ΑΣΟΥΛΕΛΑ ο Ντεβέλ σαρέ ο προσευχές; Αντιβές μπουτ τζενέ πακιάνα-λες ανταβά. Μπουτ τζενέ πακιάνα ότι σαρέ ο θρησκείες ισί λατσσέ ντα ότι οτθάρ να τθερέλα σημασία κατέ κερέσα προσευχή. Όμως ισί μπαγιά ανταβά;

Η Αγία Γραφή σικλιαρέλα ότι, μπουτ φαρ ο τζενέ να κερένα προσευχή κο αληθινός Ντεβέλ. Κάνα γραφίντιβενας ο βιβλία ι Γραφιάκε ο πο μπουτ τζενέ κερένας πουμαρέ προσευχές κο εικόνες, όμως ο Ντεβέλ βακερντάς λένγκε μπουτ φαρ, ότι δεν έπρεπε τι κερέν-λες ανταβά. Για παράδειγμας ο εδάφια Ψαλμός 115:4-6 βακερένα για το είδωλα: «Κανά τθερένα, αλλά να ασουνένα». Οντουβά σο βακερένα ο εδάφια ισί ξεκάθαρος. Σόσκε τι κερέλ προσευχή κάποιος εκχέ ντεβλέστε σο να ασουνέλα-λες;

Εκ ιστορία κατά Γραφή σικαβέλα πο λατσσές ανταβά σημείος. Ο αληθινός προφήτης Ηλίας βακερντάς κο προφήτες του Βάαλ, τι κερέν προσευχή πουμαρέ ντεβλέστε. Σοράν κα κερέλας προσευχή βοβ-ντα πι Ντεβλέστε. Ο Ηλίας βακερντάς ότι ο αληθινός Ντεβέλ κα απαντίνελας, ενώ ο ψεύτικος να κα απαντίνελας. Ο προφήτες του Βάαλ αρχισάλε τι κερέν προσευχή μπουτ σαάτι ντα μπουτ ζουρανές πουμαρέ ντεβλέστε​—αλλά να αβιλό-πες τίποτα! Η Γραφή βακερέλα: «Ούτε φωνή ασούντιβελας ούτε απάντηση· καέκ να ντέλας-λεν προσοχή». (1 Βασιλέων 18:29) Αλλά σο αβιλό-πες κάνα κερντάς προσευχή ο Ηλίας;

Κάνα κερντάς προσευχή βοβ λέσκο Ντεβέλ απαντιντάς αμέσως, ντα μπουτσσαντάς γιακ κατά ουρανός σο πφαμπαρντάς λέσκι θυσία. Καγιά ισινέ η διαφορά; Μπορίνασα τι λας ι απάντηση άμα κα διαβάνας ι προσευχή ι Ηλιάσκι κο βιβλίος 1 Βασιλέων 18:36, 37. Ισί εκ μπουτ χουρντί προσευχή σο τθερέλα σάντε 30 περίπου λάφια κο πρωτότυπος εβραϊκός κείμενος. Αλλά ανταλέ προσευχιάτε ο Ηλιάς χρησιμοποιηντάς τριν φαρ ο ναβ ι Ντεβλέσκο, σο ισί Ιεχωβά.

Ο Βάαλ, σο ανταβά ναβ μανγκέλα τι βακερέλ «ιδιοκτήτης» ή «κύριος», ισινέ ο ντεβέλ σο τθερένας ο Χαναναίοι ντα οντουλέ τθεμέστε υπαρχίντιβενας μπουτ τρόποι σο παρουσιάνενας ανταλέ ντεβλές. Όμως, ο ναβ Ιεχωβά ισί μοναδικός ντα σικαβέλα σάντε Εκχές σαρό κο σύμπαν. Ανταβά Ντεβέλ βακερντάς πι λαόσκε: «Με ισινόμ ο Ιεχωβά. Ανταβά ισί μο ναβ··ντα καεκχέστε να κα νταβ μι δόξα».​—Ησαΐας 42:8.

Σόσκε ο Ηλίας λιντάς απάντηση κι προσευχή σο κερντάας ντα να λιντέ ο προφήτες του Βάαλ; Η λατρεία κο Βάαλ τθερέλας τι κερέλ λουμνικανέ πράγματα ατζέ-ντα με θυσίες τζενένγκε. Όμως, η λατρεία ι Ιεχωβάσκι ισινέ διαφορετική, ο Ιεχωβά να μανγκέλας λέσκο λαός, ο Ισραήλ, τι κερέλ ανταλά μελαλέ πράγματα αλλά τι ντελ-Λες λατρεία πάκι τροπόσαρ. Σκεφτίνεν, λοιπόν: Άμα κα μανγκένας τι μπουτσσαβέν εκ γράμμας τουμαρέ αμαλέστε, μήπως κα μπουτσσαβένας-λες κο ναβ εκχέ γιαβερέ τζενέσκο, εκχέ τζενέσκο σο τθερέλα μπουτ μπέτι φήμη ντα σο τζάλα κόντρα με το χαρακτήρας τουμαρέ αμαλέσκο; Σίγουρα να κα κερένας-λες ανταβά!

Άμα κερένα προσευχή κο Ιεχωβά, κερένα προσευχή Οντουλέστε σο κερντάς σαρέ ο πράγματα, κο Ντατ σαρέ κι τζενένγκο. a «Τούι, Ιεχωβά, ισινάν αμαρό Ντατ», βακερντάς ο προφήτης Ησαΐας πι προσευχιάτε. (Ησαΐας 63:16) Άκ’ κάσκε βακερέλας ο Ιησούς Χριστός, κάνα βακερντάς πι μαθητένγκε: «Νικλιάβα μι Νταντέστε σο ισί τουμαρό-ντα Ντατ ντα μι Ντεβλέστε σο ισί τουμαρό-ντα Ντεβέλ». (Ιωάννης 20:17) Ο Ιεχωβά ισί ο Ντατ ι Ιησούσκο. Ισί ο Ντεβέλ σο ο Ιησούς προσευχίντιβελας λέστε ντα ο Ντεβέλ σο σικλιαρντάς πι μαθητέν-ντα τι προσευχίντιβεν λέστε.​—Ματθαίος 6:9.

Μήπως η Γραφή βακερέλα τι προσευχίντιβας κο Ιησούς, κι Μαρία, κο άγια ή κο άγγελοι; Όχι—σάντε κο Ιεχωβά. Ντικχέν ντούι λόγους. Πρώτον, η προσευχή ισί εκ τρόπος σο ντάσα λατρεία, ντα η Γραφή σικαβέλα ότι πρέπει τι ντας λατρεία σάντε ι Ιεχωβάς. (Έξοδος 20:5) Δεύτερον, η Γραφή σικαβέλα ότι ο Ιεχωβά ισί “Οντουβά σο ασουνέλα προσευχή”. (Ψαλμός 65:2) Παρόλο σο ο Ιεχωβά ντέλα μπουτ ευθύνες κο γιαβερά, ανταγιά ευθύνη να ντινάς-λα ποτές καεκχέστε. Ισί ο Ντεβέλ σο ντέλα πο λάφι ότι βοβ ο ίδιος κα ασουνέλ αμαρέ προσευχές.

Άμα μανγκένα τι ασουνέλ ο Ντεβέλ τουμαρέ προσευχές, τι ντεν-τουμέν γκοντί σο βακερέλα η Γραφή: «Κον κα βακερέλ ο ναβ ι Ιεχωβάσκο κα σώντιβελ». (Πράξεις 2:21) Αλλά ασουνέλα ο Ιεχωβά σαρέ ο προσευχές; Ή μήπως ισί κάτι γιαβέρ-ντα σο πρέπει τι τζανάς άμα μανγκάσα τι ασουνέλ ο Ιεχωβά ο προσευχές σο κεράσα λέστε;