MINTIʼ in nok tqʼoʼn Tyol Dios toklen qa waʼl qoʼ moqa qʼuqli qoʼ aj qnaʼn Dios. Ex mintiʼ in tzaj tqʼamaʼn alkye yol tuʼn t-xi qqʼamaʼn ex tuʼn kybʼant junjuntl tiʼchaq quʼn ik tzeʼn in bʼant kyuʼn nim okslabʼil. Sino mas in yolin kyiʼj junjuntl tiʼchaq mas nim kyoklen.

In yolin kyiʼj tmajen Jehová tej kynaʼn Dios kyoj junxichaq lugar ex toj junxichaq tten. At maj e naʼn Dios toj kyanmi ex junjuntl maj tukʼil tqʼajqʼajel kywiʼ. Ateʼ junjun jaw kykeʼyin twitz kyaʼj, atzun junjuntl e kubʼ mokʼeʼ. Mintiʼ e ajbʼen sant nix junjuntl tiʼchaq kyuʼn, sino xi kyqʼamaʼn tkyaqilju tkuʼx toj kyanmi toj kyex kyyol. ¿Tiquʼn tzaj tbʼiʼn Jehová kynaʼj Dios?

Tnejel, tuʼnju e naʼn Dios te Jehová, aju mas nim toklen tuʼn tbʼant kyuʼn ik tzeʼn ma tzʼel qnikʼ tiʼj. Ex in tzaj qʼamaʼn juntl tiquʼn toj 1 Juan 5:14, aju in tzaj tqʼamaʼn jlu: «Qa at jun ma txi qqanin te Dios ik tzaʼnx ju tajbʼil, in qo tzaj tbʼiʼn, kyjaʼtzun tten in qeʼxix qkʼuʼj tiʼj». Ikju, il tiʼj tuʼn t-xi qqanin qe tiʼchaq te Dios ik tzeʼnxju tajbʼil. ¿Tiʼ t-xilen jlu?

Tnejel, il tiʼj tuʼn tok qojtzqiʼn alkye tvoluntad Dios. Tuʼn tel qnikʼ tiʼj jlu, il tiʼj tuʼn qxnaqʼtzan tiʼj Tyol. Nya a t-xilen jlu qa il tiʼj tuʼn tel qnikʼ kyiʼj kykyaqil xnaqʼtzbʼil. Pero taj Jehová tuʼn tok tilil quʼn tuʼn tel qnikʼ tiʼj t-ximbʼetz ex tuʼn tkubʼ qbʼinchaʼn aju in nel qnikʼ tiʼj (Mateo 7:​21-23). Il tiʼj tuʼn qnaʼn Dios ik tzeʼnx in nel qnikʼ tiʼj toj Biblia.

Mas in chʼiy qʼuqbʼil qkʼuʼj aj tel mas qnikʼ tiʼj Jehová ex tiʼjju tajbʼil. Nim toklen tuʼn tbʼant jlu quʼn tuʼntzun ttzaj bʼiʼn qnaʼj Dios tuʼnju tqʼama Jesús jlu: «Tkyaqilju kxel kyqanine tuj naʼj Dios, ex qa ma qeʼ kykʼuʼje tiʼj Dios, ok kykʼmaʼye» (Mateo 21:22). Tuʼn tten qʼuqbʼil qkʼuʼj, nya oʼkx tuʼn t-xi qnimen jun tiʼ, sino il tiʼj tuʼn tkubʼ qyekʼin tukʼil qbʼinchbʼen. Ex atzun jlu yolin Jesús tiʼj (Hebreos 11:1). Ax tok, mlay tzʼok qkeʼyin Jehová, pero in tzaj tyekʼin Biblia qa ax tok at, qa jaku tzʼok qeʼ qkʼuʼj tiʼj ex qa in tzaj ttzaqʼweʼn kynaʼj Dios qeju in nok qeʼ kykʼuʼj tiʼj. Mintiʼ in tzaj tqʼoj aj t-xi qqanin qʼuqbʼil qkʼuʼj te, sino taj tuʼn tonin qiʼj tuʼn tchʼiy qʼuqbʼil qkʼuʼj (Lucas 17:5; Santiago 1:17).

Maske ikju, il tiʼj tuʼn tbʼant juntl tiʼ quʼn tuʼntzun ttzaj tbʼiʼn Jehová qnaʼj Dios. Tqʼama Jesús jlu: «Mi aʼl jun xjal jaku pon tukʼil Dios Mambʼaj, qa mya wuʼne» (Juan 14:6). Toj juntl yol, oʼkx jaku qo ok laqʼeʼ ttxlaj Jehová noq tuʼn Jesús. Tuʼntzunju, xi tqʼamaʼn Jesús kye t-xnaqʼtzbʼen tuʼn kynaʼn Dios toj tbʼi (Juan 14:13; 15:16). Pero aj qnaʼn Dios toj tbʼi Jesús, nya a t-xilen jlu qa te in qo naʼn Dios. Sino qa in nel qnikʼ tiʼj qa noq tuʼn Jesús in qo ok laqʼeʼ ttxlaj Jehová.

Jun maj, xi tqanin jun t-xnaqʼtzbʼen Jesús jlu te: «Tat, qo t-xnaqʼtzama tuʼn tbʼant qnaʼne Dios» (Lucas 11:1). ¿Tiquʼn tqʼama jlu? In nel qnikʼ tiʼj qa ya ojtzqiʼntoq kyuʼn tzeʼn tuʼn kynaʼn Dios. Pero xi tqanin jlu tuʼnju kyajtoq tuʼn tel kynikʼ tiʼj tiʼ jaku txi kyqanin toj kynaʼj Dios.