TOMADIHO oreadia momo be idia guriguri neganai idia gini, helai o kara ma ta idia karaia, eiava hereva momo idia gwauraia o boubou gaudia idia henia. To, Baibel ese ita ia durua unai gaudia ita laloa bada lasi, to inai mai anina bada henanadai ita laloa, “Edena dala ai ita guriguri be namo?”

Baibel ese ia hahedinaraia Dirava ena hesiai taudia be gabu idauidau ai idia guriguri neganai idia gini, helai, o tui diho. Edia noho dalana hegeregerena guriguri herevana be edia lalona dekenai idia gwauraia o idia gwauraia badabada. Idia guriguri neganai, edia kwarana idia abia isi o idia igo diho. Idia be kaivakuku, ageva, o buka ai idia torea guriguridia idia gaukaralaia lasi, to mai edia kudouna ibounai ida idia guriguri. Dahaka dainai Dirava ese edia guriguri ia kamonai?

Rau 4 ese ia hahedinaraia bamona, idia be Dirava tamona, Iehova, idia guriguri henia. To, mai anina bada gauna ma ta ia noho. Ioane Ginigunana 5:14 ia gwau: “Ita diba momokani, herevana dahaka ita gurigurilaia, bema unai be Dirava ena ura hegeregerena, ia ese ita do ia kamonai henia.” Dirava ena ura hegeregerena ai ita guriguri be namo. Unai ena anina be dahaka?

Dirava ena ura hegeregerena ita guriguri totona, namona be iena ura ita diba. Baibel stadilaia karana be guriguri ena kahana badana ta. Unai ena anina be Baibel ita diba momo neganai, Dirava ese iseda guriguri ia kamonai diba, a? Lasi, to Dirava ia ura iena ura ita dibaia, lalopararalaia bona unai hegeregerena ita kara. (Mataio 7:21-23) Ita dibaia gaudia hegeregerena Dirava ita guriguri henia be namo.

Iehova bona ena ura ita dibaia neganai, iseda abidadama do ia goada​—guriguri karana dekenai unai be mai anina bada gauna ta. Iesu ia gwau: “Gau ibounai guriguri dekenai do umui noinoi, mai emui abidadama danu, vadaeni do umui abia.” (Mataio 21:22) Abidadama ena anina be gau ibounai ita abia dae kava lasi. To, ena anina be gau haida ese idia hamomokania gauna ta ita abia dae, ena be eda matana amo unai gauna ita itaia lasi. (Heberu 11:1) Baibel lalonai hamomokania gaudia momo idia noho, bona idia hahedinaraia, Iehova, ita itaia diba lasi Diravana, be ia noho, ia dekenai ita tabekau bona Ia be mai ena ura ida ia idia abidadama henia taudia edia guriguri ia haerelaia. Danu, nega ibounai ia ita noia eda abidadama ia hagoadaia totona, bona Iehova ia ura iseda ura gaudia ia henia.​—Luka 17:5; Iamesi 1:17.

Ita guriguri dalana ma ta be inai, Iesu ia gwau: “Tamana dekenai do idia lao taudia ibounai edia  dala ta be lasi, lau sibona.” (Ioane 14:6) Unai dainai, Iesu dekena amo Iehova ita hereva henia diba. Iesu be ena murinai idia raka taudia ia hamaoroa iena ladana dekenai idia guriguri totona. (Ioane 14:13; 15:16) Unai ena anina be Iesu ita guriguri henia lasi, to iena ladana dekena amo Iehova ita guriguri henia diba.

Nega ta Iesu ena aposetolo taudia idia gwau: “Lohiabada e, guriguri oi hadibaia ai dekenai.” (Luka 11:1) Ia hahedinaraia, idia be guriguri lalonai edena bamona do idia kara totona idia henanadai lasi. To, idia ura guriguri ena anina idia diba​—unai be hegeregere idia gwau, ‘Dahaka gaudia do ai gurigurilaia be namo?’