ИНМАР вань вӧсяськонъёсты кылэ-а? Туала вакытэ тросэз адямиос озьы малпало. Озьы малпало соос, кинъёс лыдъяло, Инмарлы вань религиос ярало шуыса. Нош зэмзэ ик-а Инмар вань вӧсяськонъёсты кылэ?

Библия верамъя, трос дауръёс ӵоже адямиос шонертэм вӧсяськизы. Соос вӧсяськизы киын лэсьтэм инмаръёслы. Инмар трос пол куриз соосты, соос озьы медаз вӧсяське шуыса. Тани мар верамын со инмаръёс сярысь Псалтирьын 113:12—14: «Вань соослэн пельёссы, но соос уг кыло». Соку кулэ-а вӧсяськыны инмарлы, кудӥз тӥледыз ноку но уз кылы?

Та юанлы Библиын трос саклык висъяське. Кылсярысь, зэмос Инмарлэн пророкез, Илия, ӵектӥз Вааллэн пророкъёсызлы, соос асьсэ инмарзылы мед вӧсяськозы шуыса, нош Илия аслаз Инмарезлы вӧсяськоз. Илия вераз, зэмос Инмар ответ сётоз шуыса, нош зэмос луисьтэмез — уз. Вааллэн пророкъёсыз туж кема вӧсяськизы, бадӟым куараен кесяськизы. Но ваньмыз юнме вал! Библиын верамын: «Куара-ланга но, ответ но ӧй вал, номыр ӧз кылӥськы» (3 Эксэйлыкъёслэн 18:29). Нош мар луиз, куке Илия вӧсяськиз?

Инмар соку ик вӧсяськемзэ кылӥз. Со инмысь тыл лэзиз но Илиялэсь ваем курбонзэ ньылӥз. Малы Инмар Илиялэсь вӧсяськемзэ кылӥз, нош Ваал аслэсьтыз пророкъёссэ — ӧз? Илия вакчияк вӧсяськиз ке но, солэн вӧсяськоназ мар ке но туж кулэез вал. Солэн вӧсяськонэз гожтэмын 3 Эксэйлыкъёслэн 18:36, 37. Вашкала еврей кылын отчы пыре ог 30 кыл гинэ. Озьы ке но отын Иеговалэн нимыз куинь пол пумиське.

Ваал «кузё» шуэм луэ. Со хананейёслэн инмарзы вал. Котькуд ёрослэн аслаз Ваалэз вал. Нош Иегова нимез нуллэ одӥг гинэ Инмар, кудӥз быдэс Дуннелы Инмар луэ. Тани мар вераз Инмар аслаз калыкезлы: «Мон — Кузё-Инмар [«Иегова», ВД], со — Мынам нимы, Аслэсьтым данме мукетлы уг сёты, вӧлыса лэсьтэм сульдэръёсты ушъяны уг лэзьы» (Исаия 42:8).

Вааллы йыбыртъясьёс туж урод ужъёсын выризы: соос вӧсяськон интыосазы азыса-калгыса улӥзы, адямиосты курбонэ вайылӥзы. Нош Иеговалы йыбыртъясьёс чылкак мукетэсь вал. Иегова дышетӥз аслэсьтыз калыксэ сыӵе ужъёслэсь палэнын возиськыны. Малпалэ ай: тӥ гажано эштылы гожтэт гожтӥды но табере сое ыстыны малпаськоды. Гожтоды-а тӥ конверт вылэ воксё мукет адямилэсь нимзэ, кудӥз урод ужъёс лэсьтыса улэ но эштылы пумит мынэ? Уд, дыр.

Иеговалы вӧсяськыкуды, тӥ вӧсяськиськоды Кылдытӥсьлы, адямиослэн Атайзылы a. Исаия пророк вӧсяськыкуз вераз: «Тон, Кузё-Инмаре,— милям Атаймы» (Исаия 63:16). Со ӵапак со Атай, кудӥз сярысь Иисус Христос вераз дышетскисьёсызлы: «Аслам Атае доры, тӥляд Атайды доры, Аслам Инмаре доры, тӥляд Инмарды доры, ӝутскисько» (Иоанн 20:17). Иисуслэн Атаез — Иегова. Со Инмар, кудӥзлы Иисус вӧсяськиз но кудӥзлы вӧсяськыны дышетӥз дышетскисьёссэ (Матфей 6:9).

Яра-а вӧсяськыны Иисуслы, Мариялы, святойёслы яке кылчинъёслы? Уг. Библиын верамын, Иеговалы гинэ вӧсяськыны кулэ шуыса. Малы? Нырысетӥез — вӧсяськон со Инмарлы йыбыртъян. Нош Библиын верамын, Иеговалы гинэ йыбыртъяны кулэ шуыса (Потон 20:5). Кыкетӥез — Библия верамъя, вӧсяськонъёсты кылзэ Иегова (Псалтирь 64:3). Инмар кылдытэмъёсызлы пӧртэм ужъёсты быдэсъяны лэзе ке но, вӧсяськонъёсты кылзыны со нокинлы но ӧз лэзьы. Соосты со кылзэ ачиз гинэ.

Тӥляд потэ ке, Инмар вӧсяськемдэс мед кылоз шуыса, Библиысь таӵе кылъёсты вунэтоно ӧвӧл: «Котькудӥз Кузё-Инмарлэн нимызлы тэльмырыса вазиськись мурт утемын луоз» (Апостолъёслэн ужъёссы 2:21). Нош кылэ-а Иегова вань вӧсяськонъёсты? Яке со милемыз мед кылоз шуыса, эшшо мае ке тодамы возёно на-а?