3

 Lu Swanela ku Lapela Cwañi?

HA LU ambola za tapelo, lizo ze ñata za bulapeli li landalalanga fa lika za kwa mubili ze ama tapelo, ze cwale ka mwa ku inela kamba mwa ku yemela mutu ha lapela, manzwi a ku itusisa, kamba likezo ze ñwi za mwa bulapeli. Niteñi, Bibele i lu tusa ku sa landalala fa lika za kwa mubili ze ama tapelo, kono lu ise mamelelo fa likalulo za butokwa hahulu ze mwa puzo ye, “Lu swanela ku lapela cwañi?”

Bibele i talusa za batanga ba Mulimu ba ba sepahala inze ba lapela mwa libaka ze ñata ni ka milapelelo ye shutana-shutana. Ne ba lapelelanga mwa pilu kamba ka ku tiisa ku likana ni miinelo ye ne ba li ku yona. Ne ba lapelanga inze ba talimezi mwahalimu kamba inze ba kubami. Ku fita ku itusisa maswaniso, lifaha, kamba libuka za litapelo ha ne ba lapelanga, litapelo za bona ne li zwelela kwa pilu ili ka ku itusisa manzwi a bona ka sibili. Kiñi se ne si tisize kuli Mulimu a utwe litapelo za bona?

Sina ka mo ku taluselizwe mwa taba ye felile, ne ba lapezi feela ku Mulimu a li muñwi, yena Jehova. Hape ku na ni libaka le liñwi la butokwa. Kwa liñolo la 1 Joani 5:14 lu bala kuli: “Sepo ye tuna ye lu na ni yona ku Yena kikuli ha lu kupa nto ka ku lata kwa hae, wa lu utwa.” Mulimu u utwanga litapelo ze lumelelana ni tato ya hae. Taba yeo i talusañi?

Kuli lu lapele ka ku lumelelana ni tato ya Mulimu, lu swanela ku ziba seo tato ya Mulimu i li sona. Kacwalo ku ituta Bibele ki kalulo ya butokwa ya tapelo. Kana seo si talusa kuli Mulimu ha koni ku lu utwa konji haiba lu licaziba za Bibele? Batili, Mulimu u libelela kuli lu itute tato ya hae, ku i utwisisa ni ku pila ka ku lumelelana ni yona. (Mateu 7:21-23) Lu tokwa ku lapelanga ka ku lumelelana ni ze lu ituta.

Ha lu nze lu ituta ka za Jehova ni tato ya hae, lu ka hula mwa tumelo—ili kalulo ye ñwi ya butokwa ya tapelo. Jesu na bulezi kuli: “Linto kaufela ze mu ka kupa ka tapelo, ha mu na ni tumelo, mu ka li fiwa.” (Mateu 21:22) Ku ba ni tumelo ha ku talusi ku lumela-lumela feela lika kaufela. Kono ku talusa ku kolwa ze sa bonwi ili ze na ni bupaki bo butuna bwa kuli li teñi. (Maheberu 11:1) Mwa Bibele ku na ni bupaki bo buñata bwa kuli, Jehova, ye lu sa koni ku bona, u teñi luli, wa itingwa, mi u itatela ku alaba litapelo za ba ba lumela ku yena. Ku tuha fo, lu kupange ku ekelezwa kwa tumelo, mi Jehova u tabela ku lu fa ze lu tokwa.—Luka 17:5; Jakobo 1:17.

Kalulo ye ñwi ya butokwa ya mwa ku lapelela ki ye. Jesu na bulezi kuli: “Ha ku na mutu ya ka taha ku Ndate, konji ka na.” (Joani 14:6) Kacwalo, Jesu ki yena nzila ye lu kona ku atumela  ka yona Ndate, yena Jehova. Kona libaka Jesu ha na bulelezi balateleli ba hae ku lapela ka libizo la hae. (Joani 14:13; 15:16) Fo ha ku talusi kuli lu swanela ku lapela ku Jesu. Kono lu lapela ka libizo la Jesu, ka ku ziba kuli lu kona ku atumela feela Ndataa luna ya kenile ni ya petehile ka Jesu.

Balateleli ba Jesu ba batuna ba kile ba mu kupa kuli: “Mulena, u lu lute ku lapela.” (Luka 11:1) Ku bonahala kuli ne ba sa mu kupi kuli a ba taluseze lika ze cwale ka ze lu sa zo nyakisisa. Ne ba tokwa luli ku ziba za ku lapelela—ku swana inge kuli ne ba bulela kuli, ‘Lu swanela ku kupa lika mañi?’

[Manzwi a fa likepe 6]

Litapelo za kona ku utwa Mulimu ki ze lumelelana ni tato ya hae, ze lapelwa ka tumelo, ni ze lapelwa ka libizo la Jesu