqa runakunatan sacrificaqku, qhelli juchakunatan diosninkuta adoraspa ruwaqku, chaykunawanmi millay qhawarisqa karqanku. Jehová Diosta adoraqkunan ichaqa ch’uyata kausarqanku, llaqtan runakunapas manan mana allin ruwaykunataqa ruwaqkuchu. Chayraykun Jehová Diosqa mana llapa runaq mañakusqantachu uyarin. Astawan entiendenapaq kaypi piensay, respetasqa munasqa amigoykiman cartata apachiyta munaspaqa, ¿manan direcciontaqa juj sutiyoq millay runaman chayananpaqchu churawaq riki?

Jehová Diosmanta mañakuqkunaqa tukuy imaymanata kamaq, llapa runakunaq Taytanmantan mañakunku. * Profeta Isaiasmi Jehová Diosmanta mañakushaspa nirqan: “Diosnillayku, qanmi taytaykuqa kanki”, nispa (Isaías 63:16). Paymantan Jesusqa discipulonkunata nirqan: “Noqan wichapushani Yayayman, Yayaykichisman; Diosniyman, Diosniykichisman”, nispa (Juan 20:17). Jehová Diostaq Jesuspa Taytan chayqa, paymantan Jesusqa mañakurqan. Chhaynaqa discipulonkunapas Jehová Diosmantan mañakunanku karqan (Mateo 6:9).

¿Kamachinchu Biblia Jesusmanta Mariamanta santokunamanta otaq angelkunamanta mañakunanchispaq? Manan, Jehová Diosllamantan mañakunanchis. Chaypaq iskay razonkunata qhawarisun. Juj kaq, mañakuspaqa adorashanchismi. Biblian nishan Jehová Diosllata adorananchis kasqanta (Éxodo 20:5). Iskay kaq, Jehová Diosmi “mañakusqata uyariqqa” (Salmos 65:2). Arí, payqa imaymana ruwaykunatan jujkunaman saqerqan, ichaqa jujllatan manaqa: Paymi prometewanchis oracionninchistaqa pay kikinpuni uyariwananchispaq.

Chay jinaqa, Jehová Dios uyarinasuykita munanki chayqa, Bibliapi kay nisqantan kasukunayki, chaypin nishan: “Jehová Diospa sutinta llapa wajakuqkunataq salvasqa kanqaku”, nispa (Hechos 2:21). Chhaynaqa, ¿llapankutachu Jehová Dios uyarinman paymanta wajakuqtinku? Icha, ¿imatawanchu ruwananchis?