E LEVU na lotu era dau kauaitaka ga vakalevu na yasana vakayago ni cabori na masu, me vaka na vosa e vakayagataki kina, na kena ivalavala, idabedabe se iduriduri mera muria. Ia e dusimaki keda na iVolatabu meda biuta tani na rai vakayago va qori da qai kauaitaka ga na ka e bibi cake. “Na ivalavala cava ni masu me muri?”

E tukuna na iVolatabu e sega ni dua ga na vanua era dau masu kina na tamata yalodina ni Kalou, e duidui tale ga na nodra iduriduri se idabedabe. Era dau masu lo se masu vakadomoilevu, e vakatau ena ituvaki. Era masu nira tacake i lomalagi se ra cuva. Era sega ni vakayagataka na ivakatakarakara, cokocoko se ivola ni masu me vukei ira, ia e vu mai lomadra na nodra masu. Na cava e rogoci kina na nodra masu?

Me vaka e tukuni ena ikarua ni ulutaga, era masu ga vua e dua na Kalou​—o Jiova. E dua tale na vuna bibi a rogoci kina na nodra masu. Eda wilika ena 1 Joni 5:14: “Ena levu ni noda nuitaki koya, eda kila se cava ga eda kerea me salavata kei na nona inaki, ena rogoci keda o koya.” O koya gona, na noda masu e dodonu me salavata kei na inaki ni Kalou. Na cava na kena ibalebale oya?

Me salavata na noda masu kei na inaki ni Kalou, e gadrevi meda kila mada e liu na nona inaki. E dua gona na ivukevuke yaga ni masu, na kena vulici na iVolatabu. Kena ibalebale oya ena rogoci keda ga na Kalou ke da vuku ena veika vakaivolatabu? Sega, na Kalou e vinakata meda vulica na nona inaki, meda kila na kena ibalebale da qai cakava sara. (Maciu 7:​21-23) E bibi me salavata na ka eda masulaka kei na ka eda vulica.

Nida vulica na veika me baleti Jiova kei na nona inaki, ena vakalevutaki na noda vakabauta​—qori e dua tale na ka e bibi ena masu. A kaya o Jisu: “Ena soli tale ga vei kemudou na ka kece dou kerea ena masu ke dou kerea ena vakabauta.” (Maciu 21:22) Na vakabauta e sega ni kena ibalebale na noda rawai rawarawa. E kena ibalebale ga na noda vakabauta e lomada ni tiko dina na ka e sega nida raica rawa, qai tu na kena ivakadinadina matata. (Iperiu 11:1) Eda sega ni raici Jiova, ia e vutucoqa tu ena iVolatabu na ivakadinadina ni bula dina tiko, e nuitaki, e tu vakarau tale ga me rogoca na nodra masu na vakabauti koya. E rawa nida kerea me vakalevutaki na noda vakabauta. E marau o Jiova me solia vei keda na ka eda gadreva.​—Luke 17:5; Jemesa 1:17.

Qo e dua tale na ka e bibi meda kila me baleta na ivalavala ni masu. A kaya o Jisu: “Ena vukuqu ga ena qai torovi Tamaqu rawa kina e dua.” (Joni 14:6) Ena vuku i Jisu duadua ga eda rawa ni  torova kina na Tamada o Jiova. Qori na vuna a tukuna kina o Jisu vei ratou na nona imuri me ratou masu ena yacana. (Joni 14:13; 15:16) E sega ni kena ibalebale oya meda masu vei Jisu. Ia eda masu ena yaca i Jisu nida kila ena vuku i Jisu ga eda rawa ni torova kina na Tamada e uasivi, qai yalosavasava.

Eratou kerei Jisu ena dua na gauna na nona imuri: “Turaga, vakavulici keitou mada me keitou kila na ivakarau ni masu.” (Luke 11:1) E macala ni ratou sega ni taroga tiko eke na veika eda sa veivosakitaka oti mai. Ia eratou via kila na cava me ratou masulaka​—e vaka sara ga eratou taroga, ‘Na cava me keitou masulaka?’