Samba

3 Inki Mutindu Beto Fwete?

NTANGU yo kelombaka kusamba, binkulu mingi ya mabundu ketulaka dikebi mingi na mambu ya kinsuni, mu mbandu pozisio, bangogo, mpi mambu ya kusala na ntangu ya kisambu. Kansi, Biblia kesadisa beto na kutula ve dikebi na mambu ya mutindu yai kansi na kutula dikebi na mambu ya kuluta mfunu ya ngyufula, “Inki mutindu beto fwete samba?”

Biblia ketubaka sambu na bansadi ya kwikama ya Nzambi nde bo vandaka kusamba na bisika mingi mpi na bapozisio ya kuswaswana. Bo vandaka kusamba na nsi ya ntima to na ndinga ya ngolo, na kutadila ntangu mpi bisika yina bo vandaka. Sambu na kusamba, bo vandaka kutala na zulu to kufukama. Na kisika ya kusadila bima bonso bifwanisu, bashapele, to babuku ya bisambu sambu na kusamba, bisambu na bo vandaka kukatuka na ntima mpi bo vandaka kusamba na bangogo na bo mosi. Inki kusalaka nde Nzambi kuwa bisambu na bo?

Mutindu disolo ya meluta kumonisaka yo, bo vandaka kusamba kaka Nzambi mosi: Yehowa. Kele ti dyambu yankaka ya mfunu. Beto ketanga na 1 Yoane 5:14 nde: “Beto ke na kikesa na kutelama na meso ya Nzambi sambu, kana beto ke lomba konso kima bonso kele luzolo na yandi, beto zaba mbote nde yandi ke wila beto.” Bisambu na beto fwete wakana ti luzolo ya Nzambi. Yo ketendula inki?

Sambu na kusamba na kuwakana ti luzolo ya Nzambi, beto fwete zaba inki kele luzolo na yandi. Yo yina, kulonguka ya Biblia kele kitini mosi ya mfunu ya kisambu. Keti dyambu yai ketendula nde Nzambi tabuya kuwa bisambu na beto kana beto kele ve bantu ya mayele yina kelongukaka Biblia? Ve, kansi Nzambi kelombaka nde beto longuka mambu ya metala luzolo na yandi, kusosa kubakisa yo mpi kusala na kuwakana ti yo. (Matayo 7:21-23) Beto fwete samba na kuwakana ti mambu yina beto kelongukaka.

Dyambu yankaka ya mfunu ya kisambu kele nde na ntangu beto kelongukaka mambu ya metala Yehowa ti luzolo na yandi, lukwikilu na beto keyelaka. Yezu kutubaka nde: “Konso kima yina ya beno ta lomba na bisambu na beno, kana beno ke tula ntima nde beno ta baka yo, beno ta baka yo kaka.” (Matayo 21:22) Kutula ntima to lukwikilu ketendula ve kukwikila na dyambu mosi kukonda banzikisa. Kansi, yo ketendula kukwikila na kima mosi ya kemonanaka ve, kansi ya mesimbama na banzikisa ya ngolo. (Baebreo 11:1) Biblia kele ti banzikisa mingi ya kemonisaka nde Yehowa, yina beto lenda mona ve, kele mpenza, nde beto lenda tudila yandi ntima, mpi nde yandi kele ti luzolo ya kupesa mvutu na bisambu ya bantu yina kekwikilaka na yandi. Dyaka, ntangu yonso beto lenda lomba lukwikilu mingi, mpi Yehowa kevandaka ti luzolo ya kupesa beto mambu ya beto kele ti yo mfunu.​—Luka 17:5; Yakobo 1:17.

Tala kitini yankaka dyaka ya mfunu ya kemonisa mutindu ya kusamba. Yezu kutubaka nde: “Ata muntu mosi ve lenda kwenda na Tata na nzila ya nkaka kana yandi kwisa na mono nzila ve.” (Yoane 14:6)  Ee, Yezu kele nzila yina beto lenda pusana penepene ya Tata, Yehowa. Yo yina, Yezu kusongaka balongoki na yandi na kusamba na zina na yandi. (Yoane 14:13; 15:16) Dyambu yai ketendula ve nde beto fwete samba Yezu. Kansi, beto kesambaka na zina ya Yezu, na kuyibukaka nde Yezu kele kikuma yina kesala nde beto pusana penepene ya Tata na beto ya kukuka mpi ya santu.

Kilumbu mosi, banduku ya ngolo ya Yezu kuyulaka yandi nde: “Mfumu, longa beto mutindu beto fweti samba.” (Luka 11:1) Yo kemonana nde, bo vandaka ve kulomba mambu bonso yina beto mekatuka kutubila. Bo vandaka mpenza ti mpusa ya kuzaba mambu ya kutuba na kisambu​—na kutuba ya kyeleka bo vandaka kutuba nde, ‘Sambu na nki mambu beto fwete samba?’

[Bangogo sambu na kubenda dikebi ya kele na lutiti 6]

Bisambu yina Nzambi kewaka kevandaka na kuwakana ti luzolo na yandi, yina beto kesalaka ti lukwikilu, mpi na zina ya Yezu