AKYU hpyi ai hte seng nna, nawku htung law law gaw hkrang nsam, ga si hte htung hking ni hpe madung da ma ai. Dai ni hta grau ahkyak ai gaw “gara hku akyu hpyi na” ngu ai re. Dai hpe madung da na matu Chyum Laika gaw anhte hpe karum ya na re.

Shara amyu myu, hkrang nsam amyu myu hte akyu hpyi wa ai Karai Kasang hpe sadi dung ai mayam ni a lam, Chyum Laika hta tsun da ai. Nkau gaw masa lam a majaw nsen n pru ai sha akyu hpyi wa ai zawn, nkau mi chyawm gaw nsen ja ja hte akyu hpyi wa ai. Nkau mi gaw lamu de mada yu nna akyu hpyi wa tim, nkau mi chyawm gaw baw gum nna akyu hpyi wa ai. Shanhte akyu hpyi ai shaloi sumla, kachyi, akyu hpyi laika buk ni hpe akyu n jashawn ai sha, shanhte a ga hte asan sha akyu hpyi wa ai. Shanhte a akyu hpyi ga hpe hpa majaw Karai Kasang madat ya wa ai kun?

Shawng na sumhpa hta tsun da ai hte maren, Yehowa ngu ai Karai Kasang langai hpe sha, shanhte akyu hpyi wa ai majaw re. Hpang na ahkyak ai lam langai hpe gaw Chyum Laika hta ndai hku tsun da ai: “Karai Kasang a myit ai hku hte maren, anhte lama ma hpyi ga yang gaw, shi anhte hpe madat mara na ra ai.” (1 Yawhan 5:14) Anhte a akyu hpyi ga ni gaw, Karai a myit ra ai lam byin na matu ahkyak ai. Hpa hpe tsun mayu ai kun?

Karai a myit ra ai hku akyu hpyi na matu, Karai a myit ra ai lam gaw hpa re ai hpe chye na matu ahkyak ai. Akyu hpyi ai hta ra ai madung lam gaw, Chyum Laika hkaja ai lam re. Chyum Laika ninghkring n rai yang, anhte a akyu hpyi ga ni hpe Karai Kasang n madat ya ai ngu ai lachyum kun? N re. Karai Kasang a myit ra ai lam hpe sharin la nna, dai hpe chye na hkra galaw ai sha n-ga, dai hte maren hkan galaw na matu Karai Kasang myit mada ai ngu ai lachyum re. (Mahte 7:21-23) Dai majaw, anhte chye na da ai lam ni hte maren akyu hpyi ra ai.

Yehowa Karai Kasang hte shi a myit ra ai lam hpe anhte chye na wa yang, anhte a makam masham mung grau nna ngang kang wa na re. Dai gaw akyu hpyi ai lam a ahkyak ai lam langai re. Yesu gaw “kam sham ai myit hte nanhte hpyi mahpyi mahkra hpe, nanhte lu la lu na ma ru ai” ngu tsun da ai. (Mahte 21:22) Makam masham ngu ai gaw, kam loi ai hpe tsun ai n re ai sha, n mu lu ai lam langai ngai hpe kam ai, ngang kang ai madi madun lam hte madi shadaw da ai makam masham hpe tsun mayu ai re. (Hebre 11:1) Anhte n mu lu ai Yehowa Karai Kasang gaw teng man ai, kamhpa mai ai, makam masham nga ai ni a akyu hpyi ga hpe madat ya mayu ai ngu ai madi madun lam ni Chyum Laika hta, grai law hkra lawm ai. Dai hta n-ga, makam masham grau nga wa na matu, Yehowa kaw galoi mung hpyi mai nna, shi nan mung anhte a ra kadawn lam ni hpe jaw mayu ai.​—Luka 17:5; Yaku 1:17.

Gara hku akyu hpyi ra na hte seng nna ahkyak ai lam langai naw nga ai. Yesu gaw “ngai hta nna n rai yang gaw, kadai mung nye Wa kaw n du wa lu ai” ngu tsun wa ai. (Yawhan 14:6) Dai majaw, Yesu kaw nna Wa Yehowa Karai Kasang hpang de anhte sit sa ra na re. Shi a amying hpe gang nna akyu hpyi na matu mung sape ni hpe Yesu tsun wa ai. (Yawhan 14:13; 15:16) Dai gaw Yesu hpe akyu hpyi ra na ngu ai lachyum gaw n re. Hkum tsup nna Chyoi Pra ai Wa hpang de, Yesu kaw nna akyu hpyi ra ai hpe chye da ai majaw, Yesu a amying gang nna akyu hpyi ai re.

Yesu hte grai hku hkau ai sape ni gaw ‘Madu e, anhte hpe mung akyu hpyi na sharin ya mi’ ngu nna san wa ai. (Luka 11:1) Mi hkaja mat ai lam ni hpe shanhte san nga ai n re. Akyu hpyi ai shaloi, ‘hpa lam ni hpe hpyi ging ai lam’ chye mayu ma ai re.