Gba u Se Eren Msen Hen Ana?
AÔNDO ungwan mbamsen cii, kua mba i er hen a na jighilii ga kpaa? Nyian ne, ior kpishi tôô ér Aôndo ungwan hanma msen cii. Ior kpishi mba ve ze mbaadua kposo kposo shi ve soo ér i lumun a hanma kwaghaôndo yô, ka ve kaa ér hanma msen cii Aôndo ungwan, shin er atesen a ukwaghaôndo mba shon a lu kwaghmôm ga nahan kpaa. Kpa kwagh u ve ôron ne a fatyô u lun aie gaa?
Bibilo tese ér ashighe agen ior ka ve er msen i lu hen Aôndo jighilii ga. Sha ayange a i ngeren Bibilo la, ior kpishi eren msen hen ieev mbi i gbe yô. Nahan kpa, Aôndo zer tan ve icin sha kwagh la gbem. Ikyav i tesen yô, Pasalmi 115:4-6 ôr kwagh u ieev kaa ér: “Mbi a ato, kpa mbi ongo ga.” Kwagh ne wanger wang. Aluer u ngu eren msen hen aôndo u una fatyô u ungwan we ga yô, ityôkyaa i u eren msen hen a na jim yô ka nyi?
Bibilo ôr kwagh ugen u ngise er yô vighe vighe, u a seer tan iwanger sha kwagh ne yô. Eliya u lu profeti u mimi la yange ôr kwagh a uprofeti mba Baal sha tarnahan kaa ér, ve er msen hen aôndo ve, vea been yô, un Eliya di una er msen hen Aôndo na. Eliya kaa ér Aôndo u mimi la una ungwa msen u profeti na, kpa aôndo u mimi ga la yô, una fatyô u ungwan mbamsen mba uprofeti nav ga. Tsô uprofeti mba Baal lumun ér vea er msen. Ve er msen taver taver gbem je yô, ve gema ngoron a ngor, kpa wase ve ga! Bibilo ôr kwagh u za hemen yô, ér: “Imo lu ga, mô kpaa bugh zwa ga, mô wa ikyo kpaa ga.” (1 Utor 18:29) Kpa Eliya eren msen yô, nyi i ere?
Eliya kuren msen yô, Aôndo na ungwa msen na la her ave ave; Aôndo tindi usu sen sha va hia nagh ku Eliya penda sha atse la vindi vindi. Kwagh u profeti Eliya er la kaha kposo a uprofeti mba Baal nena? Kwagh u una wase u u fan mkposo shon yô, ka kwagh u vesen u Eliya ter ken msen na u i nger ken 1 Utor 18:36, 37 la. Msen la lihe ga cii. Ken zwa Heberu u yange i hii ngeren Bibilo ker la yô, msen shon ngu asember 30 nahan tseegh. Eliya yange er msen la tiônôô, kpa yila Aôndo sha iti na i Yehova la ken msen shon kwa tar.
Baal lu aôndo u Mbakanaan. Inja i iti i Baal la ér “or u kwagh,” shin “orvesen.” Mbaaôndo mbagenev kpishi mba ior civir sha ajiir a ve la kpa i yilan ve sha iti i Baal. Nahan kpa, iti i Yehova la yô, ma aôndo ugen môm ngu a mi ga. Ka a ter i yô, i lu Aôndo môm tseegh i ôron kwagh na ye, un u a hembe sha man shin tar cii la. Aôndo ne yange kaa a ior nav ér: “Ka Mo [Yehova], ka iti yam je ne; icivir Yam Me na orgen ga.”—Yesaia 42:8.
Aôndo yange ungwa msen u Eliya la kua msen u uprofeti mba Baal mbara ciili? Mcivir u Baal yange na aeren a ior kôr kunya kpishi, sha ci u ve lu sôron akombo sha idya shi kôron ior nanden iniav a mi je kpaa. Kpa mcivir u Yehova yô, yange na ior nav, Mbaiserael lu a icivir, shi ve due ken aeren a kunya la kera. Hen ase sha kwagh ne: Aluer u nger washika hen ijende you i ior ve ne nan civir kpishi nahan, u lu ishimaveren wer ishima washika shon una za hen ana? U lu a ishimaveren wer una za a lu hen orgen u ior ve ne nan icivir er ijende you ga, shi i fe nan a ieren i tesen ér hanma kwagh u dedoo u ijende you a tsua cii ka nan venda yôô? Ei, u lu ishimaveren nahan ga je ka u henen a hen ga!
Kwagh u Eliya ôr a uprofeti mba Baal sha tarnahan la tese ér Aôndo ungwan mbamsen mbagenev ga
Aluer ngu eren msen hen Yehova yô, u ngu eren msen ka hen Aôndo u a gbe akaa cii, u a lu Ter u uumace * la. Profeti Yesaia yange er msen hen a na kaa ér: “We [Yehova], U ngu Ter wase.” (Yesaia 63:16) Shi ka Yehova shon môm Yesu lu ôron kwagh na zum u ôr mkaanem man a mbahenen nav la ye, ér: “M ngu kôndon yemen hen Terem man Ter wen, kua hen Aôndo wam man Aôndo wen.” (Yohane 20:17) Yehova ka Ter u Yesu. Ka un a lu Aôndo u Yesu eren msen hen a na shi tese mbadondon un kpaa ér ve eren msen hen a na ye.—Mateu 6:9
Bibilo tese se ér se eren msen hen Yesu, shin hen Maria, shin hen uicighan mbaiorov, shin hen mbatyomovo? Ei, ka hen Yehova Aôndo tseegh. Nenge ase atôakyaa a ahar ne. Hiihii yô, msen ka gbenda u civir Aôndo, shi Bibilo kaa ér ka Yehova tseegh i gbe u se civir un ye. (Ekesodu 20:5) U sha uhar yô, Bibilo pase se ititom i Yehova igen kpaa, ér ‘Aôndo u ungwan msen.’ (Pasalmi 65:2) Shin er Yehova ka a na ior ityom na igen kpishi nahan kpa, tom u ungwan msen la yô, mayange je ngu a na orgen ga. Yehova ka Aôndo u a tende zwa ér una ungwan mbamsen asev iyol na yô.
Nahan aluer u soo wer Aôndo a ungwan mbamsen ou yô, umbur kwaghwan u Ruamabera ne, a kaa ér: “Hanma or u nan yer sha iti i Yehova yô, a yima nan.” (Aerenakaa 2:21) Kpa aluer se er msen hen Yehova yô, una gba ungwan msen shon tsô sha ci u se er msen la ka hen a na yumu? Shin kwagh ugen kpa ngu u i gbe u se fa sha kwagh u msen, u aluer se mba dondon ve Yehova una ungwa mbamsen mba se eren hen a na yôô?
^ Ikyum. 9 Atindi a ukwaghaôndo mbagenev tese ér aluer or yila Aôndo sha iti na kpôô kpôô la yô, ka kwaghbo, kua ken msen je kpaa. Nahan kpa, iti la due ken Ubibilo mba yange i nger sha hiihii la kuma er ajiir 7,000 nahan, ken ijô i yange i hii ngeren Bibilo ker la. Ajiir agen kpishi i ter iti shon ken mbamsen man upasalmi mba ior mba ve civir Yehova sha mimi yô.