ПАЗЫРЫСТАҢАР чоох парза, кӧп кізі пазырчатса, хайди турарға, ниме тирге паза хайдағ религиознай кибірлернең тудынарға кирек тіп сағынчалар. Че Библия, андағ нимелерге хайығ салбин, мындағ ӧӧн сурыға хайығ салча: «Хайди пазырарға?»

Библияда Худайға киртістіг аймах-пасха нымысчылардаңар чоохталча. Олар пасха-пасха орыннарда паза пасха-пасха по́заларда пазырғаннар. Истілдіре алай постарының істінде, тигірзер кӧріп алай пастарын тӱзіріп пазырҷаңнар. Олар обырастарнаң, четкаларнаң алай молитвенниктернең тузаланмааннар, че прай чӱректерін азып пазырҷаңнар. Ноға Худай оларның пазырыстарын искен?

Мының алнындағы статьяда хайди чоохталған, олар пір ле Худайға — Иеговаа — пазырғаннар. Ағаа хоза, 1 Иоанның 5:14-те пазылча: «Піс Худайның кӧңніне кірчеткен нимелернің хайзын даа сурзабыс, Ол пісті исче. Аннаңар піс Худайдаң сурынарға туртухпинчабыс». Пістің пазырыстарыбыс Худайның кӧңнінҷе поларға киректер. Ниме анзы таныхтапча?

Худайның кӧңнінҷе пазырар ӱчӱн, аның кӧңніне ниме кірчеткенін пілерге кирек. Аннаңар Библияны ӱгренерге кирек. Библияны чахсы пілбинчетсебіс, Худай пазырыстарыбысты испес пе? Чох, истер, че Худай пісті аның кӧңнін пілерге, оңнирға паза аның кӧңнінҷе тудынарға кӱстензіннер тіп хынча (Матфей 7:21—23). Ідӧк піске алған пілістер хоостыра пазырарға кирек.

Иеговадаңар паза аның кӧңніне ниме кірчеткенін нинҷе піліп одырчабыс, анҷох киртінізібіс ӧсче. Пазырыста анзы уғаа аарлығ. Иисус теен: «Киртініп ала, Худайдаң ниме дее сурзаңар, ол нимені аларзар» (Матфей 21:22). Сын киртініс паза киртінҷек полғаны — ікі саңай пасха ниме. Кӧрінмес нимее киртініс ізестіг киречілестерде тӧстенерге кирек (Еврейлерге 11:1). Кӧзідімге, харахха кӧрінминчеткен Иегова сынап парына, хайдағ даа сидіктерде полыс поларына паза андар киртініснең айланчатханнарны исчеткеніне Библияда кӧп киречілестер пар. Ағаа хоза, піске кӧп арах киртініс пирзін тіп пазырарға чарир, Иегова, тізең, піске кирек нимені ӧрініснең пирер (Лука 17:5; Иаковтың 1:17).

Хайди пазырарынаңар паза пір аарлығ сағыс. Иисус теен: «Чол, Сын паза чуртас — Минмін. Мағаа киртінчеткен кізі ле Пабамзар пар полар, Мин чох пірдеезі пар полбас» (Иоанн 14:6). Піс Иеговаа Иисус пастыра ла чағдап поларбыс. Аннаңар Иисус ӱгренҷілерін, аның адын адап, пазырарға ӱгреткен (Иоанн 14:13; 15:16, НТ). Че анзы піс Иисусха пазырчатханыбысты таныхтабинча. Иисустың адын адап пазырчатсабыс, ах-арығ Пабабысха чағдап полчабыс.

Пірсінде Иисустың чағын ӱгренҷілері аннаң сурғаннар: «Хан-пигім! Син дее пісті... пазырарға... ӱгрет сал» (Лука 11:1). Ікінҷілес чоғыл, олар аннаң хайди пазырарға сурбааннар, че нимедеңер пазырарға кирек полчатханын піліп аларға хынғаннар.