Pure

2 Ia vai?

E HAERE anei te mau pure atoa i te hoê â vahi, noa ˈtu e o vai te iˈoa aore ra te atua e purehia ra? I teie mahana, o te ohipa ïa e ravehia ra. E rave rahi taata te au i teie manaˈo. Te paturu ra ratou i te tahoêraa o te mau pǔpǔ faaroo e te farii ra i te mau haapaoraa atoa, noa ˈtu e e mea taa ê. Ua tano anei râ?

Te haapii ra te Bibilia e e rave rahi taime, aita ta te taata pure e tae ra i te vahi mau. I te tau a papaihia ˈi te Bibilia, e mea matauhia ia pure te taata i te mau hohoˈa otiotihia. Ua faaara pinepine râ te Atua no nia i tera peu. Ei hiˈoraa, te na ô ra te Salamo 115:4-6 no nia i te mau idolo: “E tariˈa to ratou, eita râ e faaroo.” Mea papu roa te manaˈo. No te aha e pure ai i te hoê atua e ore roa e faaroo ia oe?

Ta te hoê ïa faatiaraa oraora a te Bibilia e haamahitihiti ra. Ua tamata te peropheta mau ra o Elia i te mau peropheta a Baala ia pure i to ratou atua, i muri aˈe oia e pure ai i to ˈna. Ua parau atu oia e e pahono mai te Atua mau area te atua hape, eita ïa. Ua farii ratou i te tamataraa, e ua pure uˈana te mau peropheta a Baala ma te pii hua ˈtu—aita râ i pahonohia mai! Te na ô ra te faatiaraa: “Aita e parau, aore ratou i haapaohia mai.” (Te mau arii 1, 18:29) Ua aha râ Elia?

I muri aˈe i ta ˈna pure, ua pahono maira to ˈna Atua i tera iho â taime, ua mairi maira te auahi mai te raˈi mai, pau ihora te tusia ta Elia i pûpû. Eaha te taa-ê-raa? Hoê ïa parau faufaa roa to roto i ta Elia pure, tei papaihia i roto i Te mau arii 1, 18:36, 37. E pure poto roa hoi—tau 30 taˈo noa na roto i te reo Hebera. I roto noa râ i teie tau reni, e toru taime to Elia faahitiraa i te iˈoa iho o te Atua, Iehova.

O Baala, oia hoi te auraa “fatu” aore ra “o ˈna te fatu,” te atua a to Kanaana, e ua rau to ˈna huru atuaraa. E iˈoa otahi râ to Iehova, tei faaohipahia no te hoê noa Ihotaata i roto i te ao taatoa. Ua parau teie Atua i to ˈna mau taata: “O vau o Iehova, o to ˈu ïa iˈoa, e ore au e horoa i to ˈu ra hanahana no vetahi ê.”—Isaia 42:8.

Ua haere anei ta Elia pure e ta te mau peropheta a Baala i te hoê â vahi? Ua haaviivii te haamoriraa a Baala i te taata i ta ˈna peu taiataraa e faatusiaraa taata atoa. I te tahi atu pae, ua faarahi te haamoriraa a Iehova i to ˈna ra nunaa o Iseraela, ma te faatiamâ ia ratou i tera mau peu hairiiri. A feruri na: Ia faatae oe i te hoê rata i te tahi hoa ta oe e faatura rahi ra, e hinaaro anei oe ia horoahia ˈtu te reira i te tahi taata e iˈoa ê e e roo ino to ˈna, aita hoi e tuea ra i te huru o to oe hoa? Eita iho â ïa!

Ia pure oe ia Iehova, te pure nei ïa oe i te  Atua Poiete, te Metua o te huitaata. * “O oe, e Iehova, o to matou ïa metua,” ta te peropheta Isaia i pure. (Isaia 63:16) O Oia iho te Atua ta Iesu Mesia i faahiti ia ˈna i parau i ta ˈna mau pǐpǐ: “Te haere nei au i tau Metua ra e to outou Metua ra, e i tau Atua ra e to outou Atua ra.” (Ioane 20:17) O Iehova te Metua o Iesu. O Oia te Atua ta Iesu i pure e o ta ˈna i haapii i ta ˈna mau pǐpǐ ia pure.—Mataio 6:9.

Te haapii ra anei te Bibilia ia pure ia Iesu, ia Maria, i te mau peata, aore ra i te mau melahi? Aita, ia Iehova anaˈe. No e piti ïa tumu. A tahi, e huru haamoriraa te pure, e te na ô ra te Bibilia e o Iehova anaˈe te haamorihia e tia ˈi. (Exodo 20:5) Te piti, te faaite ra te Bibilia e teie to ˈna tiaraa “Tei faaroo i te pure.” (Salamo 65:2) Noa ˈtu e te opere maite nei oia i te ohipa, aita oia i horoa noa ˈˈe i teie hopoia i te tahi atu taata. O Oia te Atua o te fafau ra e na ˈna iho e faaroo i ta tatou mau pure.

No reira, ia hinaaro oe ia faaroohia mai ta oe mau pure e te Atua, a haamanaˈo i teie faaueraa a te mau Papai: “O te tiaoro . . . i te iˈoa o Iehova ra, e hope roa ïa i te ora.” (Roma 10:13) E faaroo anei râ Iehova i te mau pure atoa ma te maiti ore? Aore ra te vai ra ˈtu â te tahi mea te tia ia ite a hinaaro ai tatou ia faaroo mai Iehova i ta tatou mau pure?

[Nota i raro i te api]

[Hohoˈa i te api 5]

Ua haapapu to Elia tamataraa i te mau peropheta a Baala e eita te mau pure atoa e haere i te hoê â vahi