Thabelo

2 Ndi Nnyi Ane Ra Fanela U Mu Rabela?

NAA thabelo dzoṱhe dzi ya fhethu huthihi hu sa londwi uri ndi mudzimu ufhio ane ra khou mu rabela? Ṋamusi shangoni, zwo ḓowelea u humbula nga u ralo. Eneo mahumbulele a takalelwa nga vhathu vhanzhi vhane vha vanganya vhurereli, na vhane vha ṱoḓa uri vhurabeli hoṱhe vhu ṱanganedzee hu sa londwi nḓila dzaho dzo fhamba-fhambanaho. Naa ndi ngoho uri thabelo dzoṱhe dzi ya fhethu huthihi?

Bivhili i funza uri kanzhi vhathu a vha rabeli muthu o teaho. Musi Bivhili i tshi ṅwaliwa kale, zwo vha zwo ḓowelea uri vhathu vha rabele zwifanyiso zwo vhaḓiwaho. Naho zwo ralo, Mudzimu o vha kaidza lunzhi-lunzhi uri vha songo ita zwenezwo zwithu. Sa tsumbo, musi i tshi amba nga ha zwifanyiso Psalme ya 115:4-6 i ri: “I na nḓevhe, hone a i pfi.” Mbuno i tou vha khagala. A zwi pfali u rabela mudzimu ane a sa ḓo ni pfa.

Mafhungo ane a vha Bivhilini a pfalaho vhukuma a tikedza yeneyi mbuno. Muporofita wa ngoho Elia o itela khaedu vhaporofita vha Baali uri vha rabele mudzimu wavho, na ene a rabele wawe. Elia o amba uri Mudzimu wa vhukuma o vha a tshi ḓo fhindula nahone wa mazwifhi o vha a sa ḓo fhindula. Musi vha tshi pfa zwenezwo, vhaporofita vha Baali vho rabela vhukuma, nahone vha tshi tou zhamba—fhedzi a huna tsho bvelelaho! Mafhungo eneo a ri: “Hu si vhe na phindulo, na we a aravha, na we a pfa.” (1 Dzikhosi 18:29) Naho zwo ralo, ho bvelela mini musi Elia a tshi rabela?

Musi Elia a tshi rabela, Mudzimu wawe o mbo ḓi fhindula nga tshenetsho tshifhinga, a rumela mulilo u tshi bva ṱaḓulu wa fhisa tshiṱhavhelo tshe Elia a tshi ita. Phambano yo vha i ifhio? Hu na tshithu tshithihi tsha ndeme kha thabelo ya Elia yo ṅwalwaho kha 1 Dzikhosi 18:36, 37. Yo vha i thabelo pfufhi vhukuma—yo vha i tshi tou vha na maipfi a 30 fhedzi nga Luheberu lwa u thoma. Naho zwo ralo, kha yeneyo mitaladzi i si gathi, Elia o vhidza Mudzimu nga dzina ḽawe Yehova lu no swika luraru.

Baali, zwine zwa amba “muṋe,” o vha e mudzimu wa Vhakanana, nahone ho vha hu na miṅwe midzimu minzhi ya henefho. Naho zwo ralo, Yehova ndi dzina ḽo khetheaho ḽine ḽa shuma khae e Eṱhe fhethu hoṱhe. Onoyu Mudzimu o vhudza vhathu vhawe a ri: “Ndi Nṋe Yehova, ndi ḽone dzina ḽanga; u khoḓwa hanga a thi hu ṋei muṅwe.”—Yesaya 42:8.

Naa thabelo ya Elia na thabelo dza vhaporofita vha Baali dzo ya fhethu huthihi? Vhurabeli ha Baali ho vha vhu tshi katela vhathu vhe vha vha vha tshi rengisa mivhili na u ita zwiṱhavhelo zwa vhathu. U fhambana na zwenezwo, Yehova o vhudza vhathu vhawe vha Isiraele uri vha mu rabele nga nḓila i ṱhonifheaho, zwe zwa vha vhofholola kha maitele eneo a si avhuḓi. Nga zwenezwo, humbulani nga hazwo: Arali no vha ni tshi khou ṅwalela vhurifhi khonani yaṋu i ṱhonifheaho, naa no vha ni tshi ḓo ṱoḓa uri honoho vhurifhi vhu iswe kha muṅwe muthu ane dzina ḽawe ḽa  sa fane na ḽa khonani yaṋu na a re na bvumo ḽivhi ḽi sa fani na ḽa khonani yaṋu? Na khathihi!

Arali ni tshi rabela Yehova, ni vha ni tshi khou rabela Musiki, Khotsi a vhathu vhoṱhe. * Muporofita Yesaya o amba zwi tevhelaho kha thabelo yawe: “Khotsi-ashu ndi Iwe Yehova.” (Yesaya 63:16) Nga zwenezwo, ndi Ene we Yesu Kristo a vha a tshi khou amba nga hae musi a tshi vhudza vhatevheli vhawe uri: “Ndi a gonya, ndi ya ha Khotsi-anga a re Khotsi-aṋu; ndi ya ha Mudzimu wanga a re Mudzimu waṋu.” (Yohane 20:17) Yehova ndi Khotsi a Yesu. Ndi Mudzimu we Yesu a mu rabela na we a gudisa vhafunziwa vhawe uri vha rabele ene.—Mateo 6:9.

Naa Bivhili i ri vhudza uri ri rabele Yesu, Maria, vhakhethwa, kana vharuṅwa? Hai—i ri vhudza uri ri rabele Yehova fhedzi. Ṱolisisani zwiitisi zwivhili. Tsha u thoma, thabelo ndi tshipiḓa tsha vhurabeli, nahone Bivhili i ri vhudza uri ri gwadamele Yehova e eṱhe. (Ekisodo 20:5) Tsha vhuvhili, Bivhili i sumbedza uri ndi “Mupfi wa dzithabelo.” (Psalme ya 65:2) Naho Yehova a tshi ṋea vhathu vhanzhi vhuḓifhinduleli, yeneyi ndi ndugelo a sa athu i ṋea muṅwe muthu. Ndi Mudzimu ane a ri fulufhedzisa uri u ḓo ri thetshelesa ene muṋe.

Ngauralo, arali ni tshi ṱoḓa uri Mudzimu a thetshelese thabelo dzaṋu, humbulani nyeletshedzo i re Maṅwaloni ine ya ri: “Huno hu ḓo ri, ane a ḓo rabela dzina ḽa Murena [Yehova], u ḓo tshidzwa.” (Mishumo 2:21) Fhedzi naa Yehova u thetshelesa thabelo dzoṱhe, hu sa londwi nḓila ine ra rabela ngayo? Kana naa hu na zwine ra fanela u zwi ḓivha arali ri tshi ṱoḓa uri Yehova a thetshelese thabelo dzashu?

[Ṱhaluso i re magumoni a siaṱari]

[Tshifanyiso kha siaṱari 5]

Khaedu ye Elia a i itela vhaporofita vha Baali yo sumbedza uri thabelo dzoṱhe a dzi yi fhethu huthihi