ƆDZE FA mpaabɔ ho no, nyamesomfo pii twe adwen si mbrɛ ɔsɛ dɛ yɛyɛ hɛn adze, ibi nye mbrɛ ɔsɛ dɛ yegyina anaa yɛkotow hɔ, nsɛm a ɔsɛ dɛ yɛkã, nye amandze a ɔsɛ dɛ yɛyɛ. Naaso Bible no boa ma yehu dɛ onnyi dɛ yɛdze hɛn adwen si ndzeyɛɛ a ɔtsetse dɛm do, na mbom ɔwɔ dɛ yɛdze si asɛmbisa yi fã a no ho hia kɛse yi do, “Ebɛn kwan na ɔwɔ dɛ yɛfa do bɔ mpaa?”

Bible no kã Nyankopɔn n’asomfo anokwafo ho asɛm dɛ wɔbɔɔ mpaa wɔ akwan ahorow pii do. Nna wotum bɔ mpaa wɔ hɔn tsirmu anaa wɔbɔ no dzendzenndzen ma opuei hɔn ano, dɛ mbrɛ tsebea no bɛma kwan. Nna wotum ma hɔn tsir do hwɛ sor anaa wɔbɔ hɔn mu adze bɔ mpaa. Wɔammfa ehonyi, ahondze, anaa mpaabɔ buukuu biara enndzi dwuma, na mbom wofii hɔn akoma mu dze hɔnankasa hɔn nsɛm bɔɔ mpaa. Ebɛnadze na ɔmaa hɔn mpaabɔ no tuu mpon?

Dɛ mbrɛ yeedzi kan akã ho asɛm no, Nyankopɔn kor pɛ na wɔbɔɔ no mpaa​— na ɔno nye Jehovah. Adze fofor bi so wɔ hɔ a no ho hia. Asɛm a ɔwɔ 1 John 5:​14 no kã dɛ: “Ndam a yɛdze kɔ ne nkyɛn nye dɛ, sɛ yɛserɛ biribiara mbrɛ ɔpɛ a, otsie hɛn.” Ɔsɛ dɛ hɛn mpaabɔ nye Nyankopɔn n’apɛdze hyia. Iyi kyerɛ dɛn?

Sɛ yɛbɔbɔ mpaa ma ɔnye Nyankopɔn n’apɛdze ehyia a, ohia dɛ yehu n’apɛdze. Iyi kyerɛ dɛ ohia paa dɛ yesũa Bible no. Aso dza asɛm yi kyerɛ nye dɛ sɛ yɛannyɛ Bible ho abemfo a Nyankopɔn rinntsie hɛn mpaabɔ? Oho, ɔnntse dɛm, mbom no Nyankopɔn hwɛ kwan dɛ yebosũa dza ɔpɛ, na yaabɔ mbɔdzen atse ase, na yɛdze ayɛ edwuma. (Matthew 7:​21-​23) Ohia dɛ yɛbɔ mpaa ma ɔnye dza yesũa no hyia.

Aber a yesũa Jehovah n’apɛdze ho adze no, ɔma hɛn gyedzi mu yɛ dzen​— hɛn gyedzi so boa wɔ hɛn mpaabɔ mu. Jesus kãa dɛ: “Biribiara a hom bebisa no asɔr mu, na hom gye dzi no, hom nsa bɛka.” (Matthew 21:22) Gyedzi nnkyerɛ dɛ ebɛgye biribiara ato mu kɛkɛ. Mbom no, dza ɔkyerɛ nye dɛ ebɛgye biribi a innhunii a ɔwɔ dase a odzi mũ no ato mu. (Hebrewfo 11:1) Dase ahorow pii wɔ Bible mu a ɔkyerɛ dɛ Jehovah a yennhu no no wɔ hɔ ankasa, yebotum dze hɛnho ato no do, na ɔwɔ ɔpɛ dɛ obetsie hɔn a wɔgye no dzi no mpaabɔ. Nkyii so, yebotum aserɛ Jehovah aber nyina dɛ ɔmma hɛn gyedzi nyɛ kɛse, na n’enyi gye ho dɛ ɔbɛma hɛn dza yehia.​—Luke 17:5; James 1:​17.

Adze fofor bi so wɔ hɔ a ohia wɔ mbrɛ ɔsɛ dɛ yesi bɔ mpaa no mu. Jesus kãa dɛ: “Obi mmba ­Egya no hɔ, gyedɛ ɔnam mo do.” (John 14:6) Ntsi Jesus nye kwan a yebotum afa do abɛn hɛn Egya Jehovah. Jesus kãa kyerɛɛ n’ekyirdzifo no dɛ wɔmbɔ mpaa wɔ ne dzin mu. (John 14:13; 15:16) Iyi nnkyerɛ dɛ ɔwɔ dɛ yɛbɔ Jesus mpaa. Mbom no, sɛ yɛbɔ mpaa wɔ Jesus ne dzin mu a, ɔma yɛkaa dɛ ɔnam Jesus do na yetum twe bɛn hɛn Egya a ɔyɛ krɔnkrɔn na odzi mũ no.

Ber bi, Jesus n’ekyirdzifo a wɔbɛn no paa no bisaa no dɛ: “Ewuradze, kyerɛkyerɛ hɛn asɔr yɛ.” (Luke 11:1) Ɔda edzi dɛ nnyɛ ndzɛmba a ohia a yeesusu ho sesei no na nna woribisa no. Nna wɔpɛ dɛ wohu dza ɔwɔ dɛ wɔkã ho asɛm wɔ mpaabɔ mu​—ntsi wobisaa biribi tse dɛ, ‘Ebɛnadze na yɛmbɔ ho mpaa?’