ASAN ọvo yen ẹrhovwo rẹ avwanre eje ra otoro odẹ re se vwẹ ẹrhovwo na-a? Nonẹna, ihwo buebun roro ọtiọyen. Iroro nana je ihwo buebun ri kpo ẹga sansan re je guọnọ nẹ ihwo rhiabọreyọ koka koka rẹ ẹga ejobi. Ọ sa dianẹ iroro nana chọre?

Baibol na yonori nẹ ẹrhovwo buebun rẹ ihwo nẹ, ọ dia Ọghẹnẹ yen ayen nẹ rhe-e. Ọke re vwo si Baibol na, ihwo buebun vwẹ ọke yena nẹrhovwo vwo rhe ema. Jẹ, ọkieje yen Ọghẹnẹ vwọ vwẹ orhọn-esio phia fikirẹ uruemu yena. Kerẹ udje, Une Rẹ Ejiro 115:4-6 ta kpahen ema nẹ, “ayen vwo erhọn, ẹkẹvuọvo ayen nyo ẹme-e.” Ẹkpo na phẹnre. Kẹ diesorọ wọ vwọ nẹrhovwo rhe ọghẹnẹ ro che se nyo we bẹdẹ-ẹ?

Udje rẹ obo re rhiẹromrẹ ọvo nabọ dje ẹkpo nana fiotọ. Ọmraro rẹ uyota re se Ilaija da vuẹ emraro ri Baal nẹ ayen nẹrhovwo rhe ọghẹnẹ rayen, ayen de ru nu, oyen me rha nẹrhovwo rhe ọ rọyen. Ilaija tare nẹ Ọghẹnẹ rẹ uyota na cha kpahenphiyọ ẹrhovwo ẹkẹvuọvo, ọ re fian na cha kpahe-en. Emraro ri Baal rhọnvwephiyọ obo rẹ Ilaija tare na, ayen nẹrhovwo ọke grongron, jẹ ayen van gangan, ẹkẹvuọvo, ọghẹnẹ rayen kpahen kẹ aye-en. Ẹkpo ri Baibol na tare nẹ, “ohwo ọvuọvo nyori-i, ohwo ọvuọvo davwerhọ-ọ” (1 Ivie 18:29) Kidie yen phiare ọke rẹ Ilaija vwọ nẹrhovwo?

Ilaija vwọ nẹrhovwo nu, Ọghẹnẹ da ghwa kpahenphiyọ ugege yena, o de ji erhanre nẹ odjuvwu rhe re torhẹ izobo rẹ Ilaija na. Die yen ofẹnẹ na? Ẹkpo ọghanghanre ọvo hẹ evunrẹ ẹrhovwo rẹ Ilaija nẹre ra niyenrẹn rọyen phiyọ 1 Ivie 18:36, 37. Ẹrhovwo na krẹre mamọ, omarẹ eta 30 ọvo yen ẹrhovwo na vwẹ ephẹrẹ ri Hibru re vwo si Baibol na ẹsosuọ. Ẹkẹvuọvo, vwẹ ẹrhovwo ọkrẹkrẹ nana, Ilaija vwẹ oderhi rẹ Ọghẹnẹ rọ dia Jihova vwo se abọ erha.

Baal ro mudiaphiyọ “ọrovworo” yẹrẹ “onini,” na yen ọghẹnẹ rẹ ihwo rẹ Kenan, eghẹnẹ efa buebun je herọ re họhọ ọnana vwẹ Kenan. Jihova ọyen odẹ rẹ oghẹresan, ọyen ọvo yen vwo odẹ na vwẹ akpọ te odjuvwu. Ọghẹnẹ nana yen vuẹ ihwo rọyen nẹ, “Mẹvwẹ Ọrovwohwo [Jihova, NW ], ọye odẹ mẹ; urinrin mẹ me sa vwọ kẹ ohwo ọfa-a, eyẹ ejiro mẹ vwọ kẹ ema ra mare-e.”—Aizaya 42:8.

Ẹrhovwo rẹ Ilaija vẹ ọ rẹ emraro ri Baal nẹre na, ohwo ọvo yen ẹrhovwo na bru ra? Ẹga ri Baal nẹrhẹ ihwo ri vwẹ ẹga kẹ vwobọ vwẹ izobo rẹ ihworakpọ vẹ iruemu rẹ ọfanrhiẹn. Vwẹ idjerhe rọ fẹnẹre, ẹga ri Jihova brọghọ phiyọ ihwo rọyen oma rọ vwo sẹro rayen vrabọ rẹ iruemu re chọre. Gbe di roro: Wo de si ọbe rhe ugbeyan wẹn ru wo mughọ kẹ mamọ, wo che rhẹro rọyen nẹ ọbe na bru ohwo ro vwo odẹ rọ fẹnẹ ọ rẹ ugbeyan wẹn na, ro ji vwo erharhe rẹ iruemu re fẹnẹ iruemu rẹ ugbeyan wẹn na? Wo che roro ọtiọyen phiephie-e!

Wọ da nẹrhovwo rhe Jihova, jẹ wọ nẹrhovwo rhe Ọmemama na rọ dia Ọsẹ rẹ ihworakpọ eje. * “E Ọrovwohwo, ọye Ọsẹ rẹ avwanre” eriyin ọmraro Aizaya tare vwẹ ẹrhovwo. (Aizaya 63:16) Ọnana dẹn yen Ohwo rẹ Jesu Kristi ta ota kpahen rọ vwọ vuẹ idibo rọyen: “Mi yerẹ bru Ọsẹ mẹ kugbe Ọsẹ rẹ ovwan, Ọghẹnẹ mẹ kugbe Ọghẹnẹ rẹ ovwan.” (Jọn 20:17) Jihova yen Ọsẹ ri Jesu. Ọyen Jesu nẹrhovwo rhe, ọyen o ji yono idibo rọyen nẹ ayen nẹrhovwo rhe.—Matiu 6:9.

Baibol na vuẹ avwanre nẹ a nẹrhovwo rhe Jesu, Meri, ihwo efuanfon yẹrẹ emekashi? Ẹjo—Jihova ọvo yen a nẹrhovwo rhe. Roro kpahen erọnvwọn ivẹ re sorọ. Ẹsosuọ, ẹrhovwo ọyen ẹbẹre ọvo rẹ ẹga, Baibol na vuẹ avwanre nẹ Jihova ọvo yen avwanre vwẹ ẹga kẹ. (Eyanno 20:5) Ọrivẹ, Baibol na dje kẹ avwanre nẹ Jihova vwo odova na ọ “ro nyo ẹrhovwo.” (Une Rẹ Ejiro 65:2) Dede nẹ Jihova vwẹ owian kẹ ihwo efa, jẹ ọ vwẹ owian rẹ ẹrhovwo na vwọ kẹ ohwo ọfa-a. Ọyen Ọghẹnẹ ro veri nẹ ọyen che nyo ẹrhovwo rẹ avwanre ohwo ọvuọvo.

Ọtiọyena, wọ da guọnọ nẹ Ọghẹnẹ nyo ẹrhovwo wẹn, gba karophiyọ ẹkpo ri Baibol nana: “kohwo kohwo ro se odẹ rẹ Ọrovwohwo na kọ cha rhọ.” (Iruo Rẹ Iyinkọn Na 2:21) Jihova kerhọ rẹ ẹrhovwo eje otoro obo ra nẹrẹ wa-an? Gbanẹ o vwo emu ọfa ro fori nẹ avwanre riẹn a da guọnọ nẹ Jihova nyo ẹrhovwo rẹ avwanre?