SI ACERCA na rezo, manada religion el ta enseña que bien importante el posicion del diaton cuerpo y el maga palabra que ta usa kita. Pero, el Biblia ta ayuda kanaton entende que gendeh se bien importante na rezo sino tan focus este na mas importante aspeto del pregunta, “Paquemodo kita debe reza?”

El Biblia ta habla que el maga fiel siervo del Dios ya reza na diferente lugar y na diferente posicion del cuerpo. Ya reza sila silencio o suena depende na diila circumstancia. Ya reza sila mientras tan tanga na cielo o mientras ta agacha. En vez de usa maga imagen, rosario o prayer book na diila rezo, ta reza sila con todo corazon usando el diila mismo palabra. Porque ya oi el Dios con el diila maga rezo?

Como cosa ya menciona del ya pasa articulo, ya reza sila con el un Dios lang—con Jehova. Tiene pa otro razon si porque ya oi con el diila rezo. Puede kita le na 1 San Juan 5:14: “El diaton comfianza con el Dios amo este: Asegurao kita que maskin cosa ta pidi kita con Ele comforme na su querer, Ele ay oi canaton.” El diaton maga rezo necesita uyun na querrer del Dios. Cosa se quierre decir?

Para puede reza uyun na querrer del Dios, necesita kita sabe si cosa el de suyu querrer. Entonces, necesita kita estudia con el Biblia para queda aceptable el diaton rezo. Quierre decir ba de este que gendeh kanaton oi el Dios si nuay kita cosa tanto sabe na Biblia? Gendeh, pero ta expecta el Dios que aprende kita acerca na de suyu querrer, pricura entende con ese y aplica con ese. (Mateo 7:21-23) Necesita kita reza harmonia na cosa kita ya aprende.

Mientras ta aprende kita acerca con Jehova y con el de suyu querrer, hay queda fuerte el diaton fe—otro cosa que importante na rezo. Si Jesus ya habla: “Maskin cosa ustedes ay pidi con fe na de ustedes maga rezo, ay recivi gayot ustedes.” (Mateo 21:22) Si tiene kita fe, gendeh se quierre decir que ta creé lang kita maskin nuay prueba. Sino, quierre decir de este que ta creé kita con el un cosa maskin gendeh kita ta puede mira cay tiene kita evidencia. (Maga Hebreo 11:1) El Biblia lleno de maga evidencia que si Jehova, con quien gendeh kita ta puede mira, amo un real Persona, puede kita confia y quierre oi con el maga rezo de aquellos quien tiene fe con ele. Mas pa, puede kita pidi que dale kanaton mas grande fe y si Jehova bien quierre que dale kanaton el cosa kita necesita.—Lucas 17:5; Santiago 1:17.

Este pa el otro cosa que necesita kita si ta reza. Si Jesus ya habla: “Noay quien ay puede anda con el Tata si gendeh por medio dimio.” (Juan 14:6) Poreso, si Jesus el manera para puede kita atraca con el Tata, si Jehova. Poreso, ya habla si Jesus con el de suyu maga siguidores que reza na de suyu nombre. (Juan 14:13; 15:16) Pero, gendeh se quierre decir que debe kita reza con Jesus. Sino, reza kita na nombre de Jesus y acorda que si Jesus el razon si porque kita puede atraca con el diaton perfecto y sagrao Tata.

El maga apostoles de Jesus ya pidi con ele: “Maestro, insiña canamon reza.” (Lucas 11:1) Gendeh sila ta pregunta acerca na maga cosas que nuevo lang kita ya discuti. Sabe ya sila se. Sino, dol ta pregunta sila, ‘Acerca na cosa kita debe reza?’