Akam

3 Ikpọbọn̄ Didie?

SE EDIWAK ido ukpono ẹdade nte ata akpan n̄kpọ ke ini ẹbọn̄de akam edi nte ẹkpedade, se ẹkpetịn̄de, ye ido ubọn̄ akam. Edi Bible ọdọhọ ikûda mme utọ n̄kpọ oro nte akpan n̄kpọ, ke se ikpadade nte ata akpan n̄kpọ akam edi, “Ikpọbọn̄ akam didie?”

Bible etịn̄ aban̄a mme anam-akpanikọ asan̄autom Abasi emi ẹkebọn̄de akam ke nsio nsio ebiet ye ke nsio nsio usụn̄. Mmọ ẹma ẹbọn̄ akam uyo ọwọrọ m̀mê ẹbọn̄ ke esịt ẹtiene nte idaha mmọ akayakde. Mmọ ẹma ẹmenede ibuot ke enyọn̄ mîdịghe ẹsụk iso ke isọn̄ ke ini ẹbọn̄de akam. Utu ke ndikama mbiet, n̄kwa, m̀mê n̄wed akam, mmọ ẹkesida ikọ idemmọ ẹtịn̄ se isịnede mmọ ke esịt. Nso ikesinam Abasi okop akam mmọ?

Nte iketịn̄de ke udiana ibuotikọ, mmọ ẹkesibọn̄ akam ẹnọ Abasi kiet kpọt—Jehovah. Odu ata akpan n̄kpọ en̄wen emi anade iti. Akpa John 5:14 ọdọhọ ete: “Uko eke nnyịn inyenede iban̄a enye edi emi, ite, se ededi oro nnyịn iben̄ede ekekem ye uduak esie, enye ọbiọn̄ utọn̄ ke eben̄e nnyịn.” Ana akam nnyịn ekem ye uduak Abasi. Nso ke oro ọwọrọ?

Man akam nnyịn ekem ye uduak Abasi, ana ifiọk se uduak Abasi edide. Ntem, ndikpep Bible edi akpan n̄kpọ kiet ke ndibọn̄ akam. Ndi emi ọwọrọ ke Abasi idikopke akam nnyịn tutu nnyịn idedi nta mme ọfiọk a-Bible? Baba, edi Abasi oyom nnyịn ikpep iban̄a uduak imọ, ifiọk, inyụn̄ inam mmọ. (Matthew 7:21-23) Ana akam nnyịn odu ke n̄kemuyo ye se ikpepde.

Adan̄a nte nnyịn ikpepde iban̄a Jehovah ye uduak esie, ntre ke nnyịn ididọdiọn̄ inyene mbuọtidem—kpa akpan n̄kpọ en̄wen emi ẹyomde ke ini ẹbọn̄de akam. Jesus ọkọdọhọ ete: “Kpukpru n̄kpọ eke mbufo ẹben̄ede ke akam, ẹma ẹnyene mbuọtidem, mbufo ẹyebọ.” (Matthew 21:22) Mbuọtidem iwọrọke owo ndinịm n̄kpọ nnan nnan. Utu ke oro, enye ọwọrọ edinịm se owo mîkwe, akpan akpan ke ini akpan uyarade odude ke n̄kpọ emi odu. (Mme Hebrew 11:1) N̄kpọ ẹyọyọhọ Bible ndiwụt ke Jehovah, emi nnyịn mîkemeke ndikụt, odu, edi se ikemede ndiberi edem, onyụn̄ enyịme ndiyere akam mbon oro ẹbuọtde idem ye enye. N̄ko-n̄ko, nnyịn imekeme ndiben̄e enye kpukpru ini ite anam mbuọtidem nnyịn etetịm okpon, ndien Jehovah esima ndinọ nnyịn se iyomde.—Luke 17:5; James 1:17.

Odu akpan n̄kpọ en̄wen oro owụtde nte ikpọbọn̄de akam. Jesus ọkọdọhọ ete: “Baba owo kiet itieneke Ete ibọhọke ebe ke ami.” (John 14:6) Ntre Jesus edi n̄kukụre owo emi anamde nnyịn isan̄a ikpere Ete, kpa Jehovah.  Ntem, Jesus ọkọdọhọ mme anditiene enye ete ẹbọn̄ akam ke enyịn̄ imọ. (John 14:13; 15:16) Oro iwọrọke ke ikpọbọn̄ akam inọ Jesus. Utu ke oro, nnyịn ibọn̄ akam ke enyịn̄ Jesus, sia itide ke Jesus anam nnyịn ikeme ndisan̄a n̄kpere mfọnmma ye edisana Ete nnyịn.

Ini kiet, mme mbet oro ẹkekperede Jesus idem ẹkan ẹma ẹben̄e enye ẹte: “Ọbọn̄, kpep nnyịn ndibọn̄ akam.” (Luke 11:1) Anaedi idịghe mme n̄kpọ oro inemede mi ke mmọ ẹkeben̄e Jesus ekpep mmimọ. Mmọ ẹkenen̄ede ẹyom ndifiọk se ikpesịnde ke akam mmimọ—ke nditịm ntịn̄, ẹkebụp ẹte, ‘Ikpọbọn̄ akam iben̄e nso?’

[Se ẹwetde ke ikpọ abisi ke page 6]

Man ẹyere akam nnyịn, ana akam nnyịn ekem ye uduak Abasi, ana ibọn̄ akam ke mbuọtidem, inyụn̄ ibọn̄ ke enyịn̄ Jesus