YĨLA andũ aingĩ meũvoya, mathĩnĩkĩaa mũno maũndũ ala menekee nĩ andũ, ta ũndũ mũndũ waĩle kũũngama, ndeto ila ũkũtũmĩa, na syĩthĩo sya ndĩni yoo. Ĩndĩ Mbivilia nĩtũtetheeasya kũtaanĩsya na maũndũ asu na tũithĩnĩkĩa ĩkũlyo yĩĩ ya vata, “Twaĩle kũvoya ata?”

Ve athũkũmi ma Ngai aĩkĩĩku mawetetwe Mbivilianĩ maivoya me kũndũ kwĩ kĩvathũkany’o na matailyĩ ũndũ ũmwe. Amwe mavoyie mate kumya wasya kana na wasya mũnene kwosana na vala maĩ. Namo angĩ mavoyie masyaĩtye ĩũlũ matunĩ kana makumanĩte. Ĩndĩ vandũ va kũtũmĩa mĩvw’anano, masoa, kana tũvuku twa mboya, mavoyaa kuma ngoonĩ na maitũmĩa ndeto syoo. Nĩ kyaũ kyatumie mboya syoo syĩw’ĩka?

O tondũ twaweta kĩlungunĩ kĩvĩtu, mavoyaa Yeova Ngai e weka. Ĩndĩ ve na ũndũ ũngĩ wa vata meekaa. Twĩũsoma nthĩnĩ wa 1 Yoana 5:14. Ĩandĩko yĩu yaĩtye: “Ũũ nĩw’o mũĩkĩĩo ũla twĩ naw’o nthĩnĩ wake, kana twavoya kĩndũ o na kĩva kwosana na kwenda kwake, nũtwĩthukĩĩasya.” Mboya sitũ nĩsyaĩle kwosana na kwenda kwa Ngai. Ũu nĩ kwasya ata?

Nĩ kana tũvoye kwosana na kwenda kwa Ngai, nĩtwaĩle kũmanya kwenda kwake nĩ kwĩva. Kwoou nĩ ũndũ wa vata mũno vyũ twĩmanyĩsye Mbivilia. Ĩndĩ ũu nĩ kwonany’a kana Ngai ndesa kũtwĩthukĩĩsya ethĩwa tũyaathi kũsomea Mbivilia? Aiee. Kĩla Ngai wendaa nĩ twĩkĩe kĩthito tũmanye kwenda kwake, na tũyĩka kwosana nakw’o. (Mathayo 7:21-23) Ĩtina wa ũu, twaĩle kũvoya kwosana na kĩla tweemanyĩsya.

O ũndũ twaendeea kwĩmanyĩsya ĩũlũ wa Yeova na kwenda kwake, now’o mũĩkĩĩo witũ ũlũlũmĩĩlaa, na mũĩkĩĩo ũsu nĩ ũndũ ũngĩ wa vata mũno yĩla tũũvoya. Yesũ aisye: “Syĩndũ syonthe ila mũkavoya mwĩ na mũĩkĩĩo, mũkakwata.” (Mathayo 21:22) Kwĩthĩwa na mũĩkĩĩo ti ũndũ ũmwe na kwĩtĩkĩlana na maũndũ ũteũsũanĩa. Ĩndĩ nĩ kwĩtĩkĩlana na kĩndũ nũndũ wĩ na ũĩkĩĩthyo mũlũmu mũno ĩũlũ wakyo, o na ethĩwa kĩndũ kĩu ndũkyonete. (Aevelania 11:1) O na kau tũitonya kũmwona Yeova, Mbivilia nĩtũnengete ũĩkĩĩthyo mwingĩ wa kana e kw’o, nĩ wa kwĩkwatw’a, na e na wendi wa kũsũngĩa mboya sya ala mamũĩkĩĩaa. O vamwe na ũu, no tũmũvoye Yeova atwongeleele mũĩkĩĩo, nake ndakalea kwĩka ũu nũndũ ethĩawa na wendi wa kũtũnenga kĩla twĩ na vata nakyo.—Luka 17:5; Yakovo 1:17.

Ve na ũndũ ũngĩ wa vata ũtũtetheeasya kũmanya ũndũ twaĩle kũvoya. Yesũ aisye: “Vaiĩ mũndũ wũkaa kwa Asa atesĩle kwakwa.” (Yoana 14:6) Kwoou Yesũ nĩwe nzĩa ya kũvika vala ve Asa witũ, Yeova. Nĩkyo kĩtumi weeie aatĩĩi make mavoyae ĩsyĩtwanĩ yake. (Yoana 14:13; 15:16) Ũu ti kwonany’a kana twaĩle kũvoya Yesũ. Ĩndĩ twaĩle kũvoya ĩsyĩtwanĩ ya Yesũ, tũililikana kana Yesũ nĩwe ũtumĩte twĩthĩwa tũtonya kũneena na Ĩthe witũ mũlũngalu na mũtheu.

Ĩvinda yĩmwe aatĩĩi ma Yesũ ala matindanasya nake mamwĩie: “Mwĩaĩi tũmanyĩsye kũvoya.” (Luka 11:1) Vate nzika, mayamũkũlasya amamanyĩsye maũndũ ma mũsingi ta ala twamina kũneenea. Mendaa mũno kũmanya ĩũlũ wa maũndũ ala maĩle kũweta mboyanĩ. Kwa nzĩa ĩngĩ makũlasya, “Twaĩle kũvoya ĩũlũ wa kyaũ?”