An Biblia yab tu ólchal jant’ini’ ti kwa’al ku k’wajiy tam ku oláts ani jawa’ tam kaw ki uluw. Pero tu ólchal abal wa’ats k’e’at jant’oj axi in lej tomnál ki t’aja’ ti kwéntaj.

An Biblia tu ólchal abal in t’ojnálil a Dios oláts ju’támakits ani jant’ini’ jajá’chik in lé’na’ ka k’wajiy. Talchik oláts kawidh, ani k’e’atchik expidh ti tsalápil. Wa’ats jita’chik in met’a’ abal ti éb ani k’e’at níbk’an ma Tsabál. Pero yabchik in eyendha’ i walekláb, nibal i rosarios abal ti ól. Expidh in uluw k’al in káwintal jawa’ in ats’álak. ¿Jalé’ ti a Dios in ats’a’ nixé’chik xi oláb?

Pel kom jajá’chik in eyendha’ an bijláb Jehová, ani i exóbna’its abal nixé’ pel jant’oj axi in tomnál ki t’aja’. Pero ti 1 Juan 5:14 in olnál k’e’at jant’oj axi jayej lej exbadh: «I éjtowal ki konoy jawa’ ki lé’na’, kom i tso’óbits abal max ki konchij ­jawa’ Jajá’ in kulbetnál, Jajá’ tu ats’ál». Tam, kwa’al ki konchij a Dios jawa’ Jajá’ in kulbetnál. ¿Jant’oj in lé’ kin uluw nixé’?

Ok’ox, kwa’al ki exla’ jant’oj játs axi in kulbetnál a Dios. Ani abal ki exla’, kwa’al ki exóbna’ an Biblia. A Jehová yab tu konchal ki lej exla’ tin kwéntaj an Biblia. Jawa’ Jajá’ in lé’, játs abal ki tsápnanchij ki exla’ jant’oj játs axi in kulbetnál ani ki t’aja’ (Mateo 7:21-23). Jawa’ ki exóbna’ ti Biblia ne’ets tu ku tólmiy abal ki exla’ jant’oj ki uluw ti oláb.

Tam ki exla’ más tin kwéntaj a Jehová ani jawa’ in kulbetnál, ne’ets ki bela’ más k’al Jajá’. Axé’ pel jant’oj axi jayej lej exbadh ki ko’oy, jaxtám a Jesús in uluw: «Patal jawa’ ka ­konchij a Dios, Jajá’ ne’ets ti ­pidha’ max chubax a lej belálits, k’al patal a ichích» (Mateo 21:22). Ki ko’oy i belomtaláb pel ­ki bela’ k’al jant’oj axi yab tejwa’. Pero yab in lé’ kin uluw abal ne’ets ki bela’ k’al jant’ojákits axi ku uchan (Hebreos 11:1). Yab i éjtowal ki tsu’uw a Jehová, pero an Biblia tu tejwamédhanchal abal chubax ejat, u tólmix ani tu tók’tsinchal i olábil. Jajá’ yab ne’ets ka tsakuy max ki konchij tu ku tólmiy ki bela’ k’al Jajá’, kom Jajá’ in lé’ tu ku pidha’ patal jawa’ i yéjenchal (Lucas 17:5; Santiago 1:17).

Pero jayej, wa’ats k’e’at jant’oj axi in tomnál ki t’aja’ abal a Dios tu ku ats’anchij i olábil. A Jesús in uluw: «Expidh k’al naná’ ne’ets kit ulits k’al u Tátaj ti éb» (Juan 14:6). Axé’ tu exóbchal abal expidh i éjtowal ku utey k’al a Jehová, tin bij a Jesús. Jaxtám a Jesús in exóbchij in aykólil ka eyendhanchat in bij, tam kin ólonchij a Jehová (Juan 14:13; 15:16.) Tam ki eyendhanchij in bij a Jesús, yab in lé’ kin uluw abal k’wajat i ólonchal jajá’. Jawa’ in lé’ kin uluw játs abal expidh a Jesús in éjtowal tu ku tólmiy ku utey kál a Jehová, kom Jajá’ pel jun i Dios axi t’okat.

Jun a k’icháj, a Jesús uchan k’al jun in aykólil: «Tu ku exóbchij tu ól» (Lucas 11:1). ¿Walám játs kom yab in exlálak jant’ini’ ka oláts? Imbáj, jawa’ in lé’akchik kin exla’ játs jant’oj in éjtowalak kin konoy tin olábil.