Orasaun

2 Ba sé?

EMA barak hanoin katak orasaun hotu-hotu bá fatin ida deʼit. Ita mós hanoin hanesan neʼe ka lae? Ema barak hatán: “Sin.” Liuliu ema neʼebé fiar katak diʼak atu relijiaun oioin kahur malu apoia ideia neʼe. Maibé, ideia neʼe loos ka lae?

Bíblia hanorin katak tuir loloos ema barak halo orasaun, maibé laʼós ba Maromak neʼebé loos. Iha tempu Bíblia, ema barak toman atu halo orasaun ba buat lulik, hanesan estátua sira. Maibé, Maromak fó sai beibeik katak nia odi hahalok neʼe. Porezemplu, kona-ba estátua Bíblia hatete: “Sira iha tilun, maibé sira la bele rona.” (Salmo [Mazmur] 115:4-6) Sin, halo orasaun ba maromak neʼebé la bele rona mak saugati deʼit, loos ka lae?

Istória ida husi Bíblia mós hatudu ho klaru kona-ba neʼe. Maromak nia profeta ida neʼebé loos, naran Elias, koʼalia hasoru profeta sira neʼebé adora sira-nia maromak naran Baal. Nia haruka sira atu harohan ba sira-nia maromak, no nia rasik sei harohan ba ninian. Elias hatete katak Maromak neʼebé loos sei hatán ba ninia atan nia orasaun, maibé maromak neʼebé falsu sei la halo ida-neʼe. Profeta sira husi Baal simu Elias nia liafuan neʼe no sira halo orasaun makaʼas ba sira-nia maromak ba tempu kleur, toʼo sira hakilar ho lian makaʼas, maibé buat ida la akontese. Bíblia hatete katak: “La iha ida mak hatán, no la iha ida mak fó atensaun.” (1 Reis [1 Raja-Raja] 18:29) Maibé, saida mak akontese kuandu Elias halo orasaun?

Depois Elias halo orasaun, ninia Maromak hatán kedas hodi haruka ahi tun husi lalehan no han hotu sakrifísiu neʼebé Elias hasaʼe. Tansá mak ida-neʼe akontese? Elias nia orasaun neʼebé hakerek iha 1 Reis 18:36, 37 hatudu buat importante ida. Elias temi Maromak nia naran Jeová. Maski orasaun neʼe badak tebes, iha liafuan maizumenus 30 deʼit iha lia orijinál, lia-ebraiku, maibé Elias temi dala tolu Maromak nia naran.

Ema Kanaan nia maromak naran Baal iha arti “naʼin” ka “naʼi”, maski sira iha maromak oioin tuir sira-nia área, maibé sira bolu maromak sira-neʼe hotu ho naran Baal. Maibé, naran Jeová mak úniku tanba nia mak Maromak neʼebé aas liu iha rai no iha lalehan. Maromak fó-hatene ba nia povu: “Haʼu mak Jeová. Neʼe mak haʼu-nia naran; no haʼu la fó haʼu-nia glória ba buat seluk.”—Isaías (Yesaya) 42:8.

Elias nia orasaun no Baal nia profeta sira-nia orasaun bá Maromak neʼebé hanesan ka lae? Ema neʼebé adora Baal halo hahalok aat oioin iha sira-nia adorasaun hanesan halo sala-foʼer no mós sira tau ema iha ahi laran nuʼudar sakrifísiu. Maibé, Maromak Jeová hanorin nia povu, ema Israel, atu adora nia iha dalan neʼebé moos, no ida-neʼe proteje sira husi hahalok aat no foʼer. Entaun, hanoin toʼok kona-ba ai-knanoik neʼe: Se Ita haruka karta ba kolega ida neʼebé Ita respeitu tebes hodi hakerek ninia naran iha envelope, Ita nunka hanoin katak Ita-nia  karta sei toʼo ba ema seluk neʼebé halo hahalok aat tebes, loos ka lae?

Kuandu Ita halo orasaun ba Maromak Jeová, Ita halo orasaun ba ita-nia Kriadór, ita-nia Aman. * Profeta Isaías hatete iha ninia orasaun: “Ita, oh, Jeová, mak ami-nia Aman.” (Isaías [Yesaya] 63:16) Jesus mós fó-hatene ba ninia dixípulu sira: “Haʼu saʼe ba haʼu-nia Aman no imi-nia Aman; ba haʼu-nia Maromak no imi-nia Maromak.” (Joao 20:17) Sin, Maromak Jeová mak Jesus nia Aman. Jesus halo orasaun ba Maromak Jeová no nia hanorin ninia dixípulu sira atu halo hanesan.—Mateus 6:9.

Entaun, Bíblia hanorin ita atu halo orasaun ba Jesus, ba Maria, ba santu santa sira, ka ba anju sira ka lae? Lae, Bíblia hatete katak ita tenke halo orasaun ba Maromak Jeová deʼit. Hanoin toʼok tansá mak ita tenke halo ida-neʼe. Primeiru, orasaun mak parte husi ita-nia adorasaun, no Bíblia hatete katak ita tenke adora Jeová, Maromak loos ida deʼit. (Mateus 4:10) Segundu, Bíblia hatete katak Maromak Jeová deʼit mak Ida neʼebé “rona orasaun”. (Salmo [Mazmur] 65:2) Maski Maromak Jeová fó knaar oioin ba ninia kriatura sira, maibé nia nunka fó ninia knaar ba ninia kriatura ida atu rona ba ema nia orasaun. Maromak Jeová promete katak nia rasik sei rona ba ita ida-idak nia orasaun.

Nuneʼe, se Ita hakarak Maromak rona Ita-nia orasaun, diʼak atu hanoin Bíblia nia konsellu ida-neʼe: “Ema hotu-hotu neʼebé bolu Naʼi [Jeová] nia naran sei hetan maksoin.” (Apostolu 2:21) Maibé Maromak Jeová rona ba orasaun hotu-hotu ka lae? Ka, atu Maromak Jeová rona ita-nia orasaun, ita presiza halo buat seluk tan ka lae?

[Nota–rodapé]

[Dezeñu iha pájina 5]

Elias nia liafuan ba Baal nia profeta sira hatudu katak laʼós orasaun hotu bá fatin neʼebé hanesan