FIILE relichieese kewoonheet iwich kepeet tuun fiil mools tsayche in was fer aat te mënx peete thërf, was xpreche un iwich rituaale. Awer ti Piipel tuun uns helfe tiise tinge neewe lose un mee acht kepe fer ti wichtiche phunkte fon tiise frooch: “Wii mise meyer peete?”

Ti Piipel xprecht iwich troy tiine fon Kot woo in unerxiitliche situatsioone un aate kepeet hon. Tëm noo wii, hon se heelich orer in een hat xtim kepeet. Wën se kepeet hon, hon se manich mool tsum himel kekukt orer sich kekniit. Xtats xtaatue penutse, rose krans orer puuch kepeete, hon se fom hërts kepeet un sayn xpiirunge fer Kot kexproch. Was hot keholef tas Yeehoowa tëne sayn kepeet keheert hot?

Tëm noo wii mer foer heer kesiin hon, tii hon sayn kepeete nuer fer eene Kot kemacht: Yeehoowa. Es kept noch een aner wichtiche phunkt. Meyer leese tas in 1te Yoohan 5:14 “Un tas is ti fertraung woo mer uf tëm hon: Tas is een tuun was mer ferlange, eyer heert uns wën tas mit sayn wile xtimt”. Unser kepeete mise xtime mit Kot sayn wile. Was petayt tas?

Fer in een aat peete woo xtimt mit Kot sayn wile mise meyer wise was tëm sayn wile is. Soo, is es aarich wichtich ti Piipel xtutiire fer mee iwer kepeete wise. Meecht tas petayte tas Kot ploos unser kepeete heert wën mer fiil khëntnis iwer ti Piipel hon? Nee, awer Kot waart tas mer lërne was sayn wile is un uns aan xtrenge fer tas se ferxteen un tëm noo leepe. (Matheus 7:21-23) Meyer mise peete tëm noo was mer lërne.

Soo lang woo mer iwer Yeehoowa un sayn wile lërne, kept unser klaape xtërke — een aner wichtiche phunkt iwich kepeete. Yeesus saat: “Un ales was teyer in kepeet ferlangt, un traan klaapt, tuut teyer es kriin.” (Matheus 21:22) Klaape hon is anerste wii aan ales traan klaape. Klaape hon petayt aan etwas klaape woo mer net siin khëne, awer woo taytliche pewaysunge hot, woo tas pay xteet. (Hepreeyer 11:1) In te Piipel kepst fiil pewaysunge tas Yeehoowa, woo mer net siin khene, reaal is, tas mer aan tëm traue khene un is wilich fer ti kepeete fon tëne woo aan tëm klaape, heere. Meyer khëne aach imer mee klaape ferlange un Yeehoowa kept uns mit frayt was meyer prayche. (Lukas 17:5; Tiako 1:17)

Es kep noch een aner wichtiche phunkt iwer kepeet. Yeesus hot kesaat: “Nimant khomt tsum Fater heekstens torich mich.” (Yoohan 14:6) Is torich Yeesus woo mer ticht tsu unser Fater, Yeehoowa khome. Soo, hot Yeesus sayn tisipele in kelërnt se peete in tëm sayn naame peete. (Yoohan 14:13; 15:16) Tas petayt net tas mer fer Yeesus peete sole. Meyer mise in Yeesus sayn naame peete, un uns erinere tas Yeesus is woos meechlich macht tas meyer ticht tsu unser perfëkte un hayliche Fater khome.

Selich mool, hon etliche fon Yeesus sayn tisipele fer tëm ferlangt: “Hër, lërn uns peete.” (Lukas 11:1) Kewis tas se net ploos ti keweenliche uersache wise wolte woo mer kraat kesiin hon. Was se wërklich wise wolte waar iwer was fer tinge se peete solte.