Milombelo

3 Muswelo’ka?

KITATYI kya kulombela, bipwilo bingi bidi na kisela kya kwimanina pa bintu bimweka, kimfwa mwimanino nansha mushikatyilo, bishima ne bibidiji. Inoko, Bible witukwasha tuleke kwimanina pa bino bintu ne kuta mutyima ku kipangujo kya mvubu, “I muswelo’ka otufwaninwe kulombela?”

Bible utela bengidi ba kikōkeji bādi balombela mu bifuko ne mu mwimanino ne mushikatyilo palapala. Bādi balombela mundamunda nansha na diwi ditunduke mungya ngikadila. Bādi balombela koku batala meso mūlu nansha bakonkamine panshi. Pa kyaba kya kwingidija byelekejo, shapele, nansha bitabo bya milombelo bu bya kwibakwasha pobalombela, bādi balombela bitamba ku mutyima mu bishima bya abo bene. I bika byālumbulwile milombelo yabo?

Enka mulombwela kishinte kibadikile kino, bādi balombela kudi Leza umo kete—Yehova. Kudi kintu kikwabo kya mvubu. Tutanga mu 1 Yoano 5:14 amba: “Ino buno namino bo bukankamane bo tudi nabo mudi aye, twa’mba wivwane tulombe kintu, shi kika, shi kika, monka muswidile mutyima wandi, nankyo witwivwana.” Milombelo yetu ifwaninwe kwikala mikwatañane na kiswa-mutyima kya Leza. Le ko kunena namani?

Pa kulombela mungya kiswa-mutyima kya Leza, i biyampe kuyuka kine kiswa-mutyima’kya. Pa kino, kwifunda Bible kukwashanga bininge pa kulombela. Le ko kunena’mba Leza ukapela kwitwivwana shi ketufundilepo masomo a peulu a Bible? Mhm, ino Leza usaka tukimbe kiswa-mutyima kyandi, kwikivwanija ne kwikilonga. (Mateo 7:21-23) Tufwaninwe kulombela mungya byobya byotwifunda.

Shi twifunda bitala padi Yehova ne kiswa-mutyima kyandi, tutamijanga lwitabijo—kintu kikwabo kya mvubu mikatampe mu milombelo. Yesu wānene amba: “Byonso byomukasaka pa kulombela, ne kwitabija ponka, mukebitambula.” (Mateo 21:22) Lwitabijo kekwikalapo kitabija-vidingi. Ino i kukulupila mu kintu nansha byokidi kyampikwa kumweka, akyo’ko kikwatakanibwe na bukamoni bupotoloke. (Bahebelu 11:1) Mu Bible mudi bukamoni buvule bulombola’mba Yehova, nansha byoketukokejapo kumumona, udi’ko bine, ukulupilwa ne udi na mutyima wa kulondolola milombelo ya boba badi na lwitabijo mwadi. Kadi, tubwanya kulomba Yehova kyaba ne kyaba etuvudijije lwitabijo, kadi usenswe kwitupa bitusakilwa.—Luka 17:5; Yakoba 1:17.

Tala mwanda mukwabo wa mvubu utala muswelo wa kulombela. Yesu wānene amba: “Kekudi nansha umo wakukafikila kudi Tata poso ponka pa ami.” (Yoano 14:6) Nanshi i kupityila kudi Yesu kotukokeja kufwena kudi Tata Yehova.  O mwanda Yesu wānene balondi bandi balombele mu dyandi dijina. (Yoano 14:13; 15:16) Kino kekishintululapo amba tufwaninwe kulombela kudi Yesu. Ino tulombelanga mu dijina dya Yesu, koku tuvulukile amba i kupityila kudi Yesu kotubwanya kufwena kudi Tata wetu mubwaninine ne ukola.

Balondi ba pabwipi ba Yesu bāmunene amba: “Abe Mfumwetu witulombola mwakulombela.” (Luka 11:1) I kimweke amba kebādipo bepangula bintu bya kyalwilo byotwesambilanga’po’bya. Na bubine bādi basaka kuyuka bya kulomba—mu muneneno mukwabo amba, ‘I bika byotufwaninwe kulomba?’

[Bushintuludi pa paje 6]

Milombelo milumbuluke ikwatañene na kiswa-mutyima kya Leza, ilombelwa na lwitabijo, kadi ilombelwa mu dijina dya Yesu