THLACAMNAK kong he aa tlaiin biaknak tampi nih umtu ning, hmanmi biafang le phunglam hna kha biapi ah an chiah. Asinain Baibal nih mah thil hna nakin “zeitindah thla kan cam awk a si” timi biahalnak kha biapi ah chiah dingin a kan bawmh.

Hmun dangdang le umtu ning a phunphun in thla a cammi zumhfekmi Pathian salle pawl kong kha Baibal ah a langhter. Thil sining ruangah cheukhat nih a thli tein an cam i cheukhat nih cun awthangpi in an cam. Cheukhat nih vanlei hoih in an cam nain cheukhat nih cun lukhun buin an cam. Cun thla an cam tikah milem, ṭhi le thlacamnak cauk hna kha hmang loin anmah pumpak biafang tein zalawng tein an cam. An thlacamnak kha Pathian nih zeicah a ngaihpiak hna?

A hmasa capar ah a langhter cang bantukin Jehovah timi Pathian pakhat sin lawngah thla an cam caah a si. Cun a dang a biapimi a kong kha 1 Johan 5:​14 ah hitin a langhter: “Amah duh ningin kan hal ahcun, kan halmi paoh kha a kan pek hrimhrim lai ti kan zumh caah Pathian cu ṭihnak zeihmanh um loin kan fuh ngam.” Cucaah kan thlacamnak cu Pathian duhmi ningin a si a hau. Mah cu zei sullam dah a si?

Pathian duhmi ningin thla kan cam khawh nakhnga Pathian duhmi cu zeidah a si ti kha kan hngalh a hau. Thalcamnak caah a biapi tukmi thil pakhat cu Baibal hlathlainak a si. Baibal lei fimnak kan ngeih lo ahcun Pathian nih kan thlacamnak a ngai lai lo tinak a si maw? A si lo. Pathian nih a duhnak kong kha hngalhthiam awkah an cawn lai i mah ningin an zulh lai tiah aa ruahchan. (Matthai 7:​21-​23) Cucaah kan cawnmi ningin thla kan cam a hau.

Jehovah le a duhnak kong kha kan hngalh ahcun kan zumhnak zong a fek chin lai. Jesuh nih hitin a ti: “Nan zumh ahcun thlacamnak in nan halmi paoh kha nan hmuh lai.” (Matthai 21:22) Zumhnak timi cu fawi tein zumh kha a chim duhmi a si lo. Mah canah hmuh khawh lomi thil pakhatkhat zumh le langhtertu thil um loin zumh kha a chim duhmi a si. (Hebru 11:1) Baibal ah kan hmuh khawh lomi Jehovah Pathian cu a um taktakmi a si, zumh khawh a si i amah a zummi hna thlacamnak kha a ngaihpiak hna ti a langhtertu thil tampi a um. Mah lengah zumhnak kan ngeih deuh nakhnga thla kan cam khawh i Jehovah zong nih kan herhmi kha pek a kan duh.​—Luka 17:5; Jeim 1:​17.

Cun zeitindah thla kan cam awk a simi timi kong he aa tlaiin a dang a biapimi thil pakhat a um rih. Jesuh nih hitin a ti: “Keimah sinin ti dah lo cun ahohmanh Pa sin an phan kho lo.” (Johan 14:6) Cucaah Jesuh cu kan Pa Jehovah sinah kan phanh khawhnak lam a si. Jesuh nih a zultu pawl kha a min in thlacam awkah a fial hna. (Johan 14:13; 15:16) Mah cu Jesuh sinah thla kan cam awk a si tinak a si lo. Mah canah Jesuh cu Pa Pathian sinah kan phanh khawhnak lam a si ti kha kan hngalh caah Jesuh min hmangin kan camnak a si.

Amah he aa naih bikmi a zultu pawl nih Jesuh kha “thlacam kan cawnpiak” tiah an rak ti. (Luka 11:1) Atu ah kan i ruahmi kong hna hi an halmi a si lo ti cu a fiang ko. A taktak ti ahcun ‘an thlacamnak ah zei kong hna dah an telh awk a si’ ti kha hngalh an duh caah a si.