2 Kulie tu Suñamisa

Ohutililo?

ANGA HẼ, olohutililo viosi vi lingiwa vi enda kocitumãlo cimuamue, ndaño ka tua kũlĩhĩle kulie vi suñamisiwa? Koloneke vilo, omanu valua va siata oku kuata ovisimĩlo viaco, kuenda va sanjukila ocisimĩlo coku likongela kuatavo, oco va lingile pamosi efendelo. Kuenda va sima okuti, ndaño atavo aco a litepa, pole osi a taviwa la Suku. Anga hẽ, ocisimĩlo caco ca sunguluka?

Embimbiliya lilongisa okuti, olohutililo vialua ka via siatele oku lingiwa vonduko ya Suku, una o kuete ocikele coku vi yevelela. Kotembo Embimbiliya lia sonehiwa, omanu va enda oku likutilila koviñumañuma. Suku wa va lungula olonjanja vialua, oco va siepo ocituwa caco. Osamo 115:4-6 yi popia eci catiamẽla koviteka hati: “Vi [kuete ovatũi] puãi ka vi yevite.” Ondaka eyi yocili. Momo lie, o likutilila kosuku yimue okuti ka yi ku yevi?

Embimbiliya li situlula ondaka yaco. Uprofeto Eliya wa lipandela kovaso yovaprofeto va Baale oco va likutilile kusuku yavo, kuenje eye o likutililavo ku Suku yaye. Eliya wa va sapuila okuti, Suku yocili o tambulula olohutililo viafendeli vaye, pole, suku yesanda, ka yevelela olohutililo viafendeli vaye. Noke yoku tava kolondaka via Eliya, ovo va likutilila olonjanja vialua lolukandi, pole, Baale ka va tambuluile! Ulandu waco u popia hati: “Lomue wa tambulula, pamue oku va yeva.” (1 Olosoma 18:29) Pole, nye ca pita la Eliya?

Eci Eliya amala oku likutilila, Suku yaye wa tambulula lonjanga ohutililo yaye, poku tuma ondalu yokilu ya timiha ocilumba caye. Oku litepa kupi kua kala pokati kolohutililo vivali? Etambululo li sangiwa vohutililo Eliya a linga kelivulu lia 1 Liolosoma 18:36, 37. Ohutililo yaco, ya teta onimbu, kuenda kelimi lio Heveru, yi kuete lika akũi atatu kolondaka. Ndaño olondaka viaco via teta onimbu, pole, Eliya wa likutilila ku Suku, poku tukula onduko yaye Yehova, olonjanja vitatu.

Baale ci lomboloka “muẽleaco,” ale “cime.” Eye wa kala osuku ya va Kanana kuenda onduko yaye ya kuata alomboloko a litepa kovitumãlo vimue. Yehova, eye Suku o tukuiwa londuko yaco voluali luosi. Eye wa sapuila afendeli vaye hati: “Ame Yehova, oyo onduko yange. Ulamba wange siu weci kumue wiñi.”—Isaya 42:8.

Anga hẽ, olohutililo via Eliya, levi viovaprofeto va Baale via suñamisiwile kocitumãlo cimuamue, ndaño va likutilila kolosuku via litepa? Oku fendela Baale lovihilahila viavo viukahonga, oku kongelamo oku lumba omanu, ca enda oku sumuisa valua. Pole, efendelo lia Yehova lia kuatisa va Isareli, momo lia va teyuila kovihilahila viafendeli va Baale. Sokolola ndoco: Nda wa tuma ukanda umue kekamba liove wa sumbila calua, anga hẽ o tava okuti weciwa komunu ukuavo  ukuavituwa vĩvi via litepa levi viekamba liove? Ocili okuti, ku ci lingi!

Eci o likutilila ku Yehova, ci lekisa okuti, o kasi oku likutilila Kululiki, Isia yomanu vosi. a Uprofeto Isaya poku likutilila wa popia hati: “Ove u Yehova vuisietu.” (Isaya 63:16) Yehova eye Suku Yesu Kristu a tukula eci a sapuila olondonge viaye hati: “[Ndi londa] ku Tate kuenda ku Isiene, [ndi londa] ku Suku yange kuenda ku Suku yene.” (Yoano 20:17) Yehova eye Isia ya Yesu. Eye Suku una Yesu a tukula vohutililo, kuenda eye a longisa kolondonge viaye oku likutilila.—Mateo 6:9.

Anga hẽ, Embimbiliya li lekisa okuti tu sukila oku likutilila ku Yesu, ku Maria, kolosandu, ale kovangelo? Sio, hacoko. Tu sukila oku likutilila lika ku Yehova. Konomuisa ovina vivali ndeci: Catate, ohutililo yi panga onepa kefendelo lietu, kuenda Embimbiliya li lekisa okuti, Yehova eye lika tu sukila oku vumba. (Etundilo 20:5) Cavali, Embimbiliya li popiavo hati: ‘Yehova ukuakuyevelela olohutililo.’ (Osamo 65:2) Ndaño Yehova wa eca ovikele vialua ku vakuavo, pole, ocikele coku yevelela olohutililo, ci kasi lika peka liaye. Yehova Suku wa likuminya oku yevelela olohutililo viomunu lomunu.

Nda o yongola okuti Suku o yevelela olohutililo viove, ivaluka elungulo Liovisonehua li popia hati: “wosi o vilikiya onduko ya [Yehova] o popeliwa.” (Ovilinga 2:21) Anga hẽ, Yehova wa siata oku yevelela olohutililo viosi okuti ka vi tatekiwa? Ale kuli ovina vikuavo tu sukila oku linga oco a yeve olohutililo vietu?

[Atosi pombuelo yamẽla]

[Elitalatu kemẽla 5]

Ulandu wa Eliya kuenda wovarofeto va Baale wa lekisa okuti, olohutililo viosi ka suñamisiwa kocitumãlo cimuamue