OVANDU ovengi tji mave kumbu otja kozombazu zawo ve nomuano mbu ve kumba nu ve noviṋa mbi ve ungurisa. Ombeibela i tu vatera kutja atu ha yandja ombango koviṋa mbyo, nungwari tu yandje ombango kepuriro enanḓengu ndi: “Hapo matu sokukumba vi?”

Ombeibela i hungira ohunga novakarere va Mukuru ovaṱakame mbaave kumbu potuveze otuingi na momiano pekepeke. Owo aave kumbu ngumumu poo kotjinyo otja kongaro mu va ri. Owo aave kumbu amave tara kombanda poo ngunda ave ripete. Pendje nokuungurisa oviserekarera, oundjendje poo ozongumbiro nḓa tjangwa momambo, owo aave kumbu okuza komutima amave ungurisa omambo wawo oveni. Otjikwaye tji tja tjita kutja ozongumbiro zawo ze zuvirwe i Mukuru?

Otja tji pa raisiwa morupa ndwa kapita, owo aave kumbu ku Mukuru umwe uriri, Jehova. Pe nepu rarwe enanḓengu ndi ri ri mu 1 Johanes 5:14, ndi tja: “Eṱe tu yanḓipara komurungu waNdjambi, Eye tjinga ama zuvire ozongumbiro zetu tji matu ningire ngamwa otjiṋa otja kombango ye.” Ozongumbiro zetu maze sokukara otja kombango ya Mukuru. Hapo iho matji hee tjike?

Kutja tu kumbe otja kombango ya Mukuru, rutenga matu sokutjiwa ombango ye. Ku nao, Omerihongero wOmbeibela ye tu vatera okukumba momuano omusemba. Hapo iho matji hee kutja Mukuru kamaa zuvire ozongumbiro zetu tji tu he rihongo Ombeibela? Kako, posi yokutja Mukuru u undjira ko kutja tu rihonge ohunga nombango ye, tu i zuve nawa nu tu toorere ko omikambo. (Mateus 7:21-23) Ongumbiro yetu mai sokuhitasana na imbi mbi matu rihongo.

Otja tji matu rihongo ohunga na Jehova nombango ye, ongamburiro yetu i kurira ko nu i tu vatera okukumba. Jesus wa tja: “Tji mu nongamburiro, eṋe mamu pewa ngamwa atjihe tji mamu ningire mongumbiro.” (Mateus 21:22) Ongamburiro kai hee okukambura motjiṋa uriri. Nungwari, i heya okukambura motjiṋa mena romapu omasemba nangarire kutja otjiṋa ho ko nokutjimuna. (Ovaheberi 11:1) Ombeibela ye ura nouatjiri wokutja Jehova ngu tu ha munu, okeri, omuṱakame nu u vanga okuzira ozongumbiro zaimba mbe nongamburiro mu ye. Nu wina, matu yenene okuningira Jehova kutja me tu wezire po ongamburiro, mena rokutja eye wa suvera okutupa imbi mbi matu hepa.—Lukas 17:5; Jakobus 1:17.

Jesus we tu raera otjiṋa tjarwe otjinanḓengu ohunga nomuano wokukumba. Eye wa tja: “Kape nomundu ngu ma i ku Tate nokuhinaami.” (Johanes 14:6) Ku nao eṱe tu pitira mu Jesus indu tji matu hungire ku na Tate, Jehova. Mena ranao, Jesus wa raera ovahongewa ve okukumba mena re. (Johanes 14:13; 15:16) Iho katji nokuheya kutja matu sokukumba ku Jesus. Nungwari, matu sokukumba mena ra Jesus, amatu zemburuka kutja eye ongwa tjita kutja tu yenene okukumba ku Tate wetu omuyapuke.

Ovahongewa va Jesus vopopezu otjikando tjimwe ve mu ningira kutja: “Muhona, tu honga okukumba.” (Lukas 11:1) Owo kaave vanga okutjiwa kutja mave sokukumba vi, tjimuna tji twa hungirire ko. Owo tjiri aave vanga okutjiwa kutja ve sokukumba ohunga na iye.

 [Epu enandengu]

Ozongumbiro ozombwa ze kara otja kombango ya Mukuru, ze kumbwa mongamburiro, nu ze pitira mena ra Jesus