Ṭawngṭaina

3 Engtin Nge?

ṬAWNGṬAI chungchângah sakhaw thurochhiah tam tak chuan tisa lam thil, taksa kenkawh dân te, kan thu chham te, leh thil tih ṭhin dânte chu a ngai pawimawh hle a. Mahse, Bible chuan chutiang thil chu hnâwl a, “Engtin nge kan ṭawngṭai ang?” tih zawhna pawimawh zâwk ngaihsak tûrin min ṭanpui a ni.

Bible chuan Pathian chhiahhlawh rinawmte chu hmun hrang hrangah taksa kenkawh dân chi hrang hranga an ṭawngṭai thu a sawi a. Dinhmun azirin aw chhuak lo emaw, au chhuakin emaw an ṭawngṭai a ni. Vân lam hawiin an ṭawngṭai a, kûn chungin an ṭawngṭai bawk. Ṭawngṭaina ṭanpuitu atâna milim te, rosary te, lehkhabu te hman ai chuan mahni ir-âwm chhuakin, rilruin an ṭawngṭai mai zâwk a ni. Engin nge an ṭawngṭaina chu Pathian ngaihthlâk nihtîr?

Thuziak hmasaa sawi lan tawh angin, anni chuan an ṭawngṭaina chu Pathian pakhat—Jehova—hnênah chauh an hlân a ni. Thil pawimawh dang pakhat a la awm a. Chu chu, 1 Johana 5:14-ah kan chhiar a ni: “Hei hi ama chunga kan huaina chu a ni, engpawh a duhzâwng anga kan dîl chuan anin min ngaihthlâksak ṭhin hi,” tiin. Chuvângin, kan ṭawngṭaina chu Pathian duhzâwng ang a ni tûr a ni. Chu chu eng tihna nge ni?

Pathian duhzâwng anga ṭawngṭai tûr chuan a duhzâwng chu kan hriat a ngai a. Chuti chu, Bible zir hi ṭawngṭaina pêng pawimawh tak pakhat a ni. Chu chu Bible zirmi kan nih chauh loh chuan Pathianin kan ṭawngṭaina a ngaithla dâwn lo tihna a ni em? Ni lo ve, mahse Pathianin a duhzâwng zir tûr, hre thiam tûr, leh chu mi mila nung tûrin min beisei a. (Matthaia 7:21-23) Chu kan thil zirte nêna inmilin kan ṭawngṭai tûr a ni.

Pathian Jehova leh a duhzâwng kan zir hian, ṭawngṭai nâna thil pawimawh tak dang rinna kawngah chuan kan lo ṭhang lian a ni. Isua chuan: “Engkim ring chunga ṭawngṭaia in dîl apiang chu in hmu ang,” a ti. (Matthaia 21:22) Rinna chu bum  awlsam tak nihna a ni lo. Finfiahna ṭha takin a târ lan avânga hmuh theih loh thilte pawh awm ngeia hriatna hi a ni zâwk mah a ni. (Hebrai 11:1) Bible-ah hian kan hmuh theih loh Pathian Jehova chu a awm tak takin, a rin tlâk a; tin, amah ringtute ṭawngṭaina a chhâng peih tih finfiahna tam tak a chuang a ni. Chu bâkah, rinna neih belh tûrin kan ngên thei reng a, kan mamawhte min pêk chu Pathian Jehova nuam tihzâwng tak a ni bawk.—Luka 17:5; Jakoba 1:17.

Ṭawngṭai dân tûr chungchânga thil pawimawh tak dang pawh a awm a. Isua chuan: “Keimaha kal lo chu tumah Pa hnênah an thleng ngai lo,” a ti. (Johana 14:6) Chuvângin Isua chu Pa ber, Pathian Jehova hnên kan thlen theihna kawng a ni a. Isua chuan a hnungzuitute hnênah a hminga ṭawngṭai tûrin a hrilh rêng a ni. (Johana 14:13; 15:16) Hei hi Isua hnênah kan ṭawngṭai tûr a ni, tihna a ni lo. Chu ai mahin, kan Pa ṭha famkim leh thianghlim tak kan pan theih chhan chu Isua vâng a ni tih hre reng chungin, Isua hmingin kan ṭawngṭai zâwk a ni.

Isua hnungzuitu a ṭhian hnai takte chuan ṭum khat chu: “Lalpa, ṭawngṭai dân . . . min zirtîr ve ta che,” an ti a. (Luka 11:1) Chu chu, tûna kan sawi tâk ṭawngṭaina chungchânga thu pângngai takte mai niin a lang lo. Ṭawngṭainaa chham tel tûrte hriat chu an duh a ni. An thil ngen chu, ‘Eng chungchângah nge kan ṭawngṭai ang?’ ti ang tluk an ni. (w10-E 10/01)

[Phêk 6-naa thu lâk chhuah]

Pathian ngaihthlâk ṭawngṭaina chu a duhzâwng nêna inrem, rinnaa hlan, leh Isua hminga dîl hi a ni