WE I kam to prea, bɔku rilijɔn dɛn de pe atɛnshɔn mɔ to tin dɛn we pipul dɛn de si, lɛk fɔ tinap ɔ butu, di wɔd dɛn we dɛn de tɔk, ɛn sɛrimɔni. Bɔt di Baybul ɛp wi fɔ no se wi nɔ fɔ pe atɛnshɔn pan dɛn tin dɛn de bɔt wi fɔ pe atɛnshɔn pan di impɔtant pat na di kwɛstyɔn we se, “Aw wi fɔ pre?”

Di Baybul tɔk bɔt Gɔd in fetful savant dɛn we bin de pre difrɛn we dɛn ɛn na difrɛn ples dɛn. Bikɔs ɔf wetin bin de apin to dɛn, dɛn bin de pre kwayɛt wan ɔ lawd wan. Dɛn bin de luk ɔp di skay ɔ butu dɛn ed we dɛn bin de pre. Dɛn nɔ bin de yuz imej dɛn, bid dɛn, ɔ prea buk dɛn fɔ ɛp dɛn fɔ pre bifo dat, dɛn bin de pre frɔm dɛn at ɛn dɛn bin de yuz dɛn yon wɔd dɛn. Wetin mek Gɔd bin yɛri dɛn prea dɛn?

As wi bin dɔn tɔk na di atikul bifo dis wan, na wan Gɔd nɔmɔ dɛn bin de pre to we na Jiova. Wan ɔda impɔtant tin de we wi nid fɔ no. 1 Jɔn 5:​14 se: “Dis na di kɔnfidɛns we wi gɛt pan am se ilɛk wetin wi aks am fɔ, wans na dat i want, i de yɛri wi.” Wi prea dɛn fɔ gri wit wetin Gɔd want. Wetin dat min?

Fɔ mek wi prea go gri wit wetin Gɔd want, wi nid fɔ no wetin i want. We wi stɔdi di Baybul, dat go ɛp wi fɔ no aw fɔ pre. Fɔ se dat min se pas wi sabi di Baybul gud gud wan bifo Gɔd yɛri wi prea? Nɔ, bɔt Gɔd de ɛkspɛkt wi fɔ lan bɔt wetin i want, tray fɔ ɔndastand am, ɛn du am. (Matyu 7:​21-​23) Wi nid fɔ mek wi prea gri wit wetin wi de lan.

As wi de lan bɔt Jiova ɛn wetin in want, wi de gɛt fet mɔ ɛn mɔ; ɛn i impɔtant fɔ gɛt fet we wi de pre. Jizɔs bin se: “If una gɛt fet, una go gɛt ɔl wetin una de pre fɔ.” (Matyu 21:​22) We pɔsin gɛt fet nɔ min se i izi fɔ ful. Bɔt i min fɔ biliv pan sɔntin we gɛt strɔng pruf pan ɔl we yu nɔ de si am. (Ibruz 11:​1) Di Baybul gɛt bɔku pruf we sho se Jiova we wi nɔ de si, na rial pɔsin, wi kin abop pan am, ɛn i rɛdi fɔ ansa we di wan dɛn we gɛt fet pan am, pre to am. Dɔn bak, wi kin pre ɔltɛm fɔ mek wi gɛt mɔ fet, ɛn Jiova lɛk fɔ gi wi wetin wi nid.​—Lyuk 17:​5; Jems 1:​17.

Lɛ wi tɔk bɔt wan ɔda impɔtant tin bɔt aw fɔ pre. Jizɔs bin se: “Nɔbɔdi nɔ go kam to di Papa pas i pas tru mi.” (Jɔn 14:​6) So na tru Jizɔs wi fɔ pas fɔ pre to in Papa,  Jiova. Na dat mek Jizɔs bin tɛl di wan dɛn we bin de fala am fɔ pre insay in nem. (Jɔn 14:​13; 15:​16) Dat nɔ min se wi fɔ pre to Jizɔs. Bɔt wi fɔ pre insay Jizɔs in nem, fɔ mɛmba wi se na Jizɔs mek am pɔsibul fɔ mek wi ebul tɔk to wi Papa we pafɛkt ɛn oli.

Wan tɛm, Jizɔs in apɔsul dɛn bin tɛl am se: “Masta, sho wi aw fɔ pre.” (Lyuk 11:​1) Dɛn nɔ bin jɔs de aks bɔt di tin dɛn we wi dɔn tɔk bɔt. Dɛn bin rili want fɔ no wetin ɛn wetin fɔ de insay prea; so dɛn bin de tray fɔ aks se, ‘Wetin wi fɔ pre bɔt?’