ARU nga relihion i mangituddu nga kuruga importante i posision na baggi tam anna usu-usattam nga uvovug nu makimallo ittam. Ngem uffunan ittam na Biblia nga mammuan nu anni i talaga importante nu makimallo ittam.

Mabibbig tam ta Biblia nga nakimallo i aripan ira na Dios ta nadduruma nga lugar anna nadduruma i posision na baggida. Makafi i pakimallo na karuan anna maginna gapa i karuan. Nakimallo ira durante nga agga-tangag ta langi anna nakadukag gapa i karuan. Ari ira nangusa tu imahen, rosariu, prayer book onu karuan paga nga gannug tapenu makimallo, nu ari, napafutuan nga nakimallo ira anna ta sarilida nga uvovug. Ngatta sinabbag na Dios i pakimalloda ira?

Gitta na nakagi ta nappasa nga artikulo, kani Jehova nga Dios laman ira nakimallo. Egga paga i tadday nga rason nu ngatta sinabbag na Dios i pakimalloda. Mabibbig ta 1 Juan 5:14: “Masikan i pammakatalo tam ta Dios, ta ammu tam tu tangngagan na ittam ta anni laman nga kiddawat-tam sa nga metuttul ta uray na.” Mawag nga metuttul ta uray na Dios i pakimallo tam. Anni i kayà kagian natun?

Tapenu metuttul ta uray na Dios i pakimallo tam, mawag nga ammu tam i urena. Makua tam yatun nu gigiammuattam i Biblia. Megafu tatun, mammuattam nu anni i ipakimallo tam. Mawag kari nga ammuattam ngamin i naddian na Biblia tapenu ginnan na Dios i pakimallo tam? Ari, ngem ekspektanna nga ammuattam i urena, alippawatan yatun anna kuan i nagigiammu tam. (Mateo 7:21-23) Mawag nga makimallo tam segun ta nagigiammu tam.

Durante nga magigiammu tam i meyannung kani Jehova anna i urena, mattuyag i pangurug tam anna talaga importante yatun nu makimallo ittam. Kinagi ni Jesus: “Nu mangurug kamu, anni laman i kiddawan nu nikamu nga maddasal ay meyawa nikamu.” (Mateo 21:22) Arianna kayà kagian na kapeggan tu pangurug ay mangurug tam ta gannug nga awan tu ebidensiana. Kayà kagian natun nga egga i makasta nga rasottam ta kuru-kurugattam maski nu ariattam nga masingan yatun. (Hebreo 11:1) Napakaru ta Biblia i pamakurug nga maski ariattam masingan si Jehova, kurug yayya, uffunanna ittam, anna sigga-paran nga manabbag ta pakimallo danuri na mangurug tannisa. Kunne na paga, awayya tam kanayun nga ikiddaw kani Jehova nga pasikannanna i pangurug tam. Kakayàna nga iyawa i pakawagattam.​—Lucas 17:5; Santiago 1:17.

Egga paga i mawag nga daddammattam nu makimallo ittam. Kunni Jesus: “Awan tu makangay ta Yama nu ari labbi nga umay niakan.” (Juan 14:6) Awayya tam makimallo kani Jehova gukaban laman ni Jesus. Yatutta kinagi ni Jesus ta tagatuttulna ira nga makimallo ira ta ngaganna. (Juan 14:13; 15:16) Ari kayà kagian natun nga makimallo tam kani Jesus, nu ari, makimallo ittam ta ngagan ni Jesus. Daddammattam nga si Jesus i dalan tapenu makaranni ittam ta perfekto anna masanto nga Yama tam.

Mittan nikiddaw na apostol ira ni Jesus: “Afu, tudduan nakami bi tu makimallo.” (Lucas 11:1) Manawag nga ariadda iyavu nu kunnasi i makimallo. Aru ngana i ammuda meyannung tatun, ngem kayàda mammuan yaw: ‘Anni i ipakimallo mi?’