LÓ NAAREʼ xidal buñ rony pensary que diti noʼ chú laapa guiquiinyibu órni gonyibu oración, portín guiráni radxinni ronoʼ Dios. Né scúca rony pensary tipnés buñ ni rony defender que guirá religión natzaayni. Per ¿nigolú guirá ndeʼ la?

Diti nacni scú, portín Xtiitz Dios raslooy que xidal oración ni buny buñ diti bunyibu láani lóo ni non ñonyibu láani. Ló dzú ni see órni cuá la Biblia, buñ buny oración nisló dioxh. Per Dios xidal buelt gochbu xcudxyibu que diti ñonyibu láani scú. Ló Salmo 115:​4-6 náni que guirá dioxhcu «noʼ guidiagni per diti labúu racadiagni». Nayadit rabexa texto reʼ láani: diti noʼ xi laa gony buñ oración toib dios ni diti labúu racadiag, ¿scú ja?

Par guienno láani, guisuidyno toib historia sacróyen de profeta xtuny Elías ro goloʼbu prueby sacerdotes xtuny Baal: Elías nanab xcalrracné Dios né sacerdotes nanab xcalrracné xtuny Baal, né nitisi ni nacapy naslooy chú ngú Dios ni nigolú. Profetas xtuny Baal gosaguel né gonabyibu xcalrracné xtioxhyibu. Xidal ór bunyibu láani per «diti noʼ chú cuapy, né diti noʼ chú bicadiag layibu» (1 Reyes 18:29). ¿Ngúca gosaclóo Elías la?

Yaca, suusipa bilox oración xtunybu Dios bixel guii par bisaʼijni ofrenda ni buny profeta reʼ. ¿Xí láani buny Elías ni diti buny stipnés? Ló oración ni buny Elías, rarexa galrranabdiitz reʼ, sieedni ló 1 Reyes 18:​36, 37. Ló oración dopien reʼ, ni nap treint diitz ló hebreo original, tzón buelt Elías bisetlaa laa Jehová.

¿Xigony gosac ndeʼ? Guisetnaladxno que Baal radudyni diitz «dueño», o «amo» ndeʼ góc dioxh xtuny buñ cananeos né goyoʼ xidal baales. Per laa Dios toibsi noʼ, portín diti noʼ stoib ni laa xomod láabu ló guidopynac Gudxlio né lainy guibá. Láacabu goniʼbu: «Naʼ ngú Jehová. Nga laaya; né diti radudi gloria xtuni guicaʼ stoib» (Isaías 42:8).

¿Labúu gonyno pensary que oración ni buny Elías né ni buny profetas xtuny Baal bidxinni ronoʼ toibsi Dios la? Yaca. Órni buny adoraryibu Baal buny sacrificaryibu buñ né bunyibu galyoxh nisló dioxhcu, buny buidyni xpensary buñ. Per adoración par Jehová gocni nayaa, diti buny lafuersni buñ ñony nitisi galyoxh. Nandxichno que oración ni buny Elías gocni par Jehová né diti bidxinni ronoʼ Baal. Nacni suusi órni toib buñ raxel guiich ronoʼ ximig ni napbu respet, per xalagary ngú radxinni ladxña stoib buñ mal.

Ni rony oración par Jehová cayonyibu láani ni bisaʼ guibá né Gudxlio, ni nac Bixios guirá buñgudxlio. * Profeta Isaías goniʼbu ndeʼ ló toib oración: «Looy, Jehová, naclo Bixiosdo» (Isaías 63:16). Jesús goniʼ de láabu órni gochbu xpiimbu ndeʼ: «Tzaʼya ronoʼ Bixiosa né Bixiosto, Dios xtuni né Dios xtunyto» (Juan 20:17). Pal Jehová nac Bixios Jesús, láaca láacabu ngú Dios ni Jesús bisetlaa órni buny oración né láacabu non guisetlaa xpiimbu órni gony oración (Mateo 6:9).

Per ¿rony mandary la Biblia gony buny oración a Jesús, a María, a santos o a ángeles la? Yaca, nosi Jehová ngú non gony buñ oración. Guisuidyno chop razón. Primer, portín oración nacni toib mod par gony adorarno Dios, né mod ná la Biblia nosi Jehová non gony adorarno (Éxodo 20:5). Ni rarop, portín Dios ngú «ni racadiag oración» (Salmo 65:2). Ma bidudybu tipnés xchiimbu a stipnés per noʼ toib ni diti ma bidudybu, láani ngú guicadiagbu oración xtunyno.

Scú láani, par labúu guicadiag Jehová oración xtunyno, nosi laabu non guiquiinno. La Biblia ná: «Guirá ni rasetlaa laa Jehová salaa» (Hechos 2:21). ¿Radudy ndeʼ diitz que racadiag Dios guirá oración ni rony buñ la? ¿O noʼra ni raquiin gonyno par guidiag Jehová oración xtunyno la?