Sambela

2 A lingbi e tene ni na zo wa?

NZAPA amä asambela kue, atâa a tene ni na iri ti zo wa wala na nzapa wa? Laso, mingi ni azo apensé so Nzapa ayeke mä asambela kue. Tënë so agbu bê ti mingi ti azo so abâ so a yeke na lege ni ti tene abungbi ti vorongo nzapa nde nde abungbi ti sara beoko, na ala bâ so abungbi ti vorongo nzapa kue ayeke nzoni atâa so aye so ala mä na bê na ni ayeke nde nde. Me, tënë so ayeke tâ tënë wala ayeke tâ tënë pëpe?

Bible afa so fani mingi azo ayeke tene asambela ti ala pëpe na zo so a lingbi ala tene ni fade na lo. Na ngoi ti giriri, mingi ni azo ayeke tene asambela ti ala na a-image so azo la aleke ni. Me fani mingi Nzapa afa so lo ke mara ti sarango ye tongaso. Na tapande, Psaume 115:4-6 asara tënë ti ayanda atene: “Ala yeke na mê, me ala mä ndo pëpe.” Tënë ni ayeke polele. Ngbanga ti nyen ti sambela mbeni nzapa so ayeke mä ande mo lâ oko pëpe?

Mbeni mbaï so ayeke na yâ ti Bible afa ye mingi na e na ndo ti tënë so. Élie so ayeke tâ prophète ahunda na aprophète ti Baal ti sambela na nzapa ti ala, na pekoni lo nga kue lo yeke sambela na Nzapa ti lo. Élie atene so tâ Nzapa ayeke kiri tënë na sambela ni me nzapa ti wataka alingbi ti sara ye oko pëpe. Aprophète ti Baal ayeda, ala sambela ngangu, a ninga, na même ala dekongo. Me ye oko asi pëpe. Mbaï ni atene: “Mbeni yanga ti kiri tënë na ala ayeke pëpe, wala mbeni zo ti mä ala ayeke pëpe.” (1 aGbia 18:29). Me, na ngoi so Élie asambela, nyen la asi nyen?

Na pekoni so Élie asambela, gi hio tongaso Nzapa akiri tënë na sambela ni. Lo tokua mbeni wâ so alondo na yayu aga agbi sandaga so Élie aleke. Nyen la azia kangbi na popo ti asambela ti ala? Mbeni kpengba tënë ayeke na yâ ti sambela ti Élie ni so ayeke na 1 aGbia 18:36, 37, Tene ti Nzapa, Kozo Mbouki. A yeke mbeni sambela so ayo oko pëpe. Na Hébreu ti giriri a yeke wara gi ambupa 30 tongaso na yâ ni. Ye oko, na yâ ti nduru sambela so, Élie adi iri ti Nzapa, Yahve, wala Jéhovah, fani ota.

Baal, so ndani ayeke “wa ti ye” wala “maître”, ayeke lani mbeni nzapa ti azo ti Canaan. Mingi ti akodoro so ayeke na Canaan ayeke na Baal ti ala. Ye oko, Jéhovah ayeke mbeni iri so gi Nzapa oko la ayeke na ni na yâ ti dunia. Nzapa so atene na azo ti lo atene: “Iri ti mbi ayeke Yahve [“Jéhovah,” FD], si mbi ye ti tene mbeni nzapa ahon mbi pëpe; mbi mû ngangu ti mbi na ayorö ti ala pëpe.”​—Ésaïe 42:8, Kozo Mbouki.

Sambela ti Élie na ti azo ti Baal kue ayeke nzoni atâa so ala tene ni na anzapa nde nde? A yeke wara na yâ ti vorongo nzapa ti Baal akoli na awali so ayeke sara ndumba nga a yeke mû azo na sandaga. Sarango aye so akiri na zo na gbe ni mingi. Me Jéhovah afa na azo ti lo, Israël, ti voro lo na mbeni lege so ane zo nga lo zi ala na yâ ti asioni sarango ye so. Gbu li na ndo ti tapande so: Tongana mo tokua lettre na mbeni kamarade ti mo so azo ane lo mingi, mo yeke yeda ti tene a mû lettre ni na  mbeni zo so iri ti lo ayeke ti kamarade ti mo ni so pëpe? mbeni zo so ayeke na sioni sarango ye nga so sarango ye ti lo ayeke tâ nde mingi na ti kamarade ti mo ni? Oko pëpe!

Tongana mo sambela na Jéhovah andâ mo yeke sambela na Wasarango ye kue, Babâ ti azo kue. * Prophète Ésaïe atene na yâ ti sambela, lo tene: “Mo la, Yahve, si mo yeke babâ ti e.” (Ésaïe 63:16, Kozo Mbouki). A yeke biani Lo la Jésus ayeke sara lani tënë ti lo na ngoi so lo tene na adisciple ti lo lo tene: “Mbi yeke montê na Babâ ti mbi nga Babâ ti ala.” (Jean 20:17). Jéhovah ayeke Babâ ti Jésus. Lo yeke Nzapa so Jésus asambela lo lani nga lo la Jésus afa na adisciple ti lo ti sambela lo.​—Matthieu 6:9.

Bible ahunda na e ti sambela Jésus, Marie, asaint wala a-ange? Ên-ën, a hunda ti tene e sambela gi Jéhovah. Bâ araison use so afa ndani. Kozoni, sambela ayeke mbeni vorongo so e yeke voro na Nzapa, nga Bible atene so a lingbi e voro gi Jéhovah oko (Exode 20:5). Use ni, Bible afa so Nzapa ayeke Zo so ayeke “mä sambela”. (Psaume 65:3). Atâa so na ndoye Jéhovah akangbi akusala mingi na ambeni zo ti sara, lâ oko lo mû kusala ti mango sambela na mbeni zo pëpe. Lo yeke Nzapa so amû zendo ti mä asambela ti e lo wani.

Tongaso, tongana mo ye ti tene Nzapa amä sambela ti mo, a yeke nzoni mo girisa wango ti Mbeti ti Nzapa so pëpe. Versê ni atene: “Fade a yeke sö zo kue so airi ndo na Jéhovah na iri ti lo.” (Kusala 2:21). Me Jéhovah ayeke mä asambela kue, atâa asambela ni ayeke tongana nyen tongana nyen? Wala mbeni ye nde ayeke dä so a lingbi e hinga ni tongana e ye ti tene Jéhovah amä asambela ti e?

[Kete tënë na gbe ni]

[Foto na lembeti 5]

Ye so Élie ahunda ti tene lo na aprophète ti Baal asara afa so Nzapa ayeke mä gi ambeni sambela