Sambu

3 Aweyi Tufwete Sambila?

MABUNDU mayingi metokanenanga e mpila kafwete kala o muntu vava kesambanga, dina kevova ye dina kevanga. Kansi, Nkand’a Nzambi ukutulonganga twalembi landa mambu mama, kansi twasia e sungididi mu diambu diamfunu dia kiuvu kiaki: “Aweyi tufwete sambila?”

Nkand’a Nzambi uyikanga selo yakwikizi ya Nzambi ana balomba mambu ma mpila mu mpila mu sambu yo kala mu mpila yaswaswana. Basamba muna nsi a ntima yovo mu nding’angolo. Basengolanga meso kun’ezulu yovo fukama muna samba. Vana fulu kia sambila teke, sadila nsanga yovo nkanda mia sambu, basambanga ye nsi a ntima kwa Nzambi yo vova mana bayindulanga. Ekuma e sambu yau yawakananga kwa Nzambi?

Nze una uyikilu mun’elongi diviokele, e sambu yau kwa Nzambi mosi kaka yafilwanga, Yave. Vena mpe ye diambu diakaka diamfunu dilenda badikwa. Muna 1 Yoane 5:14 tutanganga vo: “I zau zizi e nkabu twina zau oku kwa yandi, ovo, konso una tulombela muna luzolo luandi, wa kekutuwá.” E sambu yeto ifwete kalanga e ngwizani ye luzolo lwa Nzambi. Adieyi disongele?

Muna samba e ngwizani ye luzolo lwa Nzambi divavanga vo twazaya nki i luzolo lwalu. Ikuma vo, o longoka Nkand’a Nzambi dilenda kusadisa mu samba. Nga diadi disongele vo Nzambi owá kaka e sambu yeto wau vo Nkand’a Nzambi tulongokanga? Ve, Nzambi edi kevavanga vo twazaya luzolo lwandi yo zingila e ngwizani yo luzolo lwalu. (Matai 7:21-23) E sambu yeto ifwete kalanga e ngwizani ye mana tulongokanga.

Ekolo tulongokanga oma ma Yave ye luzolo lwandi, tunungunukanga muna lukwikilu luna vo i diambu diakaka diamfunu muna samba. Yesu wavova vo: “Mawonso, konso mana nulombela muna sambu, kuna lukwikilu, nutambula.” (Matai 21:22) O lukwikilu ke mpasi kwikila ko. Kansi, i kwikila mu diambu kana una vo dilembele moneka, una ye ziku vo dialudi kikilu. (Ayibere 11:1) Nkand’a Nzambi wazala ye ziku yisonganga vo o Yave ona katulendi mona ko una kikilu, ofwene bundwa e vuvu ye una yo luzolo lwa vana mvutu za sambu y’awana bekwikilanga muna yandi. Vana ntandu, diamfunu twalombanga kwa Yave katukùdikila lukwikilu, yandi una y’etima dia kutuvana mana tuvwanga o mfunu.—Luka 17:5; Yakobo 1:17.

Vena diaka ye diambu diakaka dia mfunu mu kuma kia una tufwete sambila. Yesu wavova vo: ‘Ke vena ona okwiza kwa Se ko, ovo ke mu mono ko.’ (Yoane 14:6) Ozevo, Yesu i nzila muna finama Yave wa Se. Muna kuma kiaki, Yesu wavovesa  alongoki andi vo basambanga muna nkumbu andi. (Yoane 14:13; 15:16) Ediadi ke disongele ko vo tufwete samba kwa Yesu. Kansi, tusambanga muna nkumbu a Yesu, muna sungamena vo muna Yesu i tulenda finamena S’eto wavelela ye walunga.

Lumbu kimosi, alongoki a Yesu balomba kwa Yesu vo: “E Mfumu, utulong’o samba.” (Luka 11:1) Dialudi vo, ke bavavang’o zaya ko mpila kafwete kadila o muntu vava kesambanga. Kansi, bavavang’o zaya ‘nkia mambu bafwete lomba mu sambu.’

[Mvovo mia Sina muna lukaya lwa 6]

E sambu kiambote i sambu kin’engwizani ye luzolo lwa Nzambi, kivangilwanga kuna lukwikilu ye muna nkumbu a Yesu