Baka Ni Chara Iya?
MAYUH agama ngajar penyembah sida chara besampi. Tang sida suah agi ngemeratka penuduk tubuh, leka sampi tauka utai ke patut digaga maya besampi. Tang baka ni enggau ajar Bup Kudus? Nama ajar Bup Kudus pasal chara besampi?
Keterubah, aram kitai meda baka ni gaya nembiak Petara jeman kelia besampi. Bisi nya besampi dalam ati, lalu bisi nya mansutka leka jaku maya besampi. Sekeda besampi nunga ke langit, lalu sekeda da agi besugang. Enda ngira baka ni chara sida besampi, utai ti penting nya sida besampi ari ati sereta ngena leka jaku diri empu. Sida enda ngena bup sampi, patung, gambar tauka rosary.
Baka ke udah dikerandauka ba artikel sebedau tu, sampi semina ditujuka ngagai Petara Jehovah aja. Tang bisi siti agi utai ti penting. 1 John 5:14 madah, ‘Baka tu ku pemerani kitai di mua Petara, iya nya enti kitai minta sebarang utai nitihka peneka Iya, Iya ninga kitai.’ Nya alai, sampi kitai patut sejalai enggau peneka Petara. Tang, baka ni kitai ulih nemu peneka Petara?
Kitai patut bebendar belajarka Bup Kudus, ngambika ulih faham peneka Petara. Kati tu reti iya kitai patut nyadi pakar Bup Kudus? Enda. Tang Petara dekaka kitai naka ulih belajar, faham, enggau nitihka utai ti dipelajar.—Matthew 7:21-23.
Petara deka ningaka sampi ke sejalai enggau peneka Iya, bisi pengarap sereta dikenataika nengah nama Jesus
Mayuh agi dipelajarka kitai pasal Jehovah sereta peneka Iya, kering agi pengarap kitai. Tu meh siti ari kunchi ti penting lebuh besampi. Ku Jesus, “Enti kita arap, kita deka nerima sebarang utai ti dipinta kita dalam sampi.” (Matthew 21:22) Nama reti arap? Arap ukai reti iya pechaya pia aja. Tang, arap patut bepelasarka bukti. (Hebrew 11:1) Taja pan kitai enda ulih meda Petara, tang kitai agi ulih arapka Iya. Baka ni? Bup Kudus ngembuan mayuh bukti ke nunjukka Petara amat bisi, ulih dikearapka, sereta deka ninga sampi orang ke arap. Kelimpah ari nya, kitai mega ulih besampi ngagai Jehovah ngambika meri kitai pengarap ti tegut. Iya tentu nyaut sampi kitai.—Luke 17:5; James 1:17.
Bisi siti agi kunchi ke disebut Jesus ba John 14:6. Ku Jesus, ‘Nadai orang ulih datai ngagai Apai enti enda nengah aku.’ Tang, kati tu reti iya kitai patut besampi ngagai Jesus? Enda. Iya ke amat, sampi kitai patut dikenataika nengah nama Jesus. Nya baru Jehovah deka ninga sampi kitai.—John 14:13; 15:16.
Bisi sekali, bala rasul Jesus bejaku ngagai iya, ‘Tuan, ajar kami besampi.’ (Luke 11:1) Ketegal sida udah lama nyembah Jehovah, sida tentu nemu chara besampi. Nyadi, nama kebuah sida nanya munyi nya?
Nuan Engka Rindu Meda Tu
MENARA JAGA