Kararag

3 Kasano?

ADU a relihion ti mangipagpaganetget kadagiti pisikal nga aspeto ti panagkararag, kas iti postura, mausar a sasao, ken ritual. Ngem ibatad ti Biblia a saan a rumbeng a dagita ti ipangpangrunatayo no di ket dagiti napatpateg nga aspeto ti saludsod a, “Kasano ti rumbeng a panagkararagtayo?”

Deskribiren ti Biblia dagiti matalek nga adipen ti Dios a nagkararag iti nagduduma a lugar ken posision. Nagkararagda a siuulimek wenno sipipigsa sigun iti kasasaadda. Dadduma ti nagkararag a nakatangad ngem adda met dagiti nakadumog. Imbes nga agusarda kadagiti imahen, rosario, wenno libro ti karkararag, sipapasnek ketdi a nagkararagda iti bukodda a sasao. Apay nga inimdengan ti Dios ti kararagda?

Kas nadakamat iti maikadua nga artikulo, inturongda dagiti kararagda iti maymaysa laeng a Dios a ni Jehova. Adda pay sabali a napateg a banag. Mabasatayo iti 1 Juan 5:14: “Daytoy ti adda kadatayo a panagtalek kenkuana, nga uray ania ti dawatentayo maitunos iti pagayatanna, denggennatayo.” No agkararagtayo, nasken a maitunos dagita iti pagayatan ti Dios. Ania ti kayat a sawen dayta?

Tapno maitunos iti pagayatan ti Dios dagiti kararagtayo, nasken nga ammuentayo no ania ti pagayatanna. No kasta, ti panagadal iti Biblia ket napateg a paset ti panagkararag. Kayat kadi a sawen dayta a saan nga umimdeng ti Dios no bassit ti ammotayo iti Biblia? Saan, ngem namnamaen ti Dios nga ammuentayo ti pagayatanna, tarusantayo dayta ken agtignaytayo maitunos iti dayta. (Mateo 7:21-23) Masapul nga agkararagtayo maitunos iti maad-adaltayo.

Bayat a maammuantayo ti maipapan ken Jehova ken iti pagayatanna, bumileg ti pammatitayo—a dayta ti sabali pay a napateg a banag maipapan iti kararag. Kinuna ni Jesus: “Amin a bambanag a dawatenyo iti kararag, nga addaankayo iti pammati, awatenyonto.” (Mateo 21:22) No addaantayo iti pammati, saan a kayat a sawen dayta a nalakatayo a mamatpati. Imbes ketdi, dayta ket panamati iti banag a saan a makita ngem paneknekan ti nabileg nga ebidensia. (Hebreo 11:1) Nakaad-adu ti pammaneknek iti Biblia a nupay saantay a makita ni Jehova, isu ket pudpudno, mapagtalkan, ken sidadaan a sumungbat kadagiti kararag dagidiay addaan pammati kenkuana. Kasta met, mabalintayo ti kanayon nga agkiddaw iti ad-adu a pammati, yantangay pagragsakan ni Jehova nga ipaay ti kasapulantayo.—Lucas 17:5; Santiago 1:17.

Adda pay maysa a nagpateg nga aspeto no kasano ti agkararag. Kinuna ni Jesus: “Awan ti umay iti Ama malaksid no baeten kaniak.” (Juan 14:6) Isu a ni Jesus ti dalan tapno makaadanitayo iti Ama a ni  Jehova. Gapuna, imbilin ni Jesus kadagiti pasurotna nga agkararagda iti naganna. (Juan 14:13; 15:16) Di kaipapanan dayta a ni Jesus ti pagkararagantayo. Imbes ketdi, agkararagtayo baeten ti nagan ni Jesus, a sipapanunottayo a nagbalin a posible ti iyaadanitayo iti perpekto ken nasantuan nga Amatayo maigapu ken Jesus.

Adda gundaway a kiniddaw idi dagiti nasinged a pasurot ni Jesus: “Apo, isurom kadakami no kasano ti agkararag.” (Lucas 11:1) Agparang a saan a dagiti nailawlawagen nga aspeto iti panagkararag ti kayatda a maammuan. Imbes ketdi, kayatda laeng a maammuan ti linaon ti kararag—a kas man la kunkunada, ‘Ania ti rumbeng nga ikararagmi?’

[Blurb iti panid 6]

Imdengan ti Dios dagiti kararagtayo no dagita ket maitunos iti pagayatanna, nabuyogan iti pammati, ken nayebkas baeten ti nagan ni Jesus